Nyarugenge:Ntibagipfa kwitaba telefone nijoro kubera gutinya bene ngango

Yanditswe na Kanamugire Emmanuel
Kuya 5 Ukwakira 2016 saa 12:36
Yasuwe : XX
0

Bamwe mu baturage bo mu mirenge ya Nyamirambo, Rwezamenyo,Kimisagara na Nyakabanda baravuga ko babangamiwe n’abajura babakura telefone ku matwi cyangwa bakabatega bakabambura cyane cyane mu masaha y’ijoro.

Bavuga ko bahangayikishijwe cyane n’umutekano wabo nyuma y’uko hadutse abajura basigaye babategera ku bipangu byabo batashye bakabambura ibyo bafite byose cyangwa se bakabashikuza telefone bari kuzivugiraho.

Mutuyimana Eric utuye ku Mumena mu Murenge wa Nyamirambo yabwiye IGIHE ko adashobora kuzongera kugenda avugira kuri telefone nijoro nyuma y’uko abajura bayimwibye bamunize.

Yagize ati “ N’iyo byagenda bite sinshobora kuzongera kugenda mvugira kuri telefone nijoro nyuma y’aho abajura bayinyibye ndi kuyivugiraho bakananyambura ibintu byose nari mfite hafi ya Stade yo ku Mumena.”

Uwase Aline utuye mu Kagari ka Kimisagara we yagize ati “ Rwose ubuyobozi nibudufashe budukize aba bajura badutse ;uziko bagutegera neza ku gipangu cyawe utashye bakakwambura buri kintu cyose ufite ndetse wanasakuza utabaza ntihagire ugutabara?”

Ikibazo kizwi n’ubuyobozi ariko bwatangiye kugikemura

Umunyamabanga Nshingwabikorwa w’Umurenge wa Kimisagara Ruzima Serge yabwiye IGIHE ko ikibazo cy’abajura na bo bakizi ariko ko bagikemuye.

Yagize ati “ Twarabimenye ariko dusanga abo bajura biba abaturage cyane cyane mu gihe cy’imvura bacunze abanyerondo igihe bagiye kugama ariko ubu twabaguriye amakoti y’imvura kugira ngo dukemure burundu icyo kibazo.”

Umunyamabanga Nshingwabikorwa w’Umurenge wa Nyamirambo Semitari Alex we avuga ko abona ikibazo cy’ubujura cyagabanuts mu murenge ayobora ugereranije no mu myaka ishize.

Yagize ati “Njye navuga ko ubujura bumaze kugabanuka cyane kuko twashyize imbaraga mu irondo ry’umwuga kugira ngo tubirwanye, ku buryo twongereye umubare w’abanyerondo tugerageza no kubahugura kugira ngo bibashe kumenya uko bazajya batahura abo bajura.”

Icyo Polisi ibivugaho

Umuvugizi wa Polisimu Mujyi wa Kigali ,Supt. Hitayezu Emmanuel yasabye abaturage bibwe kujya bahita batanga amakuru kuko bituma polisi ishobora gufata abo bajura.

Yagize ati “ Iyo hari umuntu wibwe agatanga ikirego turacyakira kugira ngo dufate ababigizemo uruhare kandi hari n’abo dufata nko mu mikwabu tukabafatana telefone bakatwemerera ko bazibye ku buryo hari n’abaturage tuzisubiza ariko na byo bigaterwa n’uko baba baratanze ibirego bakimara kwibwa.”

Abanyerondo bari guhabwa amakoti y'imvura
Umurenge wa Kimisagara wo waguriye abanyerondo amakoti y'imvura
Hamwe mu hantu hadapfa kwitabirwa telefone nijoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza