Nyarugenge: Gitifu na Dasso baguwe gitumo bamaze kwakira ruswa

Yanditswe na Thamimu Hakizimana
Kuya 9 Ugushyingo 2019 saa 02:27
Yasuwe :
0 0

Muhiganwa Emmanuel wari ushinzwe Iterambere n’Ubukungu mu Kagari Kigali mu Murenge wa Kigali na Umuhire Brigitte wakoreraga Urwego rwa Dasso muri ako gace batawe muri yombi nyuma y’aho baguwe gitumo bamaze kwakira ruswa bahawe n’umuturage kugira ngo yubake mu kajagari.

Ahagana saa munani n’igice zo ku wa Gatanu, nibwo Muhiganwa na Umuhire baguwe gitumo bafite amafaranga ibihumbi 40 bari bamaze guhabwa n’umuturage.

Amakuru aturuka mu Murenge wa Kigali avuga ko aba bantu uko ari babiri bari bagiye mu gikorwa cyo gusenyera umuturage wari wubatse mu kajagari bahageze barumvikana abaha ibihumbi 40 kugira ngo batamusenyera.

Gusa ngo uyu muturage mbere yo kubaha ayo mafaranga yabanje abibwira inzego zumutekano kugira ngo zibafate noneho zirabakurikirana zibafata amaze kuyabashyikiriza.

Umunyamabanga Nshingwabikorwa w’Umurenge wa Kigali, Niyibizi Jean Claude, yabwiye IGIHE ko aba bantu bakimara kubona ko imodoka y’inzego z’umutekano iri kubakurikirana bahise bajugunya ayo mafaranga mu rugo rw’umuturage.

Yagize ati “Hari ahantu bagiye kuvanaho inzu yubatswe mu kajagari noneho habaho kumvikana na nyirayo hanyuma babaha amafaranga ibihumbi 40 kugira ngo azakore ibyo yagakwiye gukora binyuranyije n’amategeko arayatanaga ariko amenyesha n’inzego z’umutekano mu mu rwego rwo kubafatishwa. Mu kubakurikirana kuko hari imodoka yabakurikiraga bayibonye barabikeka bariruka bayata ahantu mu gipangu.”

Yakomeje avuga ko inzego z’umutekano zahise zinjira muri urwo rugo kuko ayo mafaranga bari bahawe nimero zayo barebye basanga niyo bahita babafata.

Umuvugizi w’Urwego rw’Ubugenzacyaha RIB, Marie Michelle Umuhoza, yabwiye IGIHE bamaze kwakira ikirego cy’aba bantu uko ari babiri.

Ati “Nibyo ejo hari ayo makuru y’uko Sedo w’Akagarika n’uhagarariye Dasso mu Kagari bafatanywe ruswa na dosiye yarafunguwe irimo irakorwaho iperereza.”

Yakomeje avuga ko kugeza ubu bafungiwe kuri sitasiyo ya RIB ya Kanyinya.

Itabwa muri yombi ry’aba bantu babiri rije nyuma y’aho ubuyobozi bw’Akarere ka Nyarugenge butangije gahunda yo kugenzura ibijyanye na ruswa ivugwa ko itangwa mu myubakire y’akajagari.

Meya w’Akarere ka Nyarugenge, Kayisime Nzaramba, we yaboneyeho gusaba abaturage gutanga amakuru y’ahavugwa ruswa kuko ihombya Leta.

Ashimangira ko ntawe ukwiye kubaka mu kajagari cyane kuko bari gutegura ahantu hatandukanye hateganyijwe gutura abafite ubushobozi buke mu rwego rwo kwirinda imyubakire y’akajagari.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza