Nyarugenge : DASSO 20 bamaze gukubitwa n’abazunguzayi

Yanditswe na Ishimwe Israel
Kuya 1 Ukwakira 2016 saa 05:31
Yasuwe :
0 0

Abagize urwego rwunganira ubuyobozi bw’akarere mu gucunga umutekano (District Administrative Security Support Organ-DASSO) bagera kuri 20 bamaze gukubitwa n’abazunguzayi kubera kubabuza gucururiza mu kajagari mu bice bitandukanye by’Umujyi wa Kigali.

Umuyobozi w’Akarere ka Nyarugenge, Kayisime Nzaramba yatangarije IGIHE ko kuva aho Umujyi wa Kigali utangiriye gahunda yo guca ubucuruzi bw’akajagari aba- Dasso bagiye bahohoterwa.

Yagize ati “ Nibyo hamaze guhohoterwa aba-Dasso bagera kuri 20, aho usanga bamwe mu bazunguzayi babatera amabuye bakanabakubita, gusa turabashima ikinyabupfura bagaragaje bitewe n’uko n’ababikora ahanini baba bashaka gusa kubashotora kugira ngo barebe uko babyitwaramo.”

Yakomeje avuga ko hari na bamwe mu bazunguzayi basigaye babona Dasso zibafashe bari gucururiza mu kajagari bagahita bigwisha hasi kugira ngo bereke abaturage ko zibahohoteye.

Yagize ati “ Babanje kujya biryamisha hasi ku buryo hari n’abajyanywe kwa muganga bagasanga ari bazima nta kibazo na kimwe bafite. Nyuma yo kubona ko twabivumbuye ntibongeye kubikinisha noneho bahise batangira ibyo kubakubita no kubatera amabuye.”

Umwe muba Dasso wanze ko izina rye ritangazwa yagize ati " Nimudufashe muzatugaragarize ubuyobozi bwacu uburyo duhohoterwa kuko hari igihe iyo tubibabwiye batabyumva bakagira ngo ni amakabyankuru yacu kuko hatagize igikorwa hari n’igihe dushobora kuzahatakariza ubuzima."

Yakomeje asaba abacururiza mu kajagari kureka ubushotoranyi no kwigomeka bagakurikiza amabwiriza bahabwa n’ubuyobozi y’uko nta muzunguzayi ukwiye gucururiza mu muhanda.

Umuvugizi wa Polisi mu Mujyi wa Kigali, Supt Hitayezu Emmanuel we yasabye abazunguzayi kwirinda ibikorwa nk’ibyo kuko atari indangagaciro z’Umunyarwanda kubera ko n’ibikorwa by’ubucuruzi bakora bitemewe n’amategeko.

Yagize ati “ Dasso ni urwego rushyira mu bikorwa imyanzuro iba yafashwe n’inzego z’ubuyobozi, rero iyo bari gukora ibyo basabwa usanga hari igihe bahura n’abazunguzayi badafite imyitwarire myiza bakabahohotera.”

Yakomeje asaba abakora bene ubwo bucuruzi kwirinda guhohotera abashinzwe kurwanya akajagari kuko uzafatirwa muri ibyo bikorwa azajya abihanirwa by’intangarugero.

Abashinzwe umutekano mu myitozo y'ubwirinzi bw'ibanze mu kazi kabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza