Kwamamaza

Nyarugenge:Afunzwe akekwaho gutanga impushya zo kubaka z’inyiganano

Yanditswe kuya 1-10-2016 saa 07:09' na IGIHE


Polisi y’u Rwanda mu karere ka Nyarugenge yafashe umugabo uri mu kigero cy’imyaka 32 watangaga impushya zo kubaka z’inyiganano yiyita Umuyobozi w’Urwego rw’ibanze.

Umuvugizi wa Polisi y’u Rwanda mu Mujyi wa Kigali,SP Emmanuel Hitayezu yavuze ko ukekwaho gukora iki cyaha ari uwitwa Eric Peterson Mugwaneza, wafatiwe mu cyuho ku wa 28 Nzeri afite uruhushya rwo kubaka rw’urwiganano yendaga kugurisha amafaranga y’u Rwanda ibihumbi 30.

Yagize ati" Mugwaneza yamenye ko uwitwa Ndacyayisenga yaguze ubutaka mu murenge wa Kanyinya, kandi ko afite gahunda yo kubwubakamo inzu. Yamuhamagaye kuri telefone igendanwa yiyita Umunyamabanga Nshingwabikorwa w’uwo murenge, amubwira ko ashaka kumuha icyangombwa cyo kubaka, ariko ko agomba kumuha ibihumbi 30 by’amafaranga y’u Rwanda byo gukoresha muri gahunda zo kwihutisha iyo serivisi."

SP Hitayezu yongeyeho ko Ndacyayisenga yagize amakenga ubwo Mugwaneza yakomezaga kumutitiriza amusaba ayo mafaranga, maze abitekerereza umwe mu bayobozi b’inzego z’ibanze wamugiriye inama yo guhita abimenyesha Polisi.

Umuvugizi wa Polisi y’u Rwanda mu Mujyi wa Kigali yagize kandi ati:" Bakigera aho bari bumvikanye guhurira kugira ngo bahererekanye amafaranga n’urwo ruhushya rw’urwiganano, Polisi yahise ibagwa gitumo, maze isangana Mugwaneza uruhushya rwo kubaka rw’urwiganano ruteyeho Kashe y’Umurenge wa Kanyinya; ndetse ruriho n’umukono w’Umunyamabanga Nshingwabikorwa wawo."

SP Hitayezu yavuze ko Mugwaneza afungiye kuri Sitasiyo ya Polisi ya Kigali mu gihe iperereza rikomeje kugira ngo harebwe niba hari abandi yibye kuri ubwo buryo.

Yibukije ko serivisi za Leta zitangwa mu buryo buzwi kandi busobanutse, bityo asaba buri wese kurangwa n’ubushishozi kugira ngo adacuzwa utwe na ba Rutemayeze, kandi bagatanga amakuru y’abo babikekaho.

Ingingo ya 318 yo mu gitabo cy’amategeko ahana ibyaha mu Rwanda ivuga ko umuntu wese, abigiriye kwambura ikintu icyo ari cyo cyose cy’undi, agatuma bakimuha ari uko akoresheje amayeri y’ubwambuzi, wiyitirira amazina atari aye cyangwa imirimo adafitiye ububasha cyangwa agira ngo yizeze icyiza cyangwa atinyishe ko hari ikizaba kibi maze akambura undi imari ye yose cyangwa igice cyayo, ahanishwa igifungo kuva ku myaka itatu (3) kugeza ku myaka itanu (5) n’ihazabu y’amafaranga y’u Rwanda kuva kuri miliyoni eshatu (3.000.000) kugeza kuri miliyoni eshanu (5.000.000).

Iya 609 yacyo ivuga ko umuntu wese uhimba cyangwa uhindura mu buryo ubwo ari bwo bwose inyandiko, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwa icyarangije kwemeranywa, ahanishwa igifungo kirenze imyaka itanu (5) kugeza ku myaka irindwi (7) n’ihazabu y’amafaranga y’u Rwanda kuva ku bihumbi magana atatu (300.000) kugeza kuri miliyoni eshatu (3.000.000).


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved