00:00:00 IGIHE NETWORK KN KINYARWANDA EN ENGLISH FR FRANCAIS

Nyanza: Umugabo akurikiranyweho gukubita sewabo bikamuviramo urupfu

Yanditswe na Prudence Kwizera
Kuya 29 Nzeri 2021 saa 01:32
Yasuwe :
0 0

Umugabo w’imyaka 36 wo mu Murenge wa Muyira mu Karere ka Nyanza akurikiranyweho icyaha cyo gukubita sewabo bikamuviramo urupfu.

Icyo cyaha cyabereye mu Mudugudu wa Mugina mu Kagari ka Mugina aho abajura bateye urugo rwa Mutangana Joseph w’imyaka 59 y’amavuko bakamukubita bashaka kumwiba agatabarwa n’irondo.

Mutangana akimara gukubitwa mu ijoro ryo ku wa 25 Nzeri 2021 yajyanywe ku Kigo Nderabuzima aravurwa asubira mu rugo, ariko akomeza kuremba.

Nyuma yagiye kwivuza ku Bitaro by’Akarere ka Nyanza ariko birangira apfuye.

Umunyamabanga Nshingwabikorwa w’Umurenge wa Muyira, Muhoza Alphonse, yabwiye IGIHE ko Mutangana yavuze ko mu bajura abamuteye harimo umugabo abareye sewabo.

Ati “Yavuze ko mu bamuteye bakamukubita harimo umugabo bakunda kwita Rusake kandi asanzwe akekwaho ibyaha by’ubujura. Ubu rero yarafashwe kugira ngo akorweho iperereza ndetse hamenyekane n’abandi bari kumwe na we.”

Uyu ukekwaho uruhare mu rupfu rwa sewabo afungiye kuri Sitasiyo ya RIB ya Kibirizi.

Umurambo wa Mutangana washyinguwe kuri uyu wa Gatatu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .