Nyanza: Hatashywe Urugereko rw’Urukiko Rukuru ruzanaburanisha imanza mpuzamahanga

Yanditswe na Prudence Kwizera
Kuya 28 Kamena 2018 saa 05:20
Yasuwe :
0 0

Perezida w’Urukiko rw’Ikirenga, Prof. Sam Rugege, yafunguye ku mugaragaro Urugereko rw’Urukiko Rukuru ruzaburanisha ibyaha mpuzamahanga n’ibyambukiranya imipaka mu Karere ka Nyanza.

Uru rukiko rwatashywe ku wa 28 Kamena 2018, rwubatse mu Murenge wa Busasamana, rwuzuye rutwaye amafaranga y’u Rwanda Miliyari ebyiri na Miliyoni 500 Frw.

Ni Urukiko Rukuru rwatangiye kubakwa muri Mata 2015; inyubako yarwo igizwe n’amagorofa ane, ifite ibyumba by’ibiro 66 n’ibindi bitandatu byo guciramo imanza, ifite kandi parikingi ishobora kwakira imodoka 60 icyarimwe.

Iyo nyubako izakoreramo Urugereko Rwihariye rw’urukiko Rukuru rushinzwe kuburanisha ibyaha mpuzamahanga n’ibyambukiranya imipaka; hakoreremo kandi Urukiko Rukuru Urugereko rwa Nyanza ndetse n’Urukiko rw’Ibanze rwa Busasamana.

Rwubatswe ku nkunga y’u Buholandi, igihugu gisanzwe gitera inkunga u Rwanda muri gahunda zitandukanye harimo n’ubutabera aho cyatanze amafaranga arenga gato ½ cy’ayakoreshejwe, andi atangwa na Leta y’u Rwanda.

Perezida w’Urukiko rw’Ikirenga, Prof. Sam Rugege, yashimiye abagize uruhare kugira ngo iyo nyubako yuzure n’abakoze igishushanyo mbonera cyayo avuga ko akazi gasigaranye abacamanza n’abashinjacyaha.

Yagize ati “Abubaka barangije akazi kabo, ahasigaye abacamanza n’abashinjacyaha nimwe musigaye gukora akanyu, twiringiye ko namwe muzagakora neza. Ntidushidikanya ko akazi kazayikorerwamo (inyubako) kazaba ari keza ku buryo hazatangirwa ubutabera bunoze kandi buboneye.”

Ni urukiko rusigasira amateka

Nk’uko byasobanuwe n’Umuyobozi w’Akarere ka Nyanza, Erasme Ntazinda, yavuze ko ako karere kuva kera kahoze ari igucumbi cy’umuco n’ubutabera kuko hahoze urukiko rw’umwami.

Yagize ati “Nk’uko Nyanza ari umujyi w’igicumbi cy’umuco ariko ntitwakwibagirwa ko kuva na kera yari igicumbi cy’ubutabera, aho hano hirya ku Rwesero hari urukiko rw’umwami, bikaba rero bitugaragariza ko Nyanza ikomeje kuba igicumbi cy’ubutabera.”

Abaturage bo mu Karere ka Nyanza batuye hafi y’ahubatswe urukiko bavuga ko bishimira ko ubwo rwubakwaga bahawe akazi bahasarura amafaranga.

Bishimira kandi ko inyubako nziza y’urwo rukiko ituma umujyi wabo ugira isura nziza, ukaba ugiye kujya uganwa n’abaturutse impande zose.

Ambasaderi w’u Buholandi mu Rwanda, Frédérique de Man, yashimye ko inyubako bateye inkunga yubatswe neza avuga ko leta ye izakomeza gufatanya n’u Rwanda mu bikorwa byiza bitandukanye harimo n’ubutabera.

Perezida w’Urukiko rw’Ikirenga, Prof. Sam Rugege n'Ambasaderi w’u Buholandi mu Rwanda, Frédérique de Man, bafunguye Urugereko rw’Urukiko Rukuru i Nyanza
Urugereko rw’Urukiko Rukuru rwubatswe i Nyanza
Imiterere y'icyumba cy'iburansiha

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza