Nyanza: Hatashywe ‘Dortoir’ ya miliyoni 130 Frw yubatswe ku misanzu y’ababyeyi

Yanditswe na Mwizerwa Gilbert
Kuya 13 Werurwe 2018 saa 07:10
Yasuwe :
0 0

Ishuri ry’imyuga n’ubumnyengiro ‘Nyanza Technical School’ ryatashye ku mugaragaro amacumbi y’abanyeshuri yubatswe n’imisanzu y’ababyeyi, yuzuye atwaye miliyoni 130 z’amafaranga y’u Rwanda.

Ikibazo cy’amacumbi adahagije muri iki kigo cyatumaga bamwe mu banyeshuri bajya kurara hanze yacyo, bikaba byashoboraga kubangamira imyigire yabo.

Iki gikorwa cyakozwe mu rwego rwo gukemura ikibazo cy’amacumbi y’abanyeshuri bigaga bakodesha hanze y’ikigo; igisubizo kikaba kibonetse nyuma y’imyaka itatu hubakwa inzu yo kuraramo (Dortoir) mu kigo imbere, yatashywe ku Cyumweru tariki 11 Werurwe 2018.

Umuyobozi wa komite y’ababyeyi barerera muri iki kigo, Rutaganira Bernard, yavuze ko hari abanyeshuri bigaga bacumbikiwe n’ikigo, abandi bagataha hanze bikabarushya ariko ko icyo kibazo gikemutse.

Umuyobozi w’ishuri, Manirambona Leonard, yashimye umuhate w’ababyeyi mu gufasha ishuri gucumbikira abanyeshuri mu buryo bukwiye kuko batari kubyishoboza.

Yagize ati “Ntabwo byari byoroshye gutangira umushinga nk’uyu uhenze mu bushobozi bw’ishuri ariko twaganiriye n’ababyeyi biyemeza umusanzu bazatanga n’ubundi bushobozi bunyuranye.”

Umuyobozi wungirije ushinzwe imibereho myiza y’abaturage mu Karere ka Nyanza, Umutesi Solange, yavuze ko iyi nyubako ishimangira ireme ry’uburezi kuko wasangaga hari ubusumbane hagati y’abahungu n’abakobwa kuko bamwe bararaga hanze.

Ati “Turashimira ababyeyi kuri iki gikorwa bakoze kandi turasaba ko basigasira izi nyubako nziza.’’

Iyi nyubako n’ibikoresho byamurikiwe Nyanza Technicl School byatwaye miliyoni 130 z’amafaranga y’u Rwanda, yatanzwe mu misanzu y’ababyeyi hiyogereyeho inguzanyo ya banki izishyurwa mu myaka itatu, ikaba ifite ubushobozi bwo gucumbikira abagera kuri 300.

Iyi nyubako n’ibiryamirwa bya Nyanza Technicl School byuzuye bitwaye arenga miliyoni 130 z'amafaranga y'u Rwanda
Inyubako z'amacumbi y'abanyeshuri itahwa mu mugaragaro
Aho abanyeshuri baryama haratekanye
Umuyobozi wa komite y’ababyeyi, Rutaganira Bernard, yishimiye uruhare rw'ababyeyi muri iki gikorwa
Umuyobozi wa Nyanza Technical School, Manirambona Leonard
Umuyobozi wungirije ushinzwe imibereho myiza y’abaturage mu Karere ka Nyanza, Umutesi Solange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza