Kwamamaza

Nyanza: Barashyira mu majwi umugore ubajyanira abana i Kigali abatesheje ishuri

Yanditswe kuya 10-10-2016 saa 10:56' na Emma-Marie Umurerwa


Ababyeyi batandukanye bo mu Murenge wa Cyabakamyi, mu Karere ka Nyanza, bavuga ko hari umugore uvuka muri aka gace, ubakurira abana mu ishuri akabajyana i Kigali ntibongere kubaca iryera.

Musabyimana Beatha, atuye mu mudugudu wa Gahondo, Akagari ka Karama, avuga ko umwana we wigaga mu mwaka wa kabiri w’amashuri yisumbuye yavuye mu ishuri ajyanwa n’uwo mugore none ngo ntazi aho aherereye.

Yagize ati “Umwana wanjye w’umuhungu yari ageze mu wa kabiri w’amashuri yisumbuye, kubera imibereho mibi n’umugabo yarantaye, none umwana yavuye mu ishuri numva bavuga ko yagiye i Kigali ajyanwe na Mukamwiza, yagiye uyu mwaka utangiye ubu sinzi aho aherereye.”

Yanshimiye Cesalie, utuye mu Kagari ka Nyarurama, avuga ko umwana we wari urangije amashuri abanza nawe yajyanwe i Kigali n’uwo mugore.

Yagize ati “Umwana wanjye wavutse mu mwaka wa 2000, yajyanwe mu kwezi kwa munani umwaka ushize none naramubuze.”

Akomeza avuga ko yagiye kubaza iwabo wa Mukamwiza aho yaba aherereye bakamubwira ko na bo batahazi ariko ko yumva bamwe bavuga ko aba i Kigali ahitwa Kimisagara.

Umunyamabanga Nshingwabikorwa w’Umurenge wa Cyabakamyi, Nkurikiyumukiza Jean Marie Vianney, yatangarije IGIHE ko iki kibazo batangiye kugikurikirana.

Yagize ati “Twakoze inama y’uburezi dusaba Abayobozi b’Ibigo by’Amashuri bose kuduha urutonde rw’abana basibye iminsi myinshi kugira ngo dukurikirane tumenye aho baherereye. Imyirondoro yabo twumvikanye ko bayiduha mbere y’uko iki cyumweru gishira.”

Uyu muyobozi yakomeje avuga ko hari umubyeyi umwe wamugejejeho ikibazo ku buryo bw’umwihariko, ndetse ngo hari ibyo yamusabye byabafasha kumushaka.

Ati “Uwo mugore bavuga ubajyanira abana i Kigali simuzi, ariko hari umubyeyi umwe uherutse kuza kundeba ambwira ko yabuze umwana we, namusabye ifoto ngo nyishyire ku mbuga zitandukanye tumushakishe, ariko ntarayizana.”

Umuryango mpuzamahanga wita ku bakozi bo mu ngo( IDAY International ), uvuga ko iyo umwana uri munsi y’imyaka 16 ateshejwe kwiga agahabwa akazi ko gukora mu rugo, akarera abana b’abandi abajyana ku ishuri akanabitaho bavuyeyo, ntaho biba bitaniye n’icuruzwa ry’abantu rikorerwa imbere mu gihugu.

Ibi byatangarijwe mu kiganiro ihuriro ry’imiryango iharanira uburenganzira bwa muntu mu Rwanda(CLADHO) ryagiranye n’abanyamakuru, ku wa mbere tariki ya 16 Gicurasi 2016.

Umuhuzabikorwa wa IDAY, Murwanashyaka Evariste, yavuze ko ubwo buryo abakozi bashakwamo, bumva byakurikiranwa nk’icyaha gikomeye.

Yagize ati “ Uburyo abakozi bo mu ngo bashakwamo ntaho butandukaniye n’icuruzwa ry’abantu, ni yo mpamvu dusaba inzego zitandukanye ngo zikurikirane icyo kibazo, kuko umwana wamuvanye mu ishuri aje kugukorera, abawe bariga ejo bazigirira akamaro.”

Inkuru bifitanye isano Abakozi bo mu ngo bugarijwe n’icuruzwa ry’abantu rikomeye

Ubuyobozi bw'umurenge wa Cyabakamyi buvuga ko bwatangiye gukurikirana ikibazo cy'abana bataye ishuri

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved