Nyanza: Bamaze imyaka ine batarwara Malaria babikesha kubahiriza ingamba zo kuyikumira

Yanditswe na Prudence Kwizera
Kuya 10 Gashyantare 2021 saa 09:56
Yasuwe :
0 0

Nyuma y’igihe bamaze bubahiriza ingamba zashyizweho mu gukumira indwara ya Malaria, bamwe mu baturage batuye mu Karere ka Nyanza bavuga ko bamaze imyaka isaga ine batayirwara cyangwa ngo bayirwaze.

Babivuze kuri uyu wa Gatatu tariki ya 10 Gashyantare 2021 ubwo muri ako karere hatangizwaga ku mugaragaro igikorwa cyo gutera umuti wica imibu itera Malaria mu nzu z’abaturage.

Bamwe mu baturage batuye mu gice cy’Amayaga babwiye IGIHE ko mu myaka yashize bakundaga kwibasirwa na Malaria ariko kuri ubu batakiyirwara kuko bubahiriza ingamba zashyizweho na Leta y’u Rwanda zigamije kuyikumira.

Uwimana Rose wo mu Murenge wa Ntyazo yagize ati “Uyu muti watugiriye akamaro kanini cyane kuko kuva batangira kuwutera mu nzu nta muntu urarwara Malaria muri uru rugo. Nakundaga kurwaza abana Malaria ku buryo hari uwayirwaraga buri kwezi ariko kuva mu 2017 nta muntu urongera kuyirwara.”

Abaturanyi be bavuga ko bafashe ingamba zirimo kurara mu nzitiramibu, gukuraho ibidendezi n’ibihuru hafi y’urugo bituma bagira ubuzima buzira Malaria.

Higiro Marc yakomeje ati “Abana banjye bakundaga kurwara Malaria nanjye nkayirwara kuko inaha haba ibishanga byinshi byihishamo imibu. Gutera umuti wica imibu mu nzu byatugiriye akamaro kuko nk’ubu umuntu w’iwanjye uheruka kurwara Malaria ni umwana wayirwaye mu mwaka wa 2017. Ukundi nirinda Malaria ni ukurara mu nziritamibu no gukura ibihuru hafi y’urugo.”

Umukecuru witwa Nyiragafaranga Scolancia na we yemeza ko adaheruka kurwara Malaria.

Ati “Malaria yari yaratubereye icyorezo ariko ntabwo iheruka hashize imyaka myinshi ntayirwara cyangwa ngo nyirwaze. Uku kuduterera umuti no kurara mu nzitiramibu byaturinze malaria.”

Abaturage bo mu Karere ka Nyanza bagaragaje ko kuba batakirwara Malaria bituma bitabira umurimo bagakora bagamije kwiteza imbere.

Umuyobozi wa Porogaramu y’Igihugu yo kurwanya Malaria muri RBC, Dr Mbituyumuremyi Aimable, yavuze ko mu myaka yashize Akarere ka Nyanza kagaragaraga mu turere dutanu twa mbere dufite abaturage barwaye Malaria cyane ariko kuri ubu kari muri dutanu twa nyuma.

Ati “Mu myaka ya 2015/16 Nyanza yagaragaraga mu turere dutanu twa mbere mu gihugu dufite Malaria nyinshi yo na Huye na Gisagara. Ariko aho dutangiriye gutera umuti tubona ko Nyanza itaboneka mu turere 10 twa mbere ahubwo iza nibura muri dutanu twa nyuma tuzahajwe na Malaria, byerekana ko habaye impinduka ikomeye.’’

Mu kwezi kumwe mu 2016 Nyanza yagize abarwayi ba Malaria abagera ku bihumbi 40 ariko mu mwaka wa 2020 no mu wa 2021 hasigaye haboneka abarwayi bari munsi ya 5000 ku kwezi.

Umuyobozi w’Akarere ka Nyanza, Ntazinda Erasme, yavuze ko n’ubwo Malaria yagabanutse batazirara ahubwo bazakomeza gukaza ingamba zo kuyihashya.

Ati “Tuzatera umuti mu ngo zose zisaga ibihumbi 87. Ingamba zo kurwanya Malaria zirimo no gutera uyu muti zagize akamaro kuko mu 2016/17 Malaria yishe abantu basaga 40 ariko mu mwaka ushize yishe umuntu umwe gusa.”

Yibukije abaturage ko bakwiye gukomeza ingamba zose zo kwirinda malaria kandi hagira uwumva afite ibimenyetso byayo akihutira kwivuza.

Igikorwa cyo gutera umuti wica imibu itera Malaria mu Karere ka Nyanza kiri gukorwa n’abajyanama b’ubuzima. Biteganyijwe ko kizasozwa tariki ya mbere Werurwe 2021.

Igikorwa cyo gutera umuti wica imibu itera Malaria mu Karere ka Nyanza kiri gukorwa n’abajyanama b’ubuzima
JPEG - 519.2 kb
Ingamba zo kurwanya Malaria zirimo gutera umuti mu nzu z’abaturage zatumye haba impinduka nziza
JPEG - 395.9 kb
Kuri iyi nshuro mu Karere ka Nyanza hazaterwa umuti umuti mu ngo zose zisaga ibihumbi 87
JPEG - 446.3 kb
Mu Karere ka Nyanza hatangijwe igikorwa cyo gutera umuti wica imibu itera malaria mu nzu z’abaturage
Umuyobozi w’Akarere ka Nyanza, Ntazinda Erasme, yavuze ko n’ubwo Malaria yagabanutse ingamba zo kuyikumira zizakomeza
JPEG - 467.6 kb
Uwimana Rose wo mu Murenge wa Ntyazo yavuze ko hashize imyaka ine mu rugo rwe ntawe urwara Malaria

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .