Nyanza: Babiri bafatanwe udupfunyika 900 tw’urumogi bagiye kurushakira abakiliya

Yanditswe na IGIHE
Kuya 15 Kanama 2019 saa 09:04
Yasuwe :
0 0

Polisi ikorera mu karere ka Nyanza ku bufatanye n’abaturage, yafatanye abagabo babiri udupfunyika 900 tw’urumogi, ubwo barimo bajya inama yo kurushakira abakiriya.

Nk’uko Polisi yabitangaje, ku wa Kabiri tariki ya 13 Kanama nibwo uwitwa Mpagazehe Haruna w’imyaka 40 y’amavuko yagaragaye apakiye agafuka kuri moto agana mu rugo kwa Ndatimana Hussein w’imyaka 48, ruherereye mu mujyi wa Nyanza mu ntara y’Amajyepfo, ari naho bombi bafatiwe.

Mpagazehe Haruna usanzwe ukora akazi ko gutwara abantu n’ibintu kuri moto ngo yakemanzwe na bagenzi be b’abamotari ko ashobora kuba atunda ibiyobyabwenge ndetse banamubona ahetse agafuka, niko gutanga amakuru kuri Polisi, iramukurikira kugera imufatiye mu rugo rwa Ndatimana Hussein.

Umuvugizi wa Polisi mu Ntara y’ Amajyepfo, CIP Bonaventure Karekezi, yavuze ko abaturage batanze amakuru ko uyu mumotari ashobora kuba atwara ibiyobyabwenge niko gukurikiranwa afatirwa mu rugo rw’uwo bari barimo bajya inama y’uko bageza urwo rumogi ku barukoresha.

Yagize ati “Abandi bamotari batanze amakuru ko hari mugenzi wabo ushobora kuba yaratandukiriye akaba atwara ibiyobyabwenge. Nibwo baturangiye aho aturutse n’aho yerekeje, abapolisi baramukurikira kugeza ubwo bamufatiye mu nzu aho yarimo aganira na nyirayo uko bagiye kurugurisha.”

CIP Karekezi yashimiye abagira uruhare mu gutanga amakuru agamije gukumira no kurwanya ibiyobyabwenge mu muryango nyarwanda.

Ati “Buri wese ugira uruhare mu gukumira no kurwanya ibiyobyabwenge tumushimiye uruhare rwe mu kurinda umuryango nyarwanda ikibi. Turasaba by’umwihariko abatwara abantu n’ibintu kwirinda gutwara ibintu bitemewe kuko baba bihemukira cyane kandi bagahemukira n’imiryango yabo n’igihugu muri rusange.”

Yavuze ko ibiyobyabwenge ari intandaro y’umutekano muke n’inzitizi mu mibereho myiza y’ubikoresha, bityo asaba abaturarwanda kurushaho gukorana n’inzego zishinzwe umutekano bazitungira agatoki aho bakeka ibiyobyabwenge.

Abafashwe n’ibyo bafatanwe birimo udupfunyika tw’urumogi na moto yakoreshejwe mu kurutunda, byashyikirijwe Urwego rw’Ubugenzacyaha (RIB) rukorera kuri sitasiyo ya Busasamana, kugira ngo hakorwe iperereza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza