Nyanza: Akato n’akarengane bakorerwa n’abayobozi bituma bumva ko bakiri ’Abatwa’

Yanditswe na Uwishyaka Jean Louis
Kuya 30 Nzeri 2016 saa 07:36
Yasuwe :
0 0

Abasigajwe inyuma n’amateka batuye mu Murenge wa Cyabakamyi, mu karere ka Nyanza, bavuga ko ubuyobozi bubima amahirwe yo kwiteza imbere, ndetse ngo n’uwo bahaye inka muri gahunda ya Girinka Munyarwanda bahita bayimwaka, ibi ngo bigatuma bumva ko bakiri ‘Abatwa’.

Mukakarangwa Ruth, utuye mu Kagari ka Karama, avuga ko we na bagenzi be basigajwe inyuma n’amateka bagiye gusaba inguzanyo muri gahunda ya ‘VUP’ bakayimwa. Icyashingiweho mu kubima iyi nguzanyo ngo ni uko ari ‘Abatwa’.

Mu kiganiro urubuga rw’abaturage n’abayobozi gitegurwa n’umuryango w’Abanyamakuru baharanira amahoro ‘Paxpress’ cyabereye mu Murenge wa Cyabakamyi tariki ya 8 Nzeri 2016, Mukakarangwa yagize ati “Twagiye kuguza ndi kumwe na bene wacu benshi (abasigajwe inyuma n’amateka) noneho gitifu Suzana aravuga ngo abatwa ntabwo wabaguriza ngo bazishyure."

"Ubundi nigeze kuguza ibihumbi 60 ndayishyura, ubwo ayo ngayo twari tugiye kuguza yari ibihumbi 100. Mbona ko banze kutuguriza kubera ko turi Abatwa, byarambaje cyane. Ukuntu ubuyobozi budufata bituma twumva ko turi abatwa nyine.”

Nk’uko abasigajwe inyuma n’amateka bakomeza babivuga, ngo bahabwa akato muri gahunda zitandukanye ziba zigamije gukura abanyarwanda mu bukene zirimo na ‘Girinka’.

Bucyanayandi Thadée, ati “Hari mwene wacu bahaye Girinka, twari twishimye cyane tuvuga ngo tugiye kunywa amata, abayobozi barimo veterineri witwa Claude, sosiyare (Affaire Sociale) Janvier hamwe n’umuyobozi w’umudugudu witwa Gasinzirwa bayimwaka ihaka, bavuga ngo ntazayishobora kandi nti yari yamunaniye, twese twumvaga tuzajya dufatanya tukayahirira. Hari n’indi nka batwaye mwene wacu witwa Ntakirutimana.”

Nyirabakwiye Marie Chantal, yagize ati “Baratubwiye ngo dukore koperative, bazaduha ingurube tworore twiteze imbere, twubatse ikiraro dutegereza ko baziduha turaheba, ubu hashize imyaka irenga itatu.”

Uwahoze ari Umunyamabanga Nshingwabikorwa w’Akagari ka Karama waje kwimurirwa mu Kagari ka Nyabinyenga, Mukeshimana Suzana, ushinjwa n’aba basigajwe inyuma n’amateka kubabwira nabi, ahakana yivuye inyuma ko adaha akato abasigajwe inyuma n’amateka.

Yagize ati “Uriya mukecuru arambeshyera ntabwo nigeze mutuka. Abasabye kugurizwa muri VUP babaye benshi ugereranyije n’imishinga yagombaga kugurizwa, si we wenyine utaragurijwe. Kuvuga ko namututse ni agahinda kubera ko atari mu bagurijwe.”

Umunyamabanga Nshigwabikorwa w’Umurenge wa Cyabakamyi, Jean Marie Vianney Nkurikiyumukiza, asaba aba baturage kujya bamugezaho ibiba bitabanogeye kugira ngo abafashe kubikemura.

Ati “Ni njyewe uyobora umurenge, ibiro byanjye bihora bifunguye.Umukozi w’Umurenge uzajya abwira umuturage nabi, umuturage yazajya abimenyesha noneho tugakoresha uburyo dusanzwe dukoresha bwo guhwitura umukozi.”

Akomeza avuga ko agiye gukurikirana ikibazo cy’aba basigajwe inyuma n’amateka bavuga ko bahabwa akato, dore ko amaze n’igihe gito ahawe inshingano zo kuyobora uyu Murenge.

Abasigajwe inyuma n'amateka bavuga ko bumva ko bakiri Abatwa bitewe n'akato bahabwa n'abayobozi
Gitifu Ruth ahakana ko atajya aha akato Abasigajwe inyuma n'amateka nkuko babimushinja

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244