Kwamamaza

Nyanza: Aborozi ba Cyabakamyi bakama bahereza abamamyi bagataha amaramasa

Yanditswe kuya 16-09-2016 saa 11:12' na Emma-Marie Umurerwa


Aborozi bo mu Murenge wa Cyabakamyi bavuga ko babangamiwe n’abo bita ‘abamamyi’ baha amata ngo bajye kuyabagurishiriza bagategereza ko babishyura bagaheba.

“Abamamyi bafite ibicuba baraza tukabakamira inka zacu, bakajya kugurisha amata ku modoka i Mpanga, aho kutuzanira amafaranga bakaza batubwira ngo amata yapfuye.”

Iyi ni imvugo ihurizwaho n’aborozi batandukanye bo mu Murenge wa Cyabakamyi, baha amata abayabagurishiriza ntibabishyure, dore ko nta n’amasezerano baba bagiranye y’igihe bazabishyurira.

Nyiranzayino Donatha, avuga ko amaze imyaka itari mike atanga amata muri ubu buryo agategereza ko bamwishyura agaheba.

Ati “Bazana ibicuba nkabuganizamo amata, bakajya no ku rundi rugo bikagenda gutyo. Baba bagomba kunyishyura ari uko nabo bavuye kuyagurisha ku modoka i Mpanda. Amasezerano tugirana ni igipande nsinyaho nkanandikaho litiro batwaye uko zingana. Muri make dukorera ku cyizere gusa.”

Akomeza avuga ko litiro imwe bayigurisha hagati y’amafaranga 140 n’amafaranga 160, bayageza ku bashoramari bakayatangira hagati y’amafaranga 180 na 200.

Bucyensenge Daniel nawe ati “Ikitubabaza ni uko bajyana amata bakagaruka batubwira ngo yapfuye abo ku modoka bayanze kandi wayabahaye amazima, ubwo nyine ukaba ubihombeyemo. Ntibajya banagarura ayo yapfuye ngo tuyabone. Ushobora nko gutanga litiro ijana z’amata mu kwezi bakakwishyura izitageze no kuri 50.”

Uzabumugabo Jean Bosco, ni umwe mu bamamyi, ujyana amata ku modoka avuga ko uru rugendo bakora batwaye amata narwo rushobora gutuma yangirika.

Ati “Kuva inaha kugera aho imodoka ihagarara hari urugendo rw’amasaha atari munsi y’atatu. Iyo ari ku zuba cyangwa mu gihe cy’imvura kugirango uzagezeyo amata akiri mazima ntibyoroshye kubera urugendo rurerure ndetse n’umuhanda mubi. Iyo yapfuye turongera tugakora urugendo rwo kuyagarura.”

Bamwe muri aba bavugwa ko ari bamamyi bavuga ko gukora urugendorurerure bahetse amata mu gicuba cya litiro zisaga 30, bigoye kugira ngo azagere aho imodoka z’abashoramari ziba ziparitse akiri mazima cyangwa ingano yayo itagabanutse, dore ko ngo hari n’igihe bayagezeyo yabogotse (yamenetse).

Umunyamabanga Nshingwabikorwa w’Umurenge wa Cyabakamyi, Jean Marie Vianney Nkurikiyumukiza, avuga ko agiye gukurikirana ikibazo cy’abamamyi batwara amata ntibishyure aborozi.

Yagize ati “Abafite ikibazo cy’abamamyi babambuye bazaze bangezeho icyo kibazo turebe uko twabakurikirana. Icyo tugiye gukora ni ukuganira n’abashoramari ku buryo bazajya bafatira amata inaha umuntu adakoze urugendo rurerure.Ikindi ni uko Akarere katangiye kwagura ikaragiro rya Nyanza ku buryo ryazajya ryakira amata menshi.”

Mu kiganiro n’abanyamakuru cyabaye tariki ya 24 Kanama 2016,Umunyamabanga uhoraho muri Minisiteri y’Ubuhinzi n’Ubworozi, Kayisinga Jean Claude yavuze ko bahagurukiye ikibazo cy’abamamyi, asaba abantu bagurisha amata kuyanyuza mu makusanyirizo.

Umurenge wa Cyabakamyi ni umwe mu Mirenge icyenda igize Akarere ka Nyanza, uvamo umukamo usaga toni ku kwezi. Kutagira umuhanda mwiza uva i Mpanga ugera ku Murenge wa Cyabakamyi no mu bindi bice, ni imwe mu mbogamizi ituma abashoramari bashaka kugura amata bagarukira mu nzira.

Abaturage batuye muri uyu Murenge bifuza ko bafashwa kubona aho amata akusanyirizwa mbere y’uko ajyanywa i Nyanza ku ikaragiro.

umwe mu baturage yemeza ko abamamyi batwara amata ntibabishyure
Umuhanda udakoze neza utuma abaturage babura abashoramari bajya kuzana amata Cyabakamyi

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved