Kwamamaza

Nyanza: Basuzumye impamvu akarere gahora inyuma mu bumwe n’ubwiyunge

Yanditswe kuya 6-09-2016 saa 21:03' na Prudence Kwizera


Abanyamuryango ba FPR Inkotanyi bo mu Murenge wa Busasamana,mu Karere ka Nyanza bateranye basuzumira hamwe impamvu nyamukuru zituma bakomeza gusigara inyuma mu nzira y’Ubumwe n’Ubwiyunge ndetse biyemeza no gushaka umuti ku kibazo cyo kuba mu karere kabo hakiri umubare munini w’abantu bibona mu ndorerwamo y’amoko.

Ni nyuma yuko ubushakashatsi bwakozwe na Komisiyo y’Igihugu y’Ubumwe n’Ubwiyunge mu Rwanda, bwagaragaje ko 32.8% by’abatuye akarere ka Nyanza babona Jenoside ishobora kongera kuba mu Rwanda, ndetse bakanemeza ko hakiri abanyarwanda bibona mu ndorerwamo z’amoko ku ijanisha rya 67.1%.

Muri ubwo bushakashatsi ku mibanire y’Abanyarwanda bwashyizwe ahagaragara mu Ugushyingo 2015, bwagaragaje ko mu Rwanda hose Ubumwe n’Ubwiyunge buri ku kigereranyo cya 92.5% buvuye kuri 82,3% mu 2010.

Nubwo ubushakashatsi bwerekanye ko muri rusange imibanire y’Abanyarwanda ifite icyerekezo cyiza, Akarere ka Nyanza ko kaza inyuma y’utundi turere twose mu kugirira icyizere ibikorwa byose bikorerwa Abanyarwanda birimo kubabanisha neza, politiki, ubutabera, umutekano n’ibindi.

Ibi byatumye abanyamuryango ba FPR Inkotanyi bo mu Murenge wa Busasamana biyemeza kurebera hamwe umuti w’ibi bibazo bigaragara mu karere kabo,mu Nteko Rusange yabahuje ku wa 04 Nzeri 2016.

Umujyanama wa Guverineri w’Intara y’Amajyepfo, Jean Claude Mazimpaka, watanze ikiganiro ku byavuye mu bushakashatsi bwa Komisiyo y’Ubumwe n’Ubwiyunge, yavuze ko kuba Nyanza ikomeza kuza inyuma bihesha isura mbi Intara yose, asaba ko hagomba kugira igikorwa inzitizi zihari zikavanwaho.

Yagize ati “Nyanza ni yo ifite abantu benshi bari kugenda babiba ingengabitekerezo ya Jenoside, murabona ko bari kuri 63.9%, ni ukuvuga ngo Nyanza irimo irasubiza Intara y’Amajyepfo hasi”.

Yakomeje asaba abanyamuryango ba FPR Inkotanyi kuba ku isonga mu gucukumbura igitera ibi bibazo bakagishakira n’umuti urambye.

Mu bitekerezo byatanzwe n’abari bitabiriye iyi Nteko, ku ngingo y’uko Nyanza ifite umubare munini w’abibona mu ndorerwamo y’amoko, hari abavuze ko byaba biterwa n’ubuyobozi ku nzego z’ibanze butegera abaturage ngo bubakemurire ibibazo, by’umwihariko kurangiza imanza zaciwe n’Inkiko Gacaca kuko byavuzwe ko muri aka Karere ari hamwe mu hagaragara umubare munini w’abagizwe incike, imfubyi, abapfakazi na Jenoside yakorewe Abatutsi mu 1994.

Kamikazi yagize ati “Hari abantu benshi bafite intimba mu mitima yabo, baba abapfakazi ndetse n’imfubyi, ntabwo bari kubona abantu baba hafi yabo, ngo babahumurize”.

Abayobozi batunzwe agatoki kuba ba nyirabayazana w’iki kibazo

Umwe mu banyamuryango yagize ati “Nta kuntu waba uzi ko uyobora Akagari cyangwa Umurenge, ngo wa muturage ushaka kugira ngo arebe ko ubuyobozi bubi bwavuyeho koko, abone ko ubuyobozi bwiza bwagiyeho, amare icyumweru afite agakayi ajya gusinyisha urubanza rutari rwacibwa. Ahongaho azavuga ati ’se ibintu bambwiraga urabona atari nka ba bandi bagiye’”.

Aba banyamuryango ba FPR Inkotanyi mu karere ka Nyanza bavuze ko niba umuturage adakemuriwe ikibazo cye agahora asiragizwa, bizatuma atakariza icyizere ubuyobozi n’ubutabera, ibintu bemeza ko byatangiye kugaragara.

Ibitekerezo byinshi byahurije ku kuba abatuye Nyanza batewe ipfunwe n’uko akarere kabo kasigaye inyuma muri gahunda zijyanye n’imibanire myiza, biyemeza ko bagomba gukora ibishoboka byose ubutaha bikaba byakosowe.

Ibyemezo biturwa ku baturage batabimenyeshejwe kimwe mu bituma batakariza icyizere ubuyobozi

Muri iyi Nteko kandi hagaragarijwemo ko ikindi cyaba gituma abaturage batakariza icyizere inzego z’ubuyobozi, iz’ubutabera n’iz’umutekano, ngo ari ibyemezo bifatirwa abaturage batabigizemo uruhare, nko kubimura aho batuye, kubafungira ibikorwa n’ibindi.

Abatanze ibitekerezo kuri iyi ngingo basabye ko ubuyobozi bukuru bw’Igihugu bukwiye kwiga uburyo ibintu byajya bikorwa umuturage adahutajwe, kuko ngo abayobozi ku nzego z’ibanze babwira abaturage ko ibyo bari gukora byaturutse ku nzego zibakuriye.

Julien Ngabonziza ushinzwe imyitwarire muri FPR Inkotanyi ku rwego rw’Intara y’Amajyepfo, yatanze inama ku bayobozi b’inzego z’ibanze ababwira ko bagomba kwegera abaturage kandi bakita ku bibazo byabo kandi bigashakirwa ibisubizo.

Ati “Abayobozi ku nzego z’ibanze nabagira inama yo kumanuka bakegera abaturage, kuko byumvikanye ko batabafitiye icyizere. Kugira ngo babashe kubaremamo icyo cyizere ni uko bakwiye kubegera bakumva ibibazo bafite bakabikemura, noneho abaturage nabo bakumva ko mu mibereho yabo ya buri munsi abayobozi bari kumwe na bo”.

Inteko rusange ya FPR Inkotanyi mu Murenge wa Busasamana yasojwe hemejwe ko buri wese agiye gutanga umusanzu we mu kugaragaza ibishobora kuba inzitizi ku mibanire y’Abanyarwanda no guharanira kubishakira umuti.

Soma inkuru bifitanye isanoAbanye-Nyanza 32.8% bagaragaje impungenge ko Jenoside ishobora kongera kuba mu Rwanda

Abanyamuryango bose basabwe gutanga umusanzu mu gukemura ibibazo bituma Nyanza ihora inyuma
Julien Ngabonziza ushinzwe imyitwarire muri FPR Inkotanyi ku rwego rw’Intara y’Amajyepfo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved