Kwamamaza

Nyanza: Abafite ubumuga banyuze mu nzira y’inzitane ariko bateye imbere

Yanditswe kuya 25-11-2016 saa 14:15' na Prudence Kwizera


Bamwe mu bafite ubumuga bwo kutumva no kutavuga bo mu Karere ka Nyanza, bishyize hamwe muri koperative, aho bakora ibikorwa by’imyuga n’ubukorikori, ku buryo batanga icyizere ko buri wese ashobora kwihangira umurimo kandi akagera ku ntego yo kwiteza imbere.

Uko ari 30 bibumbiye hamwe muri Koperative yitwa ‘Nyanza Worker Force’, ikorera ibikorwa bibyara amafaranga mu kagari ka Nyanza, umurenge wa Busasamana.

Mubyo bakora harimo imbabura, amadirishya y’ibyuma, amafuru atekwamo imigati, kandagira ukarabe, amasanduku, amasafuriya n’ibindi.

Umwe mu bagize iyo koperative witwa Chantal Mukamutari, asobanura amavu n’amavuko ya Koperative yabo, akavuga nicyo bamaze kugeraho. Kuko atabasha kumva cyangwa ngo avuge, yari afite umuntu umufasha gusemura kuko akoresha ururimi rw’amarenga.

Mukamutari avuga ko koperative yabo yatangiye muri Mutarama 2013, aho yatangiranye n’abanyamuryango 10 gusa. Icyo gihe ngo byari ibihe bibakomereye.
Ati “Twatangiye dutoragura ibice by’amabati hirya no hino, ndetse n’ibyuma bishaje bajugunye, tukabibyaza umusaruro”.

Bamaze kugera ku bikorwa bishimishije

Mukamutari avuga ko kuri ubu bamaze kuba abanyamuryango 30, kandi hari byinshi bamaze kugeraho.

Ati “Ubu dusigaye dukora ibintu byinshi, koperative ifite umutungo ushimishije, kuri banki dufite amafaranga angana na 1 838 000, ibikoresho dufite hano bitaragurishwa bifite agaciro ka 4 625 000”.

Yongeraho ko hari ibikoresho bifite agaciro k’amafaranga y’u Rwanda 432 000, bagurishije hirya no hino ariko bakaba batarishyurwa kuko babitanze ku ideni.

Bagaragaza ko bagifite imbogamizi

Abagize iyo Koperative bavuga ko nubwo hari aho bamaze kwigeza, hari zimwe mu mbogamizi bagifite zishobora no gutuma basubira inyuma, bityo bagasaba ko ubuyobozi bwabafasha kuzikuraho.

Imbogamizi ya mbere ni uko inzu bakoreramo bayikodesha amafaranga menshi, bakaba bifuza ko Akarere kabafasha kubona ahantu ho gukorera cyangwa bagahabwa inkunga yo kubaka kuko nabo babasha kwigurira ubutaka bwo kubakaho.

Ikindi ni uko badafite uburyo bwiza bwo kugeza ibicuruzwa byabo ku isoko, bigatuma babigurisha ku giciro gito, bityo bakifuza ko ubuyobozi n’izindi nzego zishinzwe kubareberera zabafasha kubona imodoka yo kujyana ibyo bakora hirya no hino.

Mukamutari ati “Tubona amasoko hirya no hino y’abantu bifuza ko tubakorera ibikoresho bitandukanye, ariko tubura uko tubibagezaho kuko nta modoka yo kubitwara dufite, kandi kuyikodesha birahenze cyane”.

Imbogamizi ya gatatu ni uko iyo bagiye kurangura amabati n’ibindi bikoresho bifashisha mu kazi, haba ubwo babibuze, kuko ababicuruza bakunze kubyihera abadafite ubumuga, kuko bo baba bashoboye kuvugana nabo.

Bavuga kandi ko bafite imbogamizi yo kuba badafite imashini bifashisha mu kazi, bigatuma batabasha guhaza isoko.

Kuri ibi byose hiyongeraho gusaba ko Leta yabegera ikabashakira n’amahugurwa, kuko hari bimwe mu byo bifuza gukora ariko bakaba batabifiteho ubumenyi buhagije.

Bafite intego bihaye muri 2017

Abagize koperative ‘Nyanza Worker Force’ bavuga ko bihaye intego z’ibikorwa bazakora mu mwaka utaha wa 2017, bagamije gutera indi ntambwe mu iterambere,bafasha abandi bafite ubumuga bakabazana muri koperative yabo bakabigisha imyuga.

Biyemeje kandi ko umwaka utaha bazagura ibikorwa byabo bagakora n’ibindi bikoresho birimo ibitanda bigerekeranye bikunze gukoreshwa mu bigo by’amashuri, intebe zigezweho zikoreshwa muri hoteli, ingorofani, inzugi zikomeye kandi nziza n’ibindi.

Icyo ubuyobozi buvuga ku byifuzo byabo

Umuyobozi wungirije ushinzwe iterambere ry’ubukungu mu Karere ka Nyanza, Patric Kajyambere, avuga Koperative ‘Nyanza Worker Force’ bayizi kandi bagiye bayiba hafi buri munsi kugira ngo idasubira inyuma.

Kajyambere avuga ko mubyo bayifashije by’ibanze, harimo amahugurwa ku gucunga umutungo n’imikorere ya Koperative, hakaba hagiye gukurikiraho kubereka uko bakwagura ibikorwa byabo ndetse nuko bakemura ibibazo bafite.

Ati “Ubu intera twari tugezeho ni ukubahuza n’ibigo by’imari kugira ngo babashe kwaka inguzanyo noneho bakore ibikorwa byinshi bishobora guhaza isoko ryabo. Ikindi nk’Akarere twatangiye kujya tubashakira ahari amasoko kugira ngo bajye batanga ibicuruzwa byabo ahantu hazwi”.

Ubwo Ikigo cy’Igihugu cy’Ubushakashatsi n’Iterambere mu byerekeye inganda (NIRDA) cyasuraga iyo Koperative tariki ya 14 Ugushyingo 2016, na cyo cyabijeje ubuvugizi ku bibazo abayigize abafite.

James Kagaba, umukozi muri NIRDA yavuze ko ibibazo byose koperative yabagejejeho bagiye kubikorera ubuvugizi kandi bizeye ko bizakemuka vuba.

Kagaba ati “Ibibazo byabo byose babitugejejeho, ni muri urwo rwego twifashishije inzego zitandukanye zirimo Akarere, WDA na BDF, tugiye gukora ubuvugizi ku buryo barushaho kubegera kugira ngo imishinga bafite n’ibyo basaba byose bashobore kubifashwamo”

Naho ku kijyanye naho gukorera, Kagaba avuga ko bagiye kubijyaho inama n’izindi nzego, bashake uburyo babafasha kubaka.

Kagaba yabijeje kandi ko nyuma yo kubakorera ubuvugizi, azakomeza gukurikirana ko ibibazo byabo biri gukemurwa.

Bamwe mu bagize koperative 'Nyanza Worker Force'
Bimwe mu bikoresho bakora
Itsinda ry'abakozi baturutse mu bigo birimo RDB, BDF , NEP Kora Wigire ubwo basuraga iyi koperative

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved