Nyanza: Ababyeyi basabye Minisiteri y’Uburezi kwisubiraho ku cyemezo yafashe batagishijwe inama

Yanditswe na Prudence Kwizera
Kuya 7 Gashyantare 2018 saa 11:37
Yasuwe :
0 0

Ababyeyi bafite abana biga mu ishuri ry’imyuga n’ubumenyingiro rya Nyanza Technical School (NTS), riherereye mu Karere ka Nyanza basabye Minisiteri y’Uburezi kwisubiraho ku cyemezo yafashe itabagishije inama cyo guhindura iryo shuri iry’abakobwa gusa.

Iryo shuri ryigishirizwamo imyuga irimo ubwubatsi, ububaji, amashanyarazi, ubukanishi, gusudira n’iyindi ryari risanzwe ryigamo abahungu n’abakobwa ariko Minisiteri y’Uburezi iherutse gufata icyemezo ko rigomba kwigamo abakobwa gusa, ibintu bamwe mu babyeyi baharerera batishimiye.

Ubwo itsinda ry’abakozi ba Minisiteri y’Uburezi ryasuraga iryo shuri ku wa 6 Gashyantare 2018, muri gahunda yo kureba ibibazo bihari no gutanga inama ku cyateza imbere ireme ry’uburezi, icyo kibazo cyagarutsweho by’umwihariko.

Rutaganira Bernard, umubyeyi uhagarariye abandi yagize ati “Ikigo cyari icy’abahungu n’abakobwa, nyuma gihinduka icy’abakobwa, […] ababyeyi benshi ntabwo babyishimiye, ariko ntacyo twahinduraho ubwo niko byagenze, ariko iyo muza kutugisha inama ntabwo twari kubemerera”.

Ababyeyi barerera kuri NTS baganiriye na IGIHE bifuje ko Minisiteri y’Uburezi yakwisubiraho ku cyemezo yafashe n’abahungu bakemererwa kongera kwigana na bashiki babo.

Umulisa Velonique ati “Twasabaga ko hakongera kubaho kuvanga abahungu n’abakobwa kuko iyo umwana w’umukobwa ari gukanika n’umuhungu agakanika muri we yiremamo icyizere cy’uko na we ashoboye. Iyo asigaye wenyine hazamo intege nkeya zo gutekereza ngo ‘njyewe ndi umukobwa’ akananirwa guterura, gusudira ariko yafatanyije na musaza ibintu byagenda neza; ni na yo mpamvu twasabye ko hagarurwamo n’abana b’abahungu”.

Ubuyobozi w’ishuri bushyigikiye icyifuzo cy’ababyeyi

Umuyobozi wa NTS, Leonard Manirambona, avuga ko ibyo ababyeyi bavuga bifite ishingiro kuko nyuma y’aho hafashwe icyemezo cyo kuhigishiriza abakobwa gusa babuze abanyeshuri bityo akemeza ko byaba byiza n’abahungu bemerewe.

Ati “Ikigo bavuze ko kigomba kwakira abakobwa gusa kikaba icyitegererezo ku burezi bw’umwuga ku mwana w’umukobwa ariko kugeza ubu turacyakeneye abana 100 kuko ibikorwaremezo turabifite ariko ubwitabire buracyari buke. Icyo dushyigikiye ni uko ubumenyi buhabwa abana bose ku mukobwa bikaba akarusho cyane ko bigaragara ko abakobwa hari amashami batari kwitabira byaba byiza abahungu baje bakigana kugira ngo wa mubare udateza ikibazo”.

Ubuyobozi bw’akarere bwabijeje ubuvuguzi

Umuyobozi w’Akarere ka Nyanza, Erasme Ntazinda, yijeje abo babyeyi ko icyifuzo cyabo bacyakiriye kandi bazakiganiraho n’inzego zibishinzwe kigafatwaho umwanzuro.

Yagize ati “Ikigamijwe ni uko abakobwa baba benshi mu mashuri y’imyuga, twumvikanye ko twazabiganiraho n’ubuyobozi bw’Ikigo cy’Igihugu gishinzwe imyuga n’ubumenyingiro, WDA, tukareba niba abana b’abakobwa bataba benshi bakiyongera koko ariko n’abahungu bakazamo bagafatanya kwiga kuko n’ababyeyi ari byo bifuza”.

WDA yijeje ababyeyi ko icyifuzo cyabo kigiye kwigwaho vuba

Umuyobozi Mukuru wungirije wa WDA ushinzwe amahugurwa, Irené Nsengiyumva, yavuze ko bafashe icyemezo cyo kuhigishiriza abakobwa gusa bagamije kuzamura umubare w’abakobwa biga imyuga ariko icyifuzo cyabo kigiye kwigwaho vuba kigafatwaho umwanzuro.

Nsengiyumva ati “Ubuyobozi bwa WDA bwafashe icyemezo cyo kuzamura imibare y’abakobwa biga imyuga by’umwihariko mu bigo bitanu byo mu gihugu muri gahunda ya HeforShe yo kuzamura imibare y’abakobwa biga imyuga n’ubumenyingiro ikava kuri 17.5% ikagera kuri 50% mu mwaka wa 2020. Ariko tuzabiganiraho icyifuzo cy’ababyeyi cy’uko abana bareranwa na basaza babo gishyirwe mu bikorwa”.

Ishuri ry’imyuga n’ubumenyingiro Nyanza Technical School (NTS), ryatashywe ku mugaragaro mu mwaka wa 2005, kuri ubu ryigamo abakobwa 620 ariko byari biteganyijwe ko hazakirwa abagera kuri 750.

Ababyeyi barerera kuri NTS basabye Minisiteri y’Uburezi kwisubiraho ku cyemezo yafashe batagishijwe inama
Ababyeyi bifuza ko abakobwa biga muri NTS bakwigana na basaza babo
Abakobwa bagaragarije ubuyobozi ko bazi no kuvanga amarangi
Abakobwa biga muri NTS bagaragaje ko bamaze kumenya kubaka
Abanyeshuri biga muri NTS bamuritse ibyo bakora birimo no gukanika
Abanyeshuri bo muri NTS bigishwa n'ikoranabuhanga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza