Nyamirambo: Yafashwe amaze kugurisha telefoni yiregura avuga ko yarozwe kwiba

Yanditswe na Ishimwe Israel
Kuya 4 Ukwakira 2016 saa 07:47
Yasuwe : XX
0

Umukobwa utuye mu Murenge wa Rwezamenyo mu Karere ka Nyarugenge yafashwe agurisha telefone ebyiri yari amaze kwiba, mu kwisobanura avuga ko bamuroze kwiba.

Uyu mukobwa w’imyaka 19 usanzwe akora akazi ko kumesera abantu imyenda abasanze mu ngo zabo, yafashwe kuri uyu wa Mbere tariki ya 3 Ukwakira 2016 ahagana saa sita n’igice z’amanywa, amaze kwiba amafaranga ibihumbi 20 no kugurisha telefone ebyiri zo mu bwoko bwa Tecno za Uwitonze Delphine wari wamuhaye ikiraka cyo kumukorera isuku aho atuye.

Abamubonye bavuga ko yafatiwe ahitwa kwa Mutwe i Nyamirambo akimara kugurisha telefone ebyiri yari amaze kwiba. Nyuma yo gufatwa yahise asaba imbabazi Uwitonze Delphine yari amaze kwiba amubwira ko yananiwe kureka ingeso yo kwiba ngo kuko ari ibintu bamuroze.

Yagize ati “ Njye mbabarira rwose kuko nakwibye ibihumbi 20 byawe na telefone ebyiri ariko nahise nzigurisha ibihumbi 10. Gusa icyo ukwiye kumenya ni uko ntiba kuko mbikunze ahubwo ni uko ari ibintu bandoze bitewe n’uko mpora nshaka kubireka ariko bikanga kumvamo.”

Itegeko rivuga ko uwibye ibintu bifite agaciro kari munsi ya miliyoni eshanu, ikibazo cye kigomba gukemukira mu bunzi aho kujya mu nkiko.

Uwitonze Delphine we yabwiye IGIHE ko yifuza ko uyu mukobwa amwishyura telefoni ze ebyiri ngo kuko nta handi hantu ashobora kuzikura.

Yagize ati “ Niba barabikuroze uramaze,gusa icyo njye nshaka ni telefoni zanjye kuko nazibonye binduhije. Ese ubundi ni gute ugurisha telefoni z’ibihumbi 45 amafaranga ibihumbi 6 koko?”

Yakomeje avuga ko yababajwe cyane n’uburyo uyu mukobwa yamwibye kandi yari yamuhaye akazi kugira ngo amufashe kubona amafaranga yo kugura ibiryo kuko yari yamubwiye ko amaze iminsi ibiri atarya.

Uyu mukobwa yahise atanga amafaranga ibihumbi 20 yari yibye ndetse ajyanwa kuri Sitasiyo ya polisi ya Nyamirambo ngo akurikiranwe.

Uyu mukobwa akimara gufatanwa telefoni
Umukobwa wafatanywe telefoni yavuze ko yarozwe kwiba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza