Kwamamaza

Nyamasheke: Imyaka itatu irashize Abarokotse Jenoside baba mu nzu zangiritse

Yanditswe kuya 10-10-2016 saa 09:07' na Ndoli Sitio


Abarokotse Jenoside yakorewe Abatutsi muri Mata 1994 bo mu Murenge wa Bushenge, Akarere ka Nyamasheke, bavuga ko bafite impungenge z’inzu batuyemo bitewe n’uko imbere hazo hangiritse batari bazijyamo, bagasaba ubuyobozi kuzibasanira.

Inzu 55 zubatswe n’inkeragutabara muri 2013 zubakiwe Abarokotse Jenoside muri aka Karere. Gusa muri zo 18 ziherereye mu Murenge wa Bushenge, ngo ntizubatse neza kuko zigenda zisenyuka imbere, ibikuta byazo bihanukira abazirimo, ibintu bibatera impungenge ko zishobora kuzabagwaho mu gihe nta cyaba gikozwe ngo zisanwe.

Mukagasana Fausta ati “Inzu banyubakiye yarangiritse cyane, impande zose, nyibamo uruhande rumwe, none mukwiye kuba mwakongera mukagira ikintu mwamfasha kuko nta bushobozi mfite.”

Mariana Bungwanubusa yunzemo ati “Nta bindi bibazo uretse ko bazihomye zitumye bikagenda bihomoka, impungenge ni uko haza umutingito umuntu akikanga ibi by’imbere biri kumugwaho.”

Aba baturage bavuga ko bajya muri izi nzu zari zaratangiye kwangirika, ariko ngo bitewe n’uko bari mu buzima bwo gucumbika, bapfuye kuzijyamo uko zari zimeze.

Bagirishya Jean Marie Vianney, uhagarariye IBUKA mu Karere ka Nyamasheke, avuga ko nabo izi nzu bazigezeho bagasanga zitameze nkuko zagombaga kubakwa kuko bigaragara ko zasenyutse.

Yagize ati “Mu karere kacu hari hagenwe inzu 55 ariko muri izo nzu izabonetseho ibibazo, ni izo mu Murenge wa Bushenge. Zamaze kubakwa bamaze kuzimurika, tuzigezeho dusanga inzu zaratangiye gusenyuka, biba ngombwa rero ko duhuruza tuvugana n’akarere n’inkeragutabara (Reserve Force) zari zayubatse, batubwira ko bagiye kuzisenya bakongera kubaka bundi bushya ariko kugeza ubu ntabwo zari zubakwa .”

Pierre Celestin Habiyaremye, Umunyamabanga Nshingwabikorwa w’akarere ka Nyamasheke, avuga ko izi nzu zubatswe nabi ariko ko bari kuganira n’ubuyobozi bw’Inkeragutabara kugira ngo bashakire hamwe umuti w’iki kibazo.

Ati “Bazihomye igihe cyo kuzihoma kitaragera bituma n’indi mirimo yose yakurikiyeho itagira agaciro kuko inzu y’ibiti uyihomye itaruma ejo ukayitera umucanga, nyuma y’igihe wa mucanga wose uvaho. N’ubundi tukaba turi mu biganiro n’urwego rwa Leta rudufasha gushyira mu bikorwa iyi gahunda, duteganya kugirana inama na bo ku buryo byakosorwa niba inzu yakongera igasenywa cyangwa se ikaba yavugururwa, biraterwa n’ibiganiro turi kugirana nabo.”

Buri nzu yagombaga kubakwa n’amafaranga angana na miliyoni 4 n’ibihumbi 400, ariko nyuma yo kugaragaza ibibazo byo gusenyuka, akarere kafashe umwanzuro wo kuba karetse kwishyura abazubatse amafaranga yose agera kuri miliyoni 350 z’amanyarwanda.

Izi nzu ngo zatangiye kwangirika ba nyira zo batarazijyamo
Abazituyemo bavuga ko umutingito wongeye kugaruka utabasiga amahoro
Iyo uzirebeye inyuma ntiwakeka ko imbere zasenyutse bikabije

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved