00:00:00 IGIHE NETWORK KN KINYARWANDA EN ENGLISH FR FRANCAIS

Nyamasheke: Abihayimana bitandukanyije n’abitwaza Bibiliya bakica amabwiriza yo kwirinda Covid-19

Yanditswe na Sitio Ndoli
Kuya 9 Nyakanga 2021 saa 09:33
Yasuwe :
0 0

Abihayimana bo mu Karere ka Nyamasheke basabye abihisha inyuma y’ibyanditswe muri Bibiliya bakanga kubahiriza amabwiriza yo kwirinda Covid-19. Bavuze ko bagomba guhindura imyumvire babyanga bagahanwa n’amategeko.

Kuri ubu hari abantu bane bari ku kigo cyakira inzererezi cy’Akarere ka Nyamasheke bafashwe banze kwambara agapfukamunwa kubera imyemerere yabo. Aba kandi biyongera ku bandi benshi barimo abanyeshuri n’umwarimu wasezeye ku kazi ke yanze kubahiriza amabwiriza yo kwirinda Covid-19.

Nshimiye Schadrack wigishaga ku Ishuri ribanza rya Binogo mu Murenge wa Macuba yavuze ko yasezeye akazi kuko yabonaga amabwiriza yo kwirinda Covid-19 atajyanye n’imyemerere ye.

Yagize ati “Ndasezera ku kazi, ni ko bimeze [kwirinda Covid-19] bihabanye no kwemera kwanjye na Bibiliya. Gukaraba intoki ndabikora cyane, mbikora ku mudendezo wanjye nta gahato ni Bibiliya nemera”.

Mu mahugurwa y’umunsi umwe, Umuryango wa Gikirisitu World Relief wagiranye n’abihayimana bo muri aka karere, bamaganye abihisha inyuma y’ijambo ry’Imana bakanga kwirinda iki cyorezo.

Pasiteri Akumuntu Félicien wo mu Itorero Methodiste Libre rikorera mu Murenge wa Ruharambuga yagize ati “Barahari cyane cyane mu Mirenge ya Mahembe bavuga ko kwambara agapfukamunwa ari ibimenyetso by’imperuka. Twebwe ntabwo ibyo tubiha agaciro kuko ni virusi bapima bakayibona.”

“Dushishikariza abakirisitu bacu kwirinda. Ibyorezo byahozeho na kera, iyo mirongo baba bayisomye nabi.”

Padiri Nshimiyana Alex wo muri Kiliziya Gatolika muri Paruwasi ya Nyamasheke akaba anahagarariye Ihuriro ry’Amadini n’Amatorero mu Karere, yavuze ko abatubahiriza amabwiriza yo kwirinda Covid-19 babigisha ariko ababirengaho bakwiriye kubihanirwa n’amategeko.

Yagize ati “Bigaragara ko ari abigumura ku madini yabo ndetse bakigumura no ku byemezo ubuyobozi bwafashe byo kurinda abaturage. Twafatanya kubigisha ndetse abadashaka kumva bakaba babihanirwa nkuko amategeko abiteganya.”

Yakomeje agira ati “Ibyo bakora bashaka kwishingikiriza imirongo imwe n’imwe ya Bibiliya ariko icyagaragaye ni uko baba bayumvise nabi. Bibiliya buriya ni inyanja ngari umuntu ashobora kuyisobanura uko yishakiye akayivugisha ibyo itavuga. Ijambo ry’Imana icyo rigamije ni ukurengera ubuzima bw’abantu, ikintu rero cyarwanya ingamba zari zije zifasha abantu kurengera ubuzima urumva ko kitaba gihuye na Bibiliya.”

Imibare y’abanduye Covid-19 ikomeje kwiyongera mu bice byose by’igihugu, abaturage bakaba bashishikarizwa gukomeza kubahiriza amabwiriza yashyizweho yo kwirinda.

Abihayimana bo mu Karere ka Nyamasheke bamaganye abihisha inyuma ya Bibiliya bakanga kumvira amabwiriza yo kwirinda Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .