Kwamamaza

Nyamasheke:Abana bata ishuri bakurikiye ubugari bahabwa n’abarobyi

Yanditswe kuya 9-09-2016 saa 11:42' na Sitio Ndoli


Ababyeyi bo mu Murenge wa Kagano mu Karere ka Nyamasheke, bavuga ko bahangayikishijwe n’abana babo bata ishuri bakurikiye ibiribwa bahabwa n’abarobyi bo muri aka gace.

Ubusanzwe abarobyi batekera bakanarira hafi y’aho bakorera, bamwe mu bana bo mu miryango itishoboye bakaba babayoboka bakabafasha imirimo na bo bakabagaburira.

Iyo ugeze ku mwaro w’Ikiyaga cya Kivu ahazwi nko ku Murwa, uhasanga abana benshi bari gusangira n’abarobyi ubugari n’isambaza nka kimwe mu biribwa bihiganje.

Aba bana bavuga ko impamvu bata ishuri ari ubukene butuma baza gushaka ibyo kurya bahabwa babanje gufasha abarobyi gutwara isambaza.

Niyonkuru Jean Baptiste, umwe mu bana twahasanze wiga mu mwaka wa gatatu w’amashuri abanza yagize ati “Nari nagiye mu murima mpita nza hano ku Kivu kurya ku bugari, urumva sinajya ku ishuri kandi mfite inzara.”

Munezero Aimé yavuze ko yari yaje gushaka akazi kugira ngo abashe kubona ibikoresho by’ibanze akeneye.

Ati “Ubu njye mba naje gushakisha akazi nkikorera indagara hano bakampemba, nkigurira isabune.Haba harimo n’abaje kurya ubugari, nk’aba bose ubona hano.”

Bamwe mu babyeyi bo muri aka gace bavuga ko bahangayikishijwe n’ejo hazaza h’aba bana bareka ishuri bakaza kwirirwa ku Kivu.

Nyirabimenyimana Adeline ati “ Aba bana benshi baba ari imfubyi cyangwa abakene wenda badashobora kubona n’ikayi bajyana kwiga, bakaza kwisabira abashyana (abarobyi) ubugari. Twishimira ko aba bana bakwiga, batagiye ku ishuri urumva kiba ari ikibazo kidukomereye kuko bavamo ibisambo cyangwa indara.Ubuyobozi bwari bukwiriye kuza kubashaka.”

Siborurema Jean yunzemo ati “ Baba baje kurya ku bugari ariko nkatwe b’ababyeyi ntabwo tubyishimira kuko burabararura bakirirwa hano bazerera ndetse baroba.”

Kamali Aimé Fabien, Umuyobozi w’akarere ka Nyamasheke, avuga ko abana bose babakuye mu Kivu ariko ngo biramutse byongeye kuba cyaba ari ikibazo bagiye gukurikirana bakagifatira ingamba.

Ati “Kugeza ubu abana bose twabakuye ku Kivu, n’umuntu tubasanganye turamuhana. Biramutse byabayeho rero cyaba ari ikibazo gikomeye.Ubwo natwe turajya gukurikirana nk’uko wagiyeyo ukabibona, duhite dufata ingamba zihamye kandi zatuma abana b’abanyarwanda babaho mu buryo bukwiriye.”

Mu karere ka Nyamasheke abana 5181 mu bihembwe bibiri by’uyu mwaka wa 2016 bataye ishuri benshi muri bo ubasanga ku kiyaga cya Kivu no mu mirima y’icyayi.

Abangana na 3801 ni abo mu mashuri abanza mu gihe 1380 ari abo mu yisumbuye nk’uko bitangazwa n’ubuyobozi bushinzwe uburezi mu Karere ka Nyamasheke.

Abana bari kugabana ubugari bahawe n'abarobyi
Hari abana usanga bari kumwe n'abarobyi ku Kiyaga batagiye kwiga

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved