00:00:00 IGIHE NETWORK KN KINYARWANDA EN ENGLISH FR FRANCAIS

Nyamasheke: Abahinzi b’icyayi barataka kwamburwa n’akarere

Yanditswe na Mukahirwa Diane
Kuya 7 Nzeri 2021 saa 12:29
Yasuwe :
0 0

Abanyamuryango ba Koperative COTEGA y’abahinzi b’icyayi bo mu Murenge wa Karambi mu Karere ka Nyamasheke, baravuga ko batunguwe no kwakwa n’akarere ibikorwa byubatswe mu migabane yabo.

Iyi koperative igizwe n’abanyamuryango basaga ibihumbi bitatu bakoze iyo bwabaga ngo bagire ibikorwa bibateza imbere aho buri wese yatanze umusanzu w’ibihumbi 30 Frw bubaka Ikigo Nderabuzima n’ikigo cy’imari (SACCO).

Ibi bikorwa byavuye mu migabane yabo bumvaga nibitangira gukora bizababyarira inyungu ariko batunguwe no kubyakwa n’akarere mu buryo batasobanukiwe.

Bamwe mu banyamuryango baganiriye na Radio1 bavuze ko bari biteguye ko ibikorwa bakoze bizababyarira inyungu.

Umwe yagize ati “Twari abanyamuryango 3 150, buri wese agenda atanga umusanzu w’ibihumbi 30, tumaze kubaka Ikigo Nderabuzima haza kuzamo abaganga turangije abanyamuryango ntitwamenye uko cyagiye.”

“Tuza kubaka SACCO barangije bayihereza umushoramari, baravuga ngo ifite ubuzima gatozi. Ivuriro ryaragiye na SACCO ntitwigeze tumenyeshwa uko byagiye, twumvise bavuga ngo ntitugishoboye guhemba abakozi.”

Undi yagize ati “Batwambura ibyacu bakoresheje ubwenge, ni kumwe bavuga ngo ushaka kwambura umwana inkoko amupfumbatisha ikibiribiri.”

“Twari dufitemo imbangukiragutabara umubyeyi yaba yabyaye cyangwa umurwayi ikamwihutana ikamugeza kwa muganga. Ubu iboneka iva i Kibogora kandi ni kure. Akarere kashatse kutunyaga ngo inyungu zose twashoyemo zibe izabo banga guhemba abakozi ngo bikunde bitunanire.”

Ku ruhande rw’Umuyobozi w’Akarere ka Nyamasheke, Mukamasabo Appolonie, yavuze ko akarere katabambuye ahubwo iyi koperative yakoresheje amafaranga yabo nabi.

Yagize ati “Habayeho uburyo abanyamuryango bakoresha amafaranga navuga ngo ni nabi ariko bwari uburyo bwo kugira ngo bifashe. Babanje kubaka ikigo nderabuzima ngo bajye bivuriza hafi, barangije bubaka na banki.”

“Ibyo ni byo byabateye igihombo bituma imikoreshereze y’amafaranga itagenda neza. Ntabwo ari ukubagora ahubwo ni uburyo bwo kugira ngo dufatanye umunsi ku wundi, niba hari ibibazo bagize ntabwo batubwiye ariko ubuyobozi buba buhari ngo dufashe abaturage. Ntabwo twabambuye tuzabegera tubifatanye.”

Abanyamuryango ba Koperative COTEGA ntibumva uburyo akarere kari kubona inyungu ari bo bashoye
Bamwe mu banyamuryango bavuze ko bari bazi ko ibi bikorwa bizababyarira inyungu none biri kuziha akarere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .