Kwamamaza

Nyamagabe:Umushinga GHDF watanze urufunguzo rw’ubuzima ku rubyiruko rw’impunzi

Yanditswe kuya 24-09-2016 saa 19:10' na Prudence Kwizera


Abasore n’inkumi bagera ku 105 b’impunzi z’Abanyekongo zicumbitse mu nkambi ya Kigeme mu karere ka Nyamagabe zivuga ko zishimira kuba umushinga Global Humanitarian and Development Foundation (GHDF) ku bufatanya na Ambasade ya Leta Zunze Ubumwe za Amerika barabatekerejeho bakabigisha imyuga itandukanye ibafasha gutegura ubuzima bwiza bw’ejo hazaza.

Uru rubyiruko rukaba rwarigishijwe imyuga irimo kudoda imyenda, gukora amasabune ndetse no gukoresha ikoranabuhanga, hakiyongeraho no kwizigama binyuze mu matsinda.

Ubwo abasoje amasomo bari mu birori byo guhabwa inyemezabumenyi kuri uyu wa 23 Nzeri 2016, bagaragaje ko ibyo bize ari urufunguzo rw’ubuzima kuri bo.

Innocent Nsengiyumva umwe muri bo yavuze ko bari babayeho ntacyo gukora bafite, umushinga GHDF urabagoboka, bityo biyemeje kubyaza umusaruro amahirwe babonye.

Nsengiyumva ati“Batwigishije byinshi byiza, kuko usibye kuba tuzi kudoda imyenda abandi bakaba bazi gukora isabune, batwigishije no kwibumbira hamwe mumatsinda,ubu tukaba twizigama tukanagurizanya.Ndahamya ntashidikanya ko ibyo twungutse tuzabibyaza umusaruro dukomeza kwiteza imbere, kandi natwe tuzabitoza barumuna bacu”.

Umuyobozi mukuru wa GHDF, Patrick Karangwa yasobanuye ko uyu mushinga wabo ugamije guha ubumenyi urubyiruko rw’impunzi kugira ngo ruzabashe kwifasha mu buzima aho gutegereza inkunga gusa.

Karangwa ati “Dusanzwe dukorera mu nkambi ibikorwa bitandukanye, ariko muri 2015 nibwo twabonye inkunga yatanzwe na Julia Taft Fund ivuye muri Ambasade y’Abanyamerika, kugira ngo dufashe impunzi cyane cyane urubyiruko rufite imyaka 15 kugeza kuri 35, tubahe ubumenyi bushingiye ku gukora imyuga ndetse n’ikoranabuhanga. Mwabonye ibikorwa bitandukanye bakora ndetse n’ibikorwa by’ubucuruzi batangiye gukora kuva umushinga utangiye gukorana nabo”.

Yakomeje avuga ko icyiciro cya mbere cyo kwigisha uru rubyiruko ari nacyo gikomeye gisojwe, hakaba hagiye gukurikiraho kubakorera ubuvugizi ku miryango n’ibigo bifitanye isano n’ibyo bize, kugira ngo babone ibiraka bashyire mu ngiro ibyo bize, babone n’amafaranga.

Uwari uhagarariye Ambasade ya Amerika mu Rwanda, Jimmy Aguirre (Acting Deputy Chief of Mission) yashimiye umushinga GHDF ko washize mu ngiro ibyo basezeranye ubwo wabateraga inkunga kandi ngo byakozwe neza.

Yashimiye Leta y’u Rwanda ndetse na MIDIMAR uburyo bita ku mibereho y’impunzi, abizeza ko Leta Zunze Ubumwe za Amerika izakomeza kubatera inkunga igihe cyose bishoboka.

Yagize ati “Twishimiye uburyo GHDF yakoze neza ibyo twari twasezeranye kuko aba bana bahawe ubumenyi biragaragara, Leta Zunze Ubumwe za Amerika izakomeza gukorana namwe ndetse na MIDIMAR kuko mukora ibikorwa byiza byo kwita ku mpunzi”.

Uwari uhagarariye Ambasade ya Amerika mu Rwanda, Jimmy Aguirre (Acting Deputy Chief of Mission) yashimiye umushinga GHDF ko washize mu ngiro ibyo basezeranye

Minisitiri ufite mu nshingano ze gucyura impunzi no gukumira ibiza,Seraphine Mukantabana, na we wari witabiriye ibi birori, yashimiye umushinga GHDF na Ambasade ya Amerika, avuga ko ibyo bakoze biri muri gahunda za Guverinoma y’u Rwanda yo gutoza abantu kwigira.

Ati “Nk’uko babivuga aho guhora uha umuntu ifi wamwigisha kuyirobera, murabona ko uyu mushinga wafashije aba bana kwiga ubafasha no kubaha ibikoresho by’ibanze kugira ngo bakore bimwe berekanye. Ibi bikaba bigaragaza ko impunzi nazo aho kuba umutwaro ku gihugu, ko bashoboye kuba ingufu bakaba imbaraga bagashobora gutsura amajyambere”.

GHDF ni umuryango umaze imyaka 16 uvutse, ukaba waratangiye gukorera mu nkambi ya Kigeme mu mwaka wa 2012,aho watangiriye ku gikorwa cyo kugeza ibiryo ku mpunzi.

Usibye ibikorwa byo kwigisha urubyiruko rw’impunzi, mu mwaka wa 2012 uyu muryango GHDF watangiye kunganira umuryango mpuzamahanga wita ku mpunzi (HCR) mu gikorwa cyo gukwirakwiza amazi, isuku n’isukura.

Uretse inkambi y’impunzi ya Kigeme,GHDF yunganira UNHCR mu nkambi ya Mahama, mu nkambi z’agateganyo za Nyanza, Gashora na Gatore.

Inkambi ya Kigeme icumbikiye impunzi z’Abanyekongo zikabakaba ibihumbi 20, abenshi bakaba ari urubyiruko.

Abarangije amasomo yabo bahabwa inyezabumenyi
Jimmy Aguirre (Acting Deputy Chief of Mission) mu gikorwa cyo gutanga inyemezabumenyi
Minisitiri Mukantabana mu gikorwa cyo gutanga inyemezabumenyi ku basoje amasomo yabo
Bamwe mu bakurikiranye iki gikorwa
Urubyiruko rwagaragaje ko rwishimiye ubumenyi buzababera urufunguzo rw'ubuzima
Abasoje amasomo bagaragaje ko bafite ubumenyi bwo gukora ibintu bitandukanye
Minisitiri ufite mu nshingano ze gucyura impunzi no gukumira ibiza,Seraphine Mukantabana asura bimwe mu bikorwa by'urubyiruko

Amafoto:Kazungu Armand


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved