Kwamamaza

Kitabi Tea Factory yashimiwe uruhare mu bikorwa biteza imbere abaturage

Yanditswe kuya 15-10-2016 saa 09:36' na Kwizera Prudence


Ubuyobozi bw’Akarere ka Nyamagabe bwashimiye uruganda ruhinga rukanatunganya icyayi (Kitabi Tea Factory) ko ari umufatanyabikorwa mwiza winjira muri gahunda nziza zo guteza imbere abaturage kandi akabishyira mu bikorwa ku rwego rwifuzwa.

Byagarutsweho kuri uyu wa Gatanu, tariki ya 14 Ukwakira 2016, ubwo hatahwaga ku mugaragaro ibikorwa birimo amazi meza n’ingemwe z’imbuto y’icyayi byagenewe abaturage biturutse kuri uru ruganda n’abafatanyabikorwa barwo barimo Ikompanyi yo mu Bwongereza irangura icyayi ikanagicuruza yitwa Tea Taylor’s of Harrogate.

Umunyamabanga Nshingwabikorwa w’Akarere ka Nyamagabe, Jean Pierre Nshimiyimana yavuze ko ibikorwa bya Kitabi Tea Factory ari bimwe mu bifasha Akarere kwesa imihigo kiyemeje yo guteza imbere abaturage.

Yagize ati “Ndagira ngo nshimire uruganda ‘Kitabi Tea Factory’ ndetse na Rwanda Mountain Tea kuko ibikorwa bakora nk’iki cyo kugeza amazi meza ku baturage ndetse no kubaha ingemwe, byinjira muri gahunda zisanzwe zo guteza imbere abaturage bacu, kuko amazi ni ubuzima atuma haba ubuzima bwiza”.

Amazi meza yahawe abaturage bo mu Mudugudu w’Uwurunazi n’uw’Uwabumenyi afite ubushobozi bwo guhaza imiryango 350 igizwe n’abantu basaga igihumbi.

Naho ingemwe z’icyayi zagenewe abahinzi zigera kuri miliyoni n’ibihumbi magana atanu, zikaba zizahingwa kuri hegitari zisaga 100, ndetse n’abahinzi bafite icyayi gishaje bazahabwa ingemwe nshya zo gutera, kugira ngo bagure ubuhinzi bwabo babone amafaranga, kuko ubusanzwe agace batuyemo ahanini keramo icyayi gusa, kubera ubutaka bwaho busharira.

Umuyobozi wa Kitabi Tea Factory, Jean H. Mutabazi, avuga ko nk’uruganda bahisemo gukorana neza n’abahinzi b’icyayi, kubafasha guhinga kinyamwuga, ndetse no kubagezaho ibikorwa by’amajyambere.

Ati “Hari ibikorwa byinshi tugeza ku bahinzi b’icyayi, icya mbere ni iki cyo gutubura ingemwe kugira ngo bagure ubuso bahingaho, ikindi ni ukubagezaho amazi meza ndetse no kubaha inka zo korora kugira ngo biteze imbere kandi babone akamaro ko guhinga icyayi.”

Kugeza ubu uruganda Kitabi Tea Factory rumaze guha abahinzi inka zigera kuri 50, kandi zimwe zamaze no kubyara ku buryo bagenda boroza n’abandi.

Ubusanzwe Kitabi Tea Factory ni rumwe mu nganda esheshatu za Rwanda Mountain Tea Ltd zihinga zikanatunganya icyayi. Uruganda rwa Kitabi rukaba rukunze kuza mu nganda za mbere zigira icyayi kiryoshye kandi gikunzwe ku masoko yo mu Rwanda, muri Afurika no mu bindi bihugu byo hakurya y’amazi magari.

Abahinzi b’icyayi bahawe umukoro uzabageza ku iterambere rirambye

Nyuma yo kugezwaho ibikorwa birimo amazi meza hafi yabo, ndetse n’ingemwe z’icyayi bazatera, abahinzi b’icyayi bo mu Mirenge ya Kitabi, Tare n’Uwinkingi mu Karere ka Nyamagabe, bagaragaje ibyishimo, ariko ubuyobozi bwa Rwanda Mountain Tea bubaha umukoro uzabageza ku iterambere rirambye.

Niyibizi Bonaventure wari uhagarariye Rwanda Mountain Tea Ltd yasabye abahinzi b’icyayi gufata neza ibikorwa bagezwaho no kubibyaza umusaruro kuko aribyo bizabageza ku iterambere rirambye.

Yagize ati “Aya mazi muyafate neza, mugire isuku muri byose, ku mubiri no mu rugo kuko kugira ubuzima bwiza nibyo by’ibanze kandi nibwo muzagera ku iterambere rirambye. Mwitabire guhinga icyayi mubone amafaranga kandi ibikorwa nk’ibi mujye mubifata neza abana n’abuzukuru banyu bazaze babisanga.”

Abahinzi barabyinira ku rukoma

Bamwe mu bahinzi b’icyayi bo mu Mirenge ya Tare, Kitabi n’Uwinkingi baganiriye na IGIHE, bavuga ko kuva batangira gukorana na Kitabi Tea Factory, inyungu bakura mu cyayi yiyongereye kuko bagezwaho n’ibindi bikorwa by’iterambere.

Umwe muri bo witwa Violette Musabyimana yagize ati “Bampaye inka ku buryo mbona ifumbire ndetse n’abana bakanywa amata. None batuzaniye n’amazi meza, mbese ndabona ari iterambere gusa. Icyo ngiye gukora ni ugukomeza guhinga icyayi ku bwinshi”.

Umuterankunga yashimye imikorere y’uruganda yizeza gukomeza ubufatanye

Ian Brabbin, Umuyobozi w’Ikompanyi yitwa Tea Taylor’s of Harrogate ikorera mu Bwongereza, ikaba n’umuterankunga n’umuguzi w’icyayi cya Kitabi yavuze ko yishimira uburyo imikoranire yabo na Kitabi Tea Factory igenda irushaho kuba myiza, yizeza ko bazakomeza ubufatanye, by’umwihariko mu guteza imbere abahinzi.

Ati “Kitabi ni ahantu hakomeye cyane kuri twe kuko icyayi cyaho ni kimwe mu bya mbere bikunzwe ku Isi, kandi cyiza cyane. Bityo rero tukaba tubona imikoranire yacu itagomba kugarukira gusa ku kugura icyayi, ahubwo dufatanya no mu bikorwa byo guteza imbere abahinzi nko kubagezaho amazi meza n’ibindi, kandi ndabizeza ko bizakomeza”.

Kitabi Tea Factory ni uruganda ruhinga rukanatunganya icyayi, ruherereye mu Mudugudu wa Kintobo, Akagari ka Kagano, Umurenge wa Kitabi, mu Karere ka Nyamagabe. Ruhinga icyayi ku buso bugera kuri hegitari 950, naho abaturage bakorana narwo nabo bagahinga kuri hegitari zigera kuri 900.

Buri mwaka Kitabi Tea Factory ishyira ku isoko ibiro by’icyayi bigera kuri miliyoni ebyiri. Intego akaba ari ukongera umusaruro ariko bikajyana no gukomeza kucyitaho ngo kigumane isura nziza n’uburyohe gifite byishimirwa n’abanywi bacyo.

Bataha ku mugaragaro ivomero bubakiwe n'uruganda rw'icyayi(Kitabi Tea Factory) mu Karere ka Nyamagabe
Umuyobozi wa Kitabi Tea Factory, Jean H. Mutabazi ashimangira ko bahisemo gukorana n'abahinzi b'icyayi
Umuyobozi wa Kitabi Tea Factory, Jean H. Mutabazi na Ian Brabbin, uyobora ikompanyi yitwa Tea Taylor’s of Harrogate ikorera mu Bwongereza
Bamwe mu bakozi ba Kitabi Tea Factory
Umuyobozi wari uhagarariye Rwanda Mountain Tea Ltd, Niyibizi Bonaventure(iburyo) mu muhango wo kumurika ibikorwa Kitabi Tea Factory yateyemo inkunga abaturage bo muri Nyamagabe
Umuyobozi wa Tea Taylor’s of Harrogate ikorera mu Bwongereza, Ian Brabbin ,amurika imishinga itandukanye bakoranye n'uruganda rwa Kitabi Tea Factory
Ingemwe zisaga miliyoni imwe n'igice z'icyayi giteganyijwe guhingwa
Ahumukirizwa icyayi mu ruganda rwa Kitabi Tea Factory
Ibigega bibikwamo icyayi

Amafoto: Mahoro Luqman

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved