Kwamamaza

Nyamagabe:Asaga miliyoni 500 yashowe mu bikorwa byo kuhira imyaka imusozi

Yanditswe kuya 25-10-2016 saa 18:41' na Ntakirutimana Deus


Akarere ka Nyamagabe n’abafatanyabikorwa bako batandukanye bahagurukiye igikorwa cyo kongera umusaruro no mu gihe cy’izuba biciye mu kuhira imyaka bifashishije ibigega bifata amazi y’imvura.

Ni muri urwo rwego, mu mirenge itandukanye yako hubatswe ibigega bifata amazi y’imvura n’ibyobo bifata amazi, cyangwa ingomero(dams), biri munsi y’ubutaka no hejuru yabwo byifashishwa mu kubika amazi ndetse no kuyuhira imyaka.

Ibyo bigega byubatswe mu Murenge wa Cyanika mu karere ka Nyamagabe. Ingomero zubatswe mu Murenge wa Tare zifashishwa mu kuhira imyaka ihinze mu materasi ari ku buso bwa hegitari 12 yatunganyijwe n’akarere ka Nyamagabe.Urugomero rwakira amazi ya meterokibe 250 yifashishwa mu kuhira hegitari imwe.

Mu Murenge wa Cyanika hubatswe ibigega 250 byahawe abaturage, bikaba bifasha abaturage mu kubona amazi yo mu rugo, bifashisha mu mirimo ya buri munsi no kuvomerera imirima yabo.

Ibyo bigega byubatswe n’umushinga Trocaire, mu rwego rwo gufasha abaturage guhangana n’ingaruka z’imihindagurikire y’ikirere.

Umuyobozi wa Trocaire mu Rwanda, Dony Mazingaizo, yavuze ko bakoze ibyo bikorwa mu rwego rwo gufasha abaturage kugira uruhare mu bikorwa bigamije guhangana n’ingaruka z’imihindagurikire y’ibihe.

Mazingaizo yavuze ko bazakomeza kunoza ibyo bikorwa, birimo guha abaturage amazi abafasha mu buzima bwa buri munsi, ndetse no kongera umusaruro wabo, birinda kwiringira imvura kuko batazi igihe izagwira.

Umuyobozi w’Akarere ka Nyamagabe, Mugisha Philbert, yavuze ko iyo gahunda ije kunganira abatuye ako karere kari gasanganywe ibibazo bitandukanye by’izuba ryatumaga batabona umusaruro cyane mu gihe cy’izuba.

Ati “ Tujya tugira ibibazo bikomoka ku mihindagurikire y’ikirere[...] Ibi bikorwa bigamije gufasha abaturage gufata amazi aturuka ku nzu, abaturage bakayakoresha mu ngo no mu kuhira imyaka, cyane ko hari igihe igihe cy’izuba kiba kirekire. Bifasha kandi kwirinda isuri yakwangiza imyaka n’imirima, aho kugira ngo amazi aturuka mu bisenge by’inzu atere ikibazo akaba igisubizo.”

Kubaka ibigega bifata amazi biri mu mihigo ako karere kahigiye imbere ya Perezida wa Repubulika mu mwaka w’ingengo y’imari 2016-2017.

Mugisha yavuzeko gufata aya mazi no kuhira byabagiriye akamazro cyane, kuko byongereye umusauro w’ingano mu Murenge wa Tare, ndetse rukaba n’urugero rwo kwereka abandi bahinzi ko no mu gihe cy’izuba bashohora guhinga.

Abaturage bubakiwe ibyo bigega bavuga ko byabafashije kongera umusaruro.

Bankundiye Claudine yavuze ko mbere yiriranwaga ikivomesho ku mutwe, avoma kure amazi yo kuhira umurima w’igikoni, nyamara ngo uyu munsi yarabyibagiwe.

Ndahimana Marcel avugako bagize amahirwe yo kubakirwa ibigega bifata amazi ubusanzwe yajyaga abateza isuri.

Tracaire icisha inkunga yawo mu miryango nyarwanda, ni muri urwo rwego ibyakozwe byacishijwe mu mpuzamakoperative Unicopagi ihuje kiperative 30 zikora ibikorwa by’ubuhinzi.

Mu rwego rwo gusangira ubumenyi bw’ibyo Trocaire yakoze mu Rwanda, abayobozi ba Trocaire bo mu bihugu birindwi bari mu Rwanda guhera ku wa Mbere tariki ya 24 Ukwakira 2016, aho baje kwigira ibyo Trocaire yahakoze, bakazasangira ubwo bumenyi.

Uwo mushinga watwaye amapawundi asaga ibihumbi 523, ni ukuvuga asaga miliyoni 500 mu mafaranga y’u Rwanda, yifashishijwe mu kubaka ibyo bigega n’ibyobo, kwigisha abaturage ndetse n’ibikoresho byifashishwa muri uwo mushinga.

Ibigega byubakiwe abaturage mu Karere ka Nyamagabe
Ibigega bifata amazi munsi y'ubutaka
Ibyobo bifata amazi ava ku bisenge by'inzu
Ibyobo byo mu butaka bifata amazi yo ku misozi
Imirima ivomererwa hifashishijwe ibigega

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved