Kwamamaza

Nyamagabe:Ambasaderi wa Amerika yasabye urubyiruko kubyaza umusaruro amahirwe rufite

Yanditswe kuya 14-09-2016 saa 19:05' na Prudence Kwizera


Ambasaderi wa Leta Zunze Ubumwe za Amerika mu Rwanda, Erica J. Barks-Ruggles yibukije urubyiruko rw’u Rwanda ko mu gihugu no hanze yacyo hari amahirwe menshi abakikije, bityo abasaba gukora cyane bakayabyaza umusaruro birinda ibibarangaza.

Yabigarutseho kuri uyu wa 14 Nzeri 2016, ubwo yari yitabiriye igikorwa cyo gutaha ku mugaragaro ibyumba 10 by’amashuri bishya byubakiwe ishuri ryisumbuye ry’imyuga ryitiriwe Mutagatifu Bosiko, Don Bosco Nyamagabe Technical Secondary School (NTSS), riherere mu karere ka Nyamagabe.

Ibi byumba byatwaye miliyoni zikabakaba 200 z’amanyarwanda bikaba byarubatswe ku nkunga ya Leta Zunze Ubumwe za Amerika, ibinyujije muri Ambasade yayo mu Rwanda.

Nyuma yo gufungura ku mugaragaro ibi byumba by’amashuri, Ambasaderi Erica yatanze impanuro ku rubyiruko rw’abanyeshuri arwibutsa ko rufite amahirwe rugomba kubyaza umusaruro rutegura ejo haza harwo, rugahindura igihugu kikarushaho kuba cyiza ndetse n’Isi muri rusange.

Yagize ati “Rubyiruko mufite amahirwe kandi mufite n’ubushobozi bwo gutegura ejo hazaza heza kuri mwe, ku gihugu cyanyu n’Isi muri rusange.Kugira ngo muzabigereho mugomba gukora cyane kandi mukiga neza, mukirinda ibishobora kubarangaza bibatesha umwanya”.

Umuyobozi mukuru wa NTSS, Padiri Harerimana Valens yavuze ko iki ari igisubizo ku banyeshuri biga kuri iki kigo batari bafite aho kwigira hameze neza, ndetse n’abandi bashakaga kuza kuhiga imyuga ntibibashobokere.

Padiri Harerimana ati “Dufite abana benshi baza batugana bashaka kwiga imyuga, ariko bakabura aho bigira, ubu ni amahirwe kuko abo twakira bagiye kwiyongera ndetse na bo dusanganwe bagiye kwigira ahantu heza kandi bisanzuye”.

Muri iki gikorwa abanyeshuri biga kuri NTSS bamuritse ibikorwa by’ubumenyingiro bakora, birimo ibijyanye n’ubwubatsi, ububaji, kudoda imyenda, gutunganya imisatsi n’ibindi.

Iri shuri ryari risanzwe ryakira abanyeshuri 296 kuri ubu rikaba rigiye kujya ryakira abasaga 500 bakigishwa imyuga itandukanye.

Umuyobozi w’Akarere ka Nyamagabe Philbert Mugisha, yibukije ko ibikorwa by’amajyambere byose biri kugerwaho kubera imiyoborere myiza n’umutekano biri mu Rwanda, by’umwihariko asaba ko buri wese yagira uruhare mu kubisigasira.

Meya Mugisha kandi yibukije ko mu munsi micye muri ibi byumba by’amashuri hazaba hagejejwe ibikoresho bizafasha abanyeshuri gushyira mu ngiro imyuga bahigira.

Erica J. Barks-Ruggles, Ambasaderi wa Amerika mu Rwanda yasabye urubyiruko gukora cyane rukabyaza umusaruro amahirwe rufite
Erica J. Barks-Ruggles, abaybozi b'Akarere ka Nyamagabe n'Ishuri NTSS
Abanyeshuri biga muri NTSS bateze amatwi impanuro za Amasaderi Erica J. Barks-Ruggles
Ibyumba by'amashuri byatashywe ku mugaragaro byubatswe ku buryo bugezweho
Imiterere y'ibi byuma by'amashuri mo imbere

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved