Nyamagabe: Abarokotse Jenoside babaga mu nzu zishaje bubakiwe umudugudu watwaye Miliyoni 800 Frw

Yanditswe na Prudence Kwizera
Kuya 14 Ugushyingo 2019 saa 12:28
Yasuwe :
0 0

Imiryango 40 y’abarokotse Jenoside yakorewe Abatutsi yo mu Murenge wa Tare mu Karere ka Nyamagabe yabaga mu nzu zishaje yubakiwe umudugudu mwiza watwaye agera kuri Miliyoni 800 Frw.

Iyo miryango irimo igera kuri 16 igizwe n’abageze mu za bukuru isanzwe ituye mu Mudugudu wa Maryohe mu Kagari ka Nyamigina.

Bamwe mu batujwe muri uwo mudugudu bavuga ko imibereho yabo igiye guhinduka ikarushaho kuba myiza.

Mukankwaya Valerie yagize ati “Twari tubayeho nabi iyo imvura yagwaga twagiraga ubwoba, igisenge cyarazamukaga umuyaga ukagiterura ibyondo bikamanuka waba utetse bikagwamo. Ni ukuri njyewe ndi umuntu ukuze ariko ndumva narabaye nk’umwana kuko ibi bintu byarantunguye.”

Inzu bubakiwe zirimo ibyangombwa byose nk’ibiryamirwa n’ibikoresho byo mu nzu, amazi n’amashanyarazi.

Nsabimana Innocent yagize ati “Ndakanda ku gikuta inzu yose ikabona abana bagasubiramo amasomo, ndajya muri douche (urwogero) igihe nshakiye rwose byaranejeje cyane.”

Umuyobozi w’Akarere ka Nyamagabe, Umwamahoro Bonaventure, yabasabye kwimakaza isuku kugira ngo imibereho myiza yabo igere ku rwego rwiza.

Ati “Birumvikana ibintu byose abantu bagenda babitozwa, turabasaba kugira isuku muri byose, turabafasha kubaho mu buryo bw’ubusirimu kandi ni uburyo bwiza buri muntu wese akwiye kubaho.”

Uwamahoro avuga ko bagifite imiryango y’abarokotse Jenoside igituye mu nzu zishaje ariko hari gahunda yo kububakira.

Ati “Mu Karere kacu turacyafite imidugudu y’abarokotse Jenoside myinshi ishaje, ubu tumaze kuvugurura imidugudu ibiri harimo uyu wa Maryohe n’undi twavuguruye umwaka ushize wa Kibumbwe; uno mwaka turateganya gutangira kuvugurura uwa Kaduha.”

Iyo miryango 40 yatujwe muri uwo muduguu igizwe n’abantu barenga 180.

Amafaranga yo kubukakira yatanzwe n’akarere ku bufatanye n’ikigega FARG hamwe n’inkunga ya Miliyoni 9 Frw yatanzwe na MTN Rwanda ubwo yasuraga iyo miryango muri Mata 2017.

Bubakiwe inzu eshanu mu buryo bw’amagorofa aho inyubako imwe ituwemo n’imiryango umunani.

Kuri ubu abagize iyo miryango bari gufashwa mu bikorwa byo kwiteza imbere.

Uyu mudugudu abarokotse Jenoside bubakiwe watwaye agera kuri Miliyoni 800 Frw
Iyo miryango irenga 40 yatujwe muri uwo mudugudu igizwe n’abantu barenga 180
Bubakiwe inzu eshanu mu buryo bw’amagorofa aho inyubako imwe ituzwamo imiryango umunani
Abatujwe muri uyu mudugudu basabwe kwimakaza isuku muri byose

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza