Kwamamaza

Nyagatare: Nta gikozwe, abo muri Rwimiyaga bakomeza kugenda 16 km bajya kwiga

Yanditswe kuya 5-08-2016 saa 20:22' na Jean Baptiste Nshimiyimana


Umuyobozi w’ikigo cy’amashuri abanza cya Gatebe giherereye muri Rwimiyaga mu Karere ka Nyagatare yagaragaje ko bamwe mu bana baharangiriza bacikiriza amashuri yabo kubera kutabona aho bakomereza ay’isumbuye bitewe nuko ishuri ry’uburezi bw’ibanze bashobora kujyaho riherereye mu birometero 16.

Gahunda y’uburezi bw’ibanze bw’imyaka icyenda (9YBE) na 12 yatangijwe mu Rwanda igamije kwegereza abana amashuri y’icyiciro cya mbere n’icya kabiri cy’amashuri yisumbuye, bafashwa kwigira ubuntu.

Gusa abo mu murenge wa Rwimiyaga mu Karere ka Nyagatare bavuga ko ikibazo cy’ingutu bafite ari ukutagira amashuri yisumbuye bakomerezamo iyo basoje abanza, ku buryo basabwa kuba bafite amagare yo kugendaho, cyangwa bagacumbika mu baturiye ishuri, abandi bakagenda n’amaguru.

Bumbakare Faustin, Umuyobozi w’ishuri ribanza rya Gatebe mu kiganiro yagiranye na IGIHE, yatangaje ko bahangayikishijwe n’aba bana bigira muri aka gace, kuko usanga harimo n’abakiri bato cyane badashoboye kunyonga amagare ngo bajye ahari uburezi bw’imyaka icyenda na 12, bituma mu gihe batoherejwe mu bigo biga babamo bahita bareka kwiga.

Bumbakare avuga ko ishuri ryisumbuye riri hafi y’ikigo ayobora riherereye mu birometero 16 , bityo ngo bivuna abana kujyayo ndetse hari benshi bananirwa kugerayo.

Yagize ati “Hari abatajyayo kuko batabasha kunyonga igare cyangwa ababyeyi babo ngo babashe kubashakira aho baba, ariko mu mubare munini w’abana bakoze mu myaka itatu ishize, abagiye mu bigo bya Leta bari bake, ahubwo abagombaga kujya mu mashuri y’uburezi bw’imyaka icyenda nibo benshi kandi hari abataragiyeyo.”

Iki kibazo ubwo yakigezaga ku Munyamabanga wa Leta ushinzwe amashuri abanza n’ayisumbuye Olivier Rwamukwaya kuri uyu wa 4 Kanama, yatangaje ko kuba harabayeho ubufatanye hagati y’inzego za Leta, hari amahirwe menshi y’uko amashuri yisumbuye yakongerwa ku y’abanza yubatswe n’Ikigo cy’Igihugu cy’Iterambere, RDB.

Ati “Uko twafatanyije n’inzego za Leta n’abaturage tukagera kuri ibi, tuzakomeza gufatanya kandi n’ibindi tuzabigeraho. Gahunda yo kongera amashuri rero nayo irakomeje uko ubushobozi bw’igihugu cyacu bubitwemerera, ndetse buri mwaka tugenda duteganya kubaka ibyumba bishya mu ngengo y’imari ya buri mwaka, aho bishoboka tugashyiraho amashuri yisumbuye yorohereza abarangije amashuri abanza bagakomeza icyiciro cyisumbuyeho.”

Belise Kariza, umuyobozi w’ishami ry’ubukerarugendo muri RDB, ari nayo yubatse ibyumba 12 ishuri ribanza rikoreramo, avuga ko uburezi babuha agaciro gakomeye kuko ari bwo nzira yo gutegura abanyarwanda b’ejo kandi bibafasha guhahira mu bice bitandukanye by’Isi.

Ati “Twishimira ko mu bikorwa byatewe inkunga n’ubukerarugendo harimo ibikorwa by’uburezi. Iyo turwanya ubujiji tuba dufungurira amarembo Abanyarwanda ngo babashe guhahira ahantu hose.”

Mu mwaka wa 2015, Minisiteri y’Uburezi yabaruraga amashuri 4 313, ayisumbuye akaba ari 1 359.

Ishuri ribanza rya Gatebe ryatangiye mu 2009, abanyeshuri bigira munsi y’igiti, aho baje kuva bajya mu ishuri ryubatse muri rukarakara.

Mu mwaka wa 2010 kugeza mu 2015, RDB yatanze ubufasha bwo kubaka ibyumba by’amashuri 12 ku nkunga yavuye mu mafaranga y’ubukerarugendo asaranganywa abaturiye pariki z’u Rwanda.

Abarangije mu ishuri rya Gatebe bakora urugendo rwa kirometero 16 bajya kwiga mu mashuri y'uburezi bw'imyaka icyenda
Belise Kariza, umuyobozi w'ishami ry'ubukerarugndo muri RDB
Bumbakare Faustin, umuyobozi w'ishuri ribanza rya Gatebe
Umunyamabanga wa Leta ushinzwe amashuri abanza n'ayisumbuye, Olivier Rwamukwaya

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved