Kwamamaza

Nyagatare: MTN yishyuriye mituweli abaturage 50 batishoboye

Yanditswe kuya 30-09-2016 saa 11:12' na Thamimu Hakizimana


Isosiyete y’itumanaho, MTN Rwanda yishyuriye ubwisungane mu kwivuza imiryango irindwi itishoboye igizwe n’abantu 50 yo mu Murenge wa Matimba, mu Karere ka Nyagatare.

Iki gikorwa cyabaye kuri uyu wa Kane tariki ya 29 Nzeri 2016, cyari muri gahunda y’iyi sosiyete yo kwegera abakiriya bayo ikora buri mwaka.

Umuyobozi ushinzwe ubuterankunga no kwamamaza ibikorwa bya MTN Rwanda, Alain Numa, yabwiye IGIHE ko iyi gahunda yatangiye muri Nyakanga 2016 aho MTN imaze kwishyurira mituweli abantu 500 batishoboye batuye mu Turere twa Rusizi, Nyagatare, Musanze na Rubavu.

Yagize ati “ Ibi biri muri gahunda dufite nka MTN yo kujya twegera abakiriya bacu buri mwaka, dufite intego yo kugira ngo twumve uko bakira serivisi zacu n’ibyo banenga kuko bituma tumenya uko twikosora.”

Yongeyeho ko kurihira abatishoboye mituweli MTN ibikora kugira ngo isangire inyungu iba yarabonye n’abakiriya bayo kuko ari bo iba iyikesha.

Suzan Nyagato, umubyeyi w’abana 15 utuye mu murenge wa Matimba, avuga ko yishimiye kuba MTN yamurihiye mituweli kuko yari yarabuze ubushobozi bwo kuzirihira abana be bose.

Yagize ati " Nishimye cyane kuko izi mituweli zizatuma tubasha kwivuza twese mu muryango wacu kuko Leta ni yo yazinyishyuriraga ariko na yo yarihiraga abana umunani gusa.”

Yakomeje avuga ko yasanze nta kintu mu buzima bwe kimurutira kugira mituweli bitewe n’uko iyo abana be barwaye bahita bajya kwivuza batarinze kurembera mu rugo.

Umunyamabanga Nshingwabikorwa w’Umurenge wa Matimba, Mushabe Claudien, we yavuze ko iyi nkunga bahawe na MTN izabafasha kongera umubare w’abafite ubwisungane mu kwivuza.

Yagize ati “ Byadushimishije cyane kuko abo bantu bari basanzwe bagira ikibazo cyo kwivuza kuko n’ubwo twabafashaga ntitwashoboraga kubafasha bose, rero biradufasha kongera umubare w’abafite mituweli kuko n’iyo cyaba ari igice kiyongereyeho tuba tugabanyije umubare w’abapfa.”

Yakomeje avuga ko abaturage bagera kuri 90% ari bo bamaze kwishyura mituweli mu murenge ayoboye ndetse anasaba abaturage gushyira imbaraga mu kwifasha kurusha uko bategereza gufashwa n’abagiraneza.

Suzan Nyagato yishimiye ko umuryango we wose wahawe mituweli
Abaturage b'umurenge wa Matimba bishimiye igikorwa cya MTN cyo kwishyurira bamwe mu baturanyi babo mituweli
Alain Numa avuga ko begera abaturage mu rwego rwo gusangira ku nyungu baba babonye
Mushabe Claudien avuga ko inkunga ya MTN Rwanda izatuma imibare y'abatanze mituweli muri Matimba yiyongera
Abahawe mituweli bishimiye inkunga bahawe na MTN Rwnda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved