Nyagatare : Hari abarimu boherejwe ku bigo by’amashuri banga kujyayo

Yanditswe na Tuyishimire Raymond
Kuya 18 Gashyantare 2021 saa 08:12
Yasuwe :
0 0

Abanyeshuri biga mu bigo bitandukanye byo mu mashuri abanza n’ayisumbuye yo mu Karere ka Nyagatare, bavuze ko hari amasomo amwe n’amwe batakiga kubera kutagira abarimu bitewe n’uko aboherejweyo banze kujyayo.

Minisiteri y’Uburezi mu Rwanda iheruka gutangaza ko yashyize mu kazi abarimu barenga ibihumbi 17 bidasabye kubanza gukora ibizamini ahubwo hashingiwe ku manota bagize mu mashuri.

Iki cyemezo cyafashwe hagamijwe kuziba icyuho cy’umubare munini w’abarimu bari bakenewe mu byiciro by’amashuri abanza n’ayisumbuye ngo ujyanishwe n’ibyumba by’amashuri byongerewe mu gihugu hose.

Bamwe mu banyeshuri bo mu rwunge rw’amashuri rwa Nyagatare n’urwa Musheri baganiriye na Flash Fm, bavuze ko kuba badafite abarimu babigisha amasomo amwe na mwe bikomeje kubadindiza mu myigire.

Umwe ati ”Ikibazo cy’amasomo ni icy’isomo ry’ikoranabuhanga.Umwarimu waryo baramuhinduye bamujyana ahandi, ikibazo ni uko tutayiga. Baratubwiye ngo bazabikemura,turasaba ko twabona umwarimu wayo.”

Undi ati “Kubera COVID-19 abarimu ntabwo bagarutse bitugiraho ingaruka, amwe mu mashuri ntabwo afite abarimu.Umwarimu umwe arigisha amashuri agera kuri atanu cyangwa atandatu”.

Umuyobozi w’Akarere ka Nyagatare wungirije ushinzwe imibereho myiza y’abaturage, Murekatete Juliette, yavuze ko Akarere kamenyesheje iki kibazo Ikigo cy’Igihugu cy’Uburezi REB ,asaba ibigo gusaranganya abarimu bahari .

Ati “ Nk’Akarere twabanje gutanga imibare y’abarimu twasabye. Aabo baduhaye, hari abamaze kuza ndetse hari n’abataraza, ku buryo bashaka igisubizo mu buryo bwihuse .

Yakomeje agira ati” Icyo nakongeraho n’uko mu kuganira kwa buri munsi, umwarimu w’amashuri atatu ashobora kuba abafasha ariko ntibabure icyo bakora.”

Umuyobozi ushinzwe abarimu mu kigo cy’Igihugu REB, Nsengiyumva Jean Damascen yabwiye IGIHE ko bitarenze mu kwezi kwa Werurwe bateganya gushyira mu myanya abarimu mu kindi cyiciro cya Kane.

Ati” Turateganya icyiciro gikurikiraho vuba bidatinze. N’ubu hari ikipe yari yagiye kureba icyuho kiri mu turere nyuma yo kubona icyuho gihari abarimu ku rutonde rw’abategereje bazashyirwa mu myanya.

Yavuze ko bitarenza ukwezi kwa Werurwe ,muri Nyagatare bazoherezayo abarimu bitewe n’imibare iri bugaragare y’abarimu bakenewe mu turere.

Imibare igaragazwa n’Akarere ka Nyagatare yerekana ko abarimu basaga 800 aribo bari bakenewe mu mashuri abanza ariko habonetse 666 nabo bagenda bagabanyuka. Ni mu gihe mu ma mashuri y’isumbuye akarere kavuga ko habura abarimu basaga 200.

Mu karere ka Nyagatare mu mashuri abanza n'ayisumbuye hakenewe abarimu barenga 800

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .