Nyagatare: Haravugwa ubukererwe mu guhemba abakozi b’akarere

Yanditswe na Philbert Girinema
Kuya 9 Ugushyingo 2016 saa 05:35
Yasuwe : XX
0

Hari abakozi b’Akarere ka Nyagatare bavuga ko bakatwa ku ngufu amafaranga yo gushyigikira ikipe ya Sunrise FC byiyongera ku kuba umushahara wabo usigaye ubageraho utinze mu buryo butari bumenyerewe.

Aba bavuga ko ku mushahara wabo wa buri kwezi bakatwa amafaranga yo gufasha ikipe y’Intara y’i Burasirazuba ndetse bagahembwa ukwezi kurenzeho iminsi nk’icumi.

Umwe utashatse ko amazina ye atangazwa yagize ati ‘‘Dusigaye duhembwa mu minsi mirongo itanu. Ubu twebwe ukwezi kw’iminsi mirongo itatu kwarahindutse. Imishahara y’abakozi ngo bayitije ikipe ya Sunrise.’’

Undi ati ‘‘Ukwezi kwa cyenda baduhembye tariki 17 z’ukwezi kwa Cumi, ukwezi kwa 10 ntibarakuduhemba. Hanyuma amafaranga ya Sunrise badukata hagati ya 0.5% na 1% by’umushahara. Mbere badukataga amafaranga y’ikipe yitwaga Nyagatare FC, ubu bari kudukata aya Sunrise FC.’’

Umuyobozi w’Akarere ka Nyagatare, Mupenzi George, yatangarije IGIHE ko gutinda guhemba abakozi byatewe na porogaramu y’ikoranabuhanga [software] bahemberwamo.

Asobanura impamvu imishahara yabo yatinze, Mupenzi yavuze ko byatewe n’uko akarere kasabwe gushyira abakozi b’ibitaro bya Nyagatare muri porogaramu gakoresha mu kwishyura imishahara.

Ati « Byatewe n’abakozi b’ibitaro bagombaga guhemberwa nabo mu ikoranabuhanga [system], noneho bari batarashyirwamo. Biba itegeko ko nabo bashyirwamo. Biba ngombwa ko dushyiramo imbaraga ngo n’abakozi bose bashobore guhembwa. Byarakozwe uyu munsi ngira ngo nibwo imishahara yabo ishobora kugera ku makonti. »

Ku byo gufasha ikipe ya Sunrise FC ngo abavuga ko bahatirwa gutanga uwo musanzu babeshya kuko ari igikorwa umuntu akora ku bushake.

Ati ‘‘Sunrise ni ikipe y’Akarere kuyifasha ni ku bushake, ntawe uyifasha ku gahato, ni uburenganzira bw’umuntu iyo atabishatse arabireka. Ntawe dukata amafaranga ku gahato, keretse uwabisinyiye ko abyemera.’’

Umuyobozi w’Akarere ka Nyagatare, Mupenzi George, yatangaje ko ikibazo cy’itinda ry’imishahara cyatewe n’uburyo bwo guhemba bwagombaga gushyirwamo n’abakozi b’ibitaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza