Nyagatare: Abigize ba Rumashana bivurira amatungo baburiwe

Yanditswe na Ntabareshya Jean de Dieu
Kuya 24 Mutarama 2021 saa 10:14
Yasuwe :
0 0

Abakurikiranira hafi ubuvuzi bw’amatungo mu Karere ka Nyakatare, basabye aborozi kutihutira kwivurira amatungo ahubwo bakagana abaganga babihuguriwe (abaveterineri) ngo kuko bishobora kuba intandaro yo gukwirakwiza virusi mu matungo.

Indwara z’amatungo yororwa ziri mu buryo butandukanye kuko hari izandura ziterwa na virusi n’izitandura. Nko ku nka, dore ko arizo zorowe na benshi mu Karere ka Nyagatare, hari indwara y’Igifuruto ihangayikishije aborozi benshi, Indwara y’Uburenge, Ubuganga, n’Amarebe.

Aborozi n’ubwo bagirwa inama yo kutivurira amatungo bavuga ko kuyivurira ahanini biterwa n’uko baba bahangayikishijwe n’izi ndwara nk’uko babitangarije RBA.

Umwe muri bo yagize ati “Ntabwo ari kenshi bikunze kugaragara, indwara y’igifuruto ni indwara mbi, iyo ifashe inka igira umuriro mwinshi yaba ihaka ikaramburura.”

Mugenzi we nawe yavuze ko izi ndwara zizahaza cyane amatungo ati “Ntirisha, igira intege nke, igira ingaruka nyinshi muri make.”

Abakurikiranira bya hafi ubuzima bw’amatungo mu karere ka Nyagatare bavuze ko ahanini indwara ziterwa na virusi mu matungo zikunze gukwirakwizwa n’aborozi bivurira amatungo.

Dr Zimurinda Justin umaze imyaka myinshi akora ubuvuzi bw’amatungo yavuze ko kwivurira itungo ku muturage utabisobanukiwe ashobora kuyitera uburwayi budakira.

Ati “Ntabwo abaturage aribo bivurira, iyo uvura ibintu utabizi uba uri rumashana. Ntabwo uba uvura ibyo uzi, akenshi aho kugira ngo ikire ahubwo usanga igira ubudahangarwa bwayo, ni ukuvuga indwara ikarushaho kugira ubudahangarwa, ugasanga biragoranye gukira.”

Biteganyijwe ko muri uyu mwaka, mu karere ka Nyagatare inka ibihumbi 40 zizakingirwa Igifuruto, ibihumbi 35 zikingirwe indwara y’Ubutaka, izigera ku bihumbi 35 kandi zigakingirwa Uburenge naho inka zirenga ibihumbi 20 zizakingirwa indwara y’Ubuganga, mu gihe inyana zigera ku 1000 zizakingirwa indwara y’Amakore.

Umuyobozi w’Akarere ka Nyagatare, Mushabe David Claudian, yavuze ko nubwo inka ziteganyijwe gukingirwa muri uyu mwaka ari nke ugereranyije n’izorowe muri aka Karere, ngo bigendana ahanini n’ingengo y’imari yateganyijwe ariko ahamagarira aborozi gufatanya n’ubuyobozi.

Ati “Birumvikana ntabwo tuba twazikingiye zose, ariko tugenda tureba ahashobora kugira ikibazo. Bifitanye isano n’ingengo y’imari ihari, ariko burya aborozi nabo bagira uruhare, ababa batagezweho bashobora no gukingirirwa nabo ubwabo biyishyuriye.”

Si mu karere ka Nyagatare gusa hagaragara indwara z’amatungo ziterwa na virusi zinyuranye, no mu turere tugize igihugu hagiye humvikana indwara z’amatungo kandi zandura mu kurushaho kuzirwanya hagafatwa ibyemezo byo gukumira urujya n’uruza rw’amatungo ndetse no kuyakingira.

Itegeko rigenga uburyo bwo kwirinda no kurwanya indwara zanduza amatungo mu Rwanda riteganya ko bitabangamiye ibiteganywa n’andi mategeko ahana, umuntu wese ukora ibinyuranije n’ibiteganywa n’iri tegeko, ahanishwa igifungo kiri hagati y’amezi atatu n’imyaka ibiri n’ihazabu iri hagati ya 100 000 Frw na 5 000 000 Frw cyangwa kimwe muri ibyo bihano.

Aborozi bo mu Karere ka Nyagatare babujijwe kwivurira amatungo ngo kuko bishobora gukwirakwiza indwara cyangwa bigatuma atinda gukira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .