Kwamamaza

Nyagatare: Abaturage basaga 50 bakoreye RAB barambuwe, ababakoresheje bitana bamwana

Yanditswe kuya 2-09-2016 saa 10:22' na Emma-Marie Umurerwa


Bamwe mu baturage bo mu Murenge wa Nyagatare, Akarere ka Nyagatare, bavuga ko bakoreye rwiyemezamirimo guhera muri Werurwe bamwe bakaba barategereje ko abahemba amaso agahera mu kirere.

Aba baturage bavuga ko bakoraga akazi ko gutera ibiti no kubyuhira, guhinga imirima yatewemo imbuto z’indobanure mu mushinga wa RAB, watsindiwe na rwiyemezamirimo witwa Higiro Anastase, bagategereza ko abahemba bagaheba.

Umwe muri aba baturage baganiriye na RBA yagize ati “Kuva mu kwezi kwa gatatu twararimye turangije dutera urubingo, noneho izuba ritangiye kuva dutangira kuruvomerera. Saa kumi n’ebyiri twabaga turi mu Muvumba, ariko turakomeza turahatiriza turakora, tuvomerera ibiti twateye mu zuba.”

Ikindi aba baturage bavuga ko batumva neza ni uburyo bamwe muri bo bahembwa abandi bagasigara kandi bose barakoze akazi kamwe, bikaba byaratumye hari umwe muri bo wishwe n’inzara.

Hari uwagize ati “Inzara igiye kwica abantu, hari n’umusaza twakoranaga ejobundi twaramushyinguye kubera inzara. Twazaga gukora hano kubera gusonza akirirwa arya isogo mbisi, kugeza ubwo yapfuye.”

Rwiyemezamirimo Higiro Anastase wakoresheje aba baturage, avuga ko gutinda kubahemba byatewe na RAB, yatinze kumwishyura.

Mu kiganiro yagiranye na IGIHE, umuyobozi wa RAB, mu Ntara y’Iburasirazuba Senzige Norbert, avuga ko bishyuye rwiyemezamirimo kugeza mu kwezi kwa kane.

Yagize ati “Mu masezerano twagiranye harimo ko agomba kwishyura abaturage nibura amezi atatu mu gihe agitegereje ko tumwishyura. Ni ukuvuga ngo tumurimo amafaranga yo mu kwezi kwa gatanu, ukwa gatandatu,ukwa karindwi, uku kwa munani na ko kwashize uyu munsi, nta masezerano twigeze twica ahubwo rwiyemezamirimo aba agomba guteganya amafaranga yo kwishyura abaturage mu gihe agitegereje ko tumwishyura kuko binyura mu nzira ndende.”

Umuyobozi w’Akarere ka Nyagatare, Mupenzi George yatangarije IGIHE ko ikibazo cy’aba baturage atakizi.

Ati “Icyo kibazo ntacyo nzi. Abo baturage ubahe nimero yanjye bampamagare, cyangwa banyoherereze ubutumwa bugufi nkurikirane ikibazo cyabo.”

Rwiyemezamirimo Higiro Anastase, yagiranye amasezerano na RAB yo gukora mu mishanga y’ubushakashatsi mu by’ubuhinzi n’ubworozi mu gihe cy’umwaka umwe.

Umuyobozi w'Akarere ka Nyagatare, Mupenzi George yasabye abaturage bavuga ko bambuwe kumugezaho icyo kibazo akagikurikirana

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 9 Ukwakira 2016
Copyright © 2009 -2014 - IGIHE Ltd - All Rights Reserved