00:00:00 IGIHE NETWORK KN KINYARWANDA EN ENGLISH FR FRANCAIS

Nyagatare: Abahinzi b’umuceri bagiye kwiyubakira station ya lisansi

Yanditswe na Hakizimana Jean Paul
Kuya 3 Ugushyingo 2021 saa 07:50
Yasuwe :
0 0

Abahinzi b’umuceri bo mu Karere ka Nyagatare bibumbiye muri koperative ‘CO-DERVAM’ batangije ibikorwa byo kubaka sitasiyo ya lisansi izuzura itwaye miliyoni 228 Frw, ikaba iri kubakwa ku muhanda uherutse gutangwa n’Umukuru w’Igihugu uva Nyagatare ukagera i Gicumbi unyuze i Rukomo.

Ibikorwa byo gutangiza imirimo yo kubaka iyi sitasiyo byatangijwe ku mugaragaro kuri uyu wa Gatatu tariki ya 3 Ugushyingo 2021 mu Murenge wa Nyagatare mu birometero hafi icumi uvuye mu Mujyi wa Nyagatare.

Ni sitasiyo iri kubakwa ku muhanda mushya uva Nyagatare, Rukomo Gicumbi ureshya na kilometero 73 aho uri gushyirwamo kaburimbo, ikazuzura itwaye miliyoni 228 Frw mu gihe cy’amezi atandatu. Aya mafaranga yose mu banyamuryango 1350 b’iyi koperative.

Perezida wa Koperatice CO-FERVAM, Ntamukunzi Celestin, yavuze ko nk’abahinzi b’umuceri, hari inyungu bamaze kugeraho bityo bakaba barifuje no kuyishora mu bindi bikorwa by’ishoramari rikeneye mu gice bakoreramo, kikarushaho kubateza imbere.

Ati “Inyungu umunyamuryango ayifiteho ni uko amafaranga yajyaga akatwa ku musaruro we arimo ayo guhemba abakozi n’indi mirimo ikorwa na koperative, atazongera kuyakatwa kuko ayo mafaranga azajya ava mu bikorwa by’ishoramari bikorwa na koperative. Hari andi 8 Frw RCA idusaba kubakata ajya mu isanduku ya koperative nayo ntabwo tuyabakata ahubwo tuyakura mu bikorwa bibyara inyungu bya koperative.”

Ntamukunzi yavuze ko kuri ubu iyi koperative igeze ku mutungo wa miliyoni 300 Frw, aho byitezwe ko sitasiyo niyuzura nibura buri mwaka abahinzi bazajya bahabwa inyungu iturutse ku bikorwa bibyara inyungu byabo.

Umuyobozi w’Agateganyo w’Akarere ka Nyagatare, Hategekimana Fred, yavuze ko bishimishije kubona abahinzi batera intambwe bagatekereza uburyo inyungu bakura mu musaruro w’ubuhinzi bw’umuceri bayikoresha mu bindi bikorwa by’iterambere.

Ati “Kuva Nyagatare kugera hano hari ibirometero umunani birenga kandi nta yindi sitasiyo ya lisansi ihari, kubona rero ihageze ni igikorwa cy’intangarugero ndetse cyongera iterambere mu rindi. Hari abo wasangaga bafite moto bakeneye lisansi ugasanga hari abacuruza lisansi mu ngo zabo. Iri shoramari rigiye gukemura ibyo bibazo byose.”

Uwambaje Marie Gratian usanzwe ari umwe mu banyamuryango b’iyi koperative yavuze ko iri shoramari ari iry’igihe kirekire, ku buryo azariraga n’urubyaro rwe.

Yagize ati “Twajyaga gushaka lisansi kure mu birometero hafi umunani none ubu tugiye kujya tuyibonera hafi bitatugoye. Iki ni igikorwa kirambye n’umwana wanjye n’umwuzukuru kizamugirira umumaro.”

Koperative CO-DERVAM yashinzwe mu 1987 ibona ubuzima gatozi mu 1988, ihinga umuceri ku buso bungana na hegitari 400 bukora ku mirenge ine ariyo Rukomo, Mimuri, Mukama na Nyagatare. Ibarurwamo abanyamuryango 1350 barimo abagore 764 n’abagabo 586.

Iyi koperative ifite ikigega cy’inyongeramusaruro kirimo imiti, imbuto n’ifumbire gifite agaciro ka miliyoni 89 Frw, ikagira n’ikigega cy’ingoboka cya miliyoni 82 Frw.

Abahinzi b'umuceri bagiye kwiyubakira sitasiyo ya lisansi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .