00:00:00 IGIHE NETWORK KN KINYARWANDA EN ENGLISH FR FRANCAIS

Nyabugogo: Impungenge ku bana bato bambura abantu amasakoshi na telefoni

Yanditswe na Thamimu Hakizimana
Kuya 30 Ukwakira 2021 saa 06:03
Yasuwe :
0 0

Iyo ugeze Nyabugogo mu Mujyi wa Kigali, wakirwa n’urujyan’uruza rw’abantu n’ibinyabiziga bitewe n’uko iki gice ari kimwe mu byo imodoka zinjiriramo zivuye mu ntara cyangwa mu gihe zisohoka mu Mujyi wa Kigali.

Kubera izi mpamvu, aka gace gakorerwamo ubucuruzi butandukanye ari na ko gakurura abafite ingeso zitandukanye zirimo n’ubujura.

Igikomeje gutera impungenge ariko ni uko ibikorwa by’ubujura bigaragaramo abana bato bazwi nk’aba-marine, bashikuza abantu telefoni n’amasakoshi bakabitwara.

Kuri uyu wa Gatandatu, umwana w’imyaka 12 yafashwe yibye telefoni ubwo yarimo kugerageza gucika ariko agakumirwa na DASSO zahise ziyimwaka zikayisubiza nyirayo, Habimana Samson.

Mu kiganiro kigufi na IGIHE, uyu mwana yavuze ko ibi bikorwa by’ubujura abiterwa n’ubuzima bubi abayemo, avuga ko atabikunda kuko yifuza kuzakura akiga nk’abandi bana.

Habimana wasubijwe telefoni yavuze ko yanyuzwe n’igikorwa cya DASSO kuko uyu mwana yari yamaze kumucika, mu gihe kumwirukankana mu mihanda yuzuyemo imodoka byari biteye ubwoba kuko umuntu yashoboraga kugongwa n’imodoka.

Yagize ati “Ngize amahirwe kuko sinari nzi ko mufata kubera yari yamaze kunsiga kandi nabonaga ko nimwirukaho imodoka zirahita zingonga kuko na we ubonye ko zari zimugonze, gusa ndashimira DASSO zimfashije zikamwirukaho zikamufata.”

Bamwe mu bari bateraniye aho, babwiye IGIHE ko bibabaje kubona umwana w’imyaka 12 ari mu bikorwa by’ubujura kandi ari kwiba abantu bakuru, basaba Leta gushakira umuti iki kibazo.

Umwe mu babyeyi yagize ati “Birababaje kubona umwana w’imyaka 12 aza kwiba abantu bakuru ahantu nka hano akanirukanka, ntabwo ari ibintu bikwiye rwose kuko ubundi umwana muto ntiyiba, niyo yibye yiba ibiceri mu rugo, rero iyo ageze aho yirukankana abantu akabashikuza ibyabo, birumvikana ko aba yarangiritse kandi ari umwana w’igihugu nk’abandi.”

Uyu mubyeyi yavuze ko “ari inshingano za Leta gushaka uko ifasha abana benshi usanga nta miryango bagira, cyangwa se baba bayifite ugasanga iri mu bibazo bitoroshye."

Umujyi wa Kigali umaze iminsi uvugwamo ibikorwa by’ubujura, aho mu minsi ishize mu Murenge wa Kimisagara, hafashwe abajura 26 mu mukwabu wakozwe umunsi umwe gusa, mu gihe abajura atari ubwa mbere bafatiwe muri Nyabugogo kuko bikunze kubaho kenshi.

Nyabugogo hakunze kugaragara abana bishobora mu bikorwa by'ubujura bazwi nk'aba-marine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .