Nyabihu: Umupolisi yarashe uwagerageje gutoroka akekwaho gutwara forode ahita apfa

Yanditswe na N.Kubwimana Janvière
Kuya 27 Nzeri 2019 saa 07:06
Yasuwe :
0 0

Umugabo witwa Habarurema Jean Claude uzwi ku izina rya Gasore, wakekwagaho gutwara forode y’inkweto yarashwe n’umupoliesi ukora mu muhanda ubwo yageragezaga gutoroka ahita apfa.

Uyu Habarurema yakomokaga mu Murenge wa Nyakiriba Akarere ka Rubavu, akaba yarasiwe mu Murenge wa Bigogwe ho mu Karere ka Nyabihu.

Ni igikorwa cyabaye ahagana mu masaha ya saa sita z’amanywa ubwo imodoka yo mu bwoko bwa Hiace (Twegerane) bivugwa ko yari ivuye Mahoko yahagarikwaga n’abapolisi bakora mu muhanda kugira ngo bayisake hanyuma uyu Habarurema agasohokamo yikoreye igikapu cyarimo inkweto akiruka Umupolisi akamukurikira yamusiga akamurasa urufaya rw’amasasu agahita apfa.

Umuvugizi wa Polisi ku rwego rw’Igihugu CIP Jhon Bosco Kabera, yemeza ko ayo makuru ari impamo igikurikiyeho ngo ari ukumenya niba uwo mupolisi yakoresheje ingufu ziri ngombwa.

Yagize ati "Ayo makuru nayamenye, gusa baracyakomeje kuyakurikirana, aho abapolisi bakora ku muhanda babonye imodoka bakayihagarika, hakavamo umuntu wikoreye igikapu akiruka Umupolisi akamwirukankana, uwo muntu akagerageza kumurwanya Umupolisi agahita amurasa agapfa".

Akomeza agira ati "Ubu ikigiye gukorwa tugiye kureba uko byagenze, mu iperereza tumenye niba uyu mupolisi atakoresheje ingufu z’umurengera cyangwa yakoresheje iziri ngombwa, hagiye gukorwa iperereza tumenye ukuri".

Uyu Habarurema yari asanzwe ari umucuruzi w’inkweto, akaba asize umugore n’abana batatu, ubu umurambo we wajyanywe mu bitaro kugira ngo ukorerwe isuzuma.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza