Kwamamaza

Nyabiheke: Impunzi zahawe amakarita y’ikoranabuhanga yifashishwa mu guhaha

Yanditswe kuya 21-10-2016 saa 11:12' na Jean Pierre Tuyisenge


Minisiteri Ishinzwe Impunzi no Gukumira Ibiza, MIDMAR, ku wa Gatatu yatangije uburyo bushya bwo gukoresha amakarita y’ikoranabuhanga mu mpunzi zo mu nkambi ya Nyabiheke azajya yoherezwaho amafaranga yo kugura ibiribwa n’ibindi bikenerwa.

Inkambi ya Nyabiheke icumbikiye impunzi zaturutse muri Repubulika Iharanira Demokarasi ya Congo, zihabwa amafaranga aho guhabwa ibyo kurya.

Ubwo Minisitiri Ushinzwe gucyura Impunzi no gukumira ibiza, Mukantabana Seraphine, yaganiraga n’izo mpunzi n’abandi bafatanyabikorwa, yavuze ko basanze icyiza ari uko impunzi zajya zihabwa amafaranga aho guhabwa ibiribwa birimo ibigori n’ibishyimbo.

Yagiz ati “Leta ifatanyije n’abafatanyabikorwa bafashe umwanzuro wo guha impunzi amahirwe ngo bihitiremo ibyo bashobora kurya cyangwa kugura.”

Yongeyeho ko kuba impunzi bidakwiye gukuriraho umuntu uburenganzira bwe, nk’uko The New Times dukesha iyi nkuru yabitangaje.

Ayo makarita y’ikoranabuhanga azashyirwaho amafaranga 6200, agenewe gutunga impunzi imwe ku kwezi bahabwa n’Ishami ry’Umuryango w’Abibumbye ryita ku biribwa (PAM), gusa Mukantabana we avuga ko iyo karita izanakoreshwa n’izindi nzego kugira ngo harebwe ko ibyo bahabwa byose byazajya binyura mu mafaranga.

Yagize ati “ Turi kuganira n’abafatanyabikorwa bacu kugira ngo inkunga yose bagenera impunzi izajye ica kuri iyi karita. Ishami ry’Umuryango w’Abibumbye ryita ku Mpunzi UNHCR, na PAM niko nabo bazajya babigenza.”

Mukantabana avuga ko inkambi zose zo mu Rwanda zigiye gukoresha ubu buryo bw’ikarita, kuburyo byaba ibiribwa cyangwa ibiryamirwa bizajya bitangwa mu mafaranga.

Ati “ Ubu tumaze kugeza iyi gahunda mu nkambi eshatu zirimo Gihembe, Kigeme na Nyabiheke. Turizera ko mu mpera z’uyu mwaka, tuzaba twamaze kuyigeza mu nkambi zose zo mu gihugu."

Umuyobozi w’Inkambi ya Nyabiheke, Jean Claude Mutabazi, yashimiye Leta y’u Rwanda n’abafatanyabikorwa bayo kuba bagejeje iyo karita mu nkambi , avuga ko itumye bibona nk’abandi baturage bo mu gihugu.

Yagize ati “ Hamwe n’iyi karita, ubu tugeze ku ikoranabuhanga abandi banyarwanda bishimira”.

Uhagarariye UNHCR mu Rwanda, Azam Saber, yijeje impunzi ko uyu muryango uzakomeza gutanga inkunga n’ubundi bufasha binyuze mu mafaranga yoherezwe kuri iyo karita abasaba kuzigama kugira ngo bazatangire gushaka icyo bakwikorera.

Yagize ati “ Buri muntu afite uburyo yakoresha amafaranga ye, iyo tuguhaye amafaranga yo kugura ibintu ugasanga wari ubifite ushobora kuyazigama”.

Uhagarariye PAM, Jean-Pierre de Margerie yashimiye Leta y’u Rwanda yahisemo ko impunzi zajya zihabwa amafaranga aho kwakira ibiribwa, azizeza ko mu minsi mike iri imbere ashobora kuzongerwa.

Impunzi zahawe amakarita y'Ikoranabuhanga
Barerekwa uko bazajya bayikoresha
Minisitiri Seraphine na Azam Saber basobanuriwe uko iyo karita ikora

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved