NURC isanga hakwiye kwirindwa ko abana b’abakoze Jenoside aribo bazishyura imitungo bangije

Yanditswe na Twarabanye Venuste
Kuya 30 Ukwakira 2019 saa 08:39
Yasuwe :
0 0

Komisiyo y’Ubumwe n’Ubwiyunge ivuga ko imanza zitararangizwa mu zaburanishijwe n’Inkiko Gacaca zikwiye kwihutishwa ngo abakoze ibyaha batazasigira ababakomokaho umutwaro wo kwishyura bikabangamira urugendo rw’ubumwe n’ubwiyunge.

Inkiko Gacaca zatangijwe ku mugaragaro mu 2002 zisoza imirimo yazo mu 2012 ziciye imanza zisaga miliyoni ebyiri mu gihe 52,226 zitararangizwa.

Ku wa Kabiri w’icyumweru gishize nibwo Urwego Ngishwanama rw’Inararibonye z’u Rwanda rushinzwe kugira inama Guverinoma muri politiki igihugu kigenderaho rwahuye n’imiryango, ibigo na komisiyo bifite aho bihuriye n’ubuzima bw’abarokotse Jenoside yakorewe Abatutsi, ubumwe n’ubwiyunge, ubutabera, n’uburenganzira bwa muntu, mu nama nyunguranabitekerezo ku kibazo cy’imanza z’imitungo yasahuwe n’iyangijwe muri Jenoside.

Ni ibiganiro byaranzwe no kwisanzura mu gutanga ibitekerezo hagamijwe kugaragariza inararibonye z’u Rwanda imiterere y’ikibazo, icyadindije irangizwa ry’izo manza n’uburyo cyakemuka.

Urwego Ngishwanama rw’Inararibonye rwatangaje ko rwishimiye uburyo abitabiriye ibiganiro bisanzuye bakavuga ukuri ku bikeneye gukorwa.

Umuyobozi wungirije w’urwo rwego, Mukantabana Marie, yabwiye itangazamakuru ko ibyo babwiwe bizabafasha kugira inama guverinoma kubera ko muri gahunda bihaye muri uyu mwaka harimo gutanga inama ku irangizwa ry’imanza zirebana n’imitungo yangijwe muri Jenoside.

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge (NURC), Ndayisaba Fidèle, yavuze ko ku rutonde rw’ibibazo bibangamiye ubumwe n’ubwiyunge icy’imitungo yangijwe n’iyasahuwe muri Jenoside kiza ku isonga.

Yagaragaje ko gikwiye kuva mu kuvuga ko kiri mu mihigo kizakemuka ahubwo bigakorwa nko mu mategeko asanzwe, aho umuhesha w’inkiko ahabwa igihe cyo kurangiza urubanza bitaba akaba yahanwa.

Yakomeje ati “Nidukomeza kubishyira mu mihigo ya buri mwaka, tuzageza ryari ko abantu bamwe bari gusaza abandi barimo gupfa, ikibazo kirarushaho kuremera niba abangije ibintu barimo kudusazana, barimo kugenda nidutangira kubyimurira ku bana babo, uburemere bwa ba bantu na wa mwaga burarushaho gukomera nibihura n’ubukene bamwe bafite. Ibyiza ni uko tubigiramo uruhare bikarangira.”

Ndayisaba avuga ko icyabuze ari uguhuza abantu, kuko “hari n’aho usanga uwishyuza arusha ubushobozi uwishyuzwa.”

Kuri we asanga abantu bakwiye guhura ubwabo bakaganira bashobora no kwirangiriza ikibazo kandi bikarushaho gukomeza ubumwe n’ubwiyunge.

Perezida wa Ibuka, Prof. Dusingizemungu Jean Pierre, yavuze ko abarinzi b’igihango ari bamwe mu bakwiye kwitabazwa muri ibyo biganiro.

Ati “Hagomba kuba n’abantu bari hagati badafite uruhande babogamiyeho nk’abarinzi b’igihango bajya no hagati aho ngaho ibyo biganiro bakabifashamo.”

Aho ngo niho bya bibazo by’abadafite ubwishyu byakemukira kandi mu buryo bwunga.

Umuyobozi mukuru Ushinzwe Imikorere n’Imiyoborere y’Inzego z’Ibanze muri Minaloc, Gakire Bob, yavuze ko imanza zidafite ikibazo bazihaye igihe ntarengwa.

Ati “Hashyizweho tariki ya 28 Ugushyingo 2019 ariko za manza zifite imbogamizi zirenze urwego rw’akagari n’umurenge ni zo zizashyirwa hamwe tukavuga ngo izi ko zifite imbogamizi zirenze hakorwa iki? Icyo gihe hazatangwa umurongo byakorwamo, reka izishoboka zirangizwe izidashoboka zihabwe umurongo ariko nabyo bive mu nzira.”

Urwego Ngishwanama rutangaza ko kurangiza imanza zirebana n’imitungo byakwihutishwa ngo abarenganye barenganurwe mu gihe cya vuba gishoboka, bahabwe ubutabera bukwiye.

Mukantabana ati “Kutarangirizwa imanza z’imitungo cyane ku kwirengagiza kurangiza urubanza waciriwe biganisha ku ngengabitelerezo ya Jenoside, bikaba bibangamira rero bwa bumwe n’ubwiyunge, tumaze kugeraho ku ntambwe ishimishije.”

Imanza zaciwe muri Gacaca zerekeranye n’imitungo ni 1,266,632; kugeza mu mpera za 2018 hari harangijwe 1,244,263, zingana na 98.2%, hasigara 24,371 zitarangijwe.

Izo manza zitarangijwe zaje kwiyongera kuko hari izari zifite irangizarubanza zitari zagaragajwe, zose hamwe zigera kuri 52.226.

Igipimo ku bumwe n’ubwiyunge kigaragaza ko Abanyarwanda bateye intambwe ku bumwe n’ubwiyunge ku kigero cya 92.5%. Biteganyijwe ko iki gipimo cyagera kuri 96% mu 2024.

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge (NURC), Ndayisaba Fidèle, yavuze ko mu buryo bwo kubanisha Abanyarwanda imanza zaciwe muri Gacaca zikwiye kurangizwa hirindwa ko hazabaho inkurikizi z'uruhererekane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza