‘Numva twese twagakwiye kuba twita ku bitureba’

Yanditswe na Philbert Girinema
Kuya 25 Nzeri 2016 saa 06:00
Yasuwe : XX
0

Perezida Kagame yongeye kunenga abababazwa no kubwirwa ko badafite uburenganzira bwo kumenya ibyiza Abanyarwanda bakeneye kurusha bo ubwabo.

Umukuru w’Igihugu yabanengeye muri Rwanda Cultural Day yabereye i San Francisco muri Leta ya California, imwe mu zigize Leta 50 zigize Leta Zunze Ubumwe za Amerika.

Perezida Kagame yagarutse ku kiganiro yatanze mu ntangiriro z’iki Cyumweru muri Kaminuza ya Yale, avuga ko hari abashidikanyije ku byo yavuze ko bimwe mu bihugu bitumva neza politiki yo gushingira ibikorwa ku byifuzo by’abaturage, ahubwo bigashaka gutegeka ibindi uko biyoborwa, uko bibaho no kubifatira ibyemezo binyuranyije n’ibyo byifuzo by’abaturage.

Icyo gihe yagize ati“Bamwe mu bagize Umuryango Mpuzamahanga babona izi mpinduka nk’imbogamizi ku buryo bw’imiyoborere yabo bamenyereye. Bakomeza kwiha uburenganzira bwo kugena ibikwiye gukorwa no kugena ibizabavamo ntibashyire imbere gukorana bya hafi n’abo bireba.”

Perezida Kagame yavuze ko hari ababifashe ukundi ariko ko nta mpungenge bimuteye kuko Abanyarwanda ibyo bakora babikora mu nyungu za bo.

Yakomeje avuga ko abirengagiza ko abandi bakwiye gushingira ku byiyumviro byabo n’indangagaciro zabo bakagena uko babaho ubuzima bwabo n’uko bubaka ibihugu byabo, bakwiye kwita ku bibareba.

Yagize ati “Abantu bamwe bigira abagenzuzi, batekereza ko bazi ibyiza Abanyarwanda bashaka, bakeneye n’uburyo bagomba kubaho ubuzima bwabo. Ni ikihe kibazo kubwira umuntu kwita ku bibareba, numva twese twagakwiye kuba twita ku bitureba.”

Yakomeje ku rugendo aherutse kugirira i New York aho yitabiriye Inteko Rusange y’Umuryango w’Abibumbye, ahura n’abayobozi n’inshuti, umwe aza kumubaza impamvu agaragara neza n’ibintu byose yirirwa asoma mu binyamakuru.

Ati “Nti ariko nta nubwo ngaragara neza gusa, niyumva ko meze neza. Sinzi uko ngaragara ariko nzi uko merewe.”

Perezida Kagame yavuze ko byose abishingira ku muco abanyarwanda bafite ari nabo banamuhaye kuyobora igihugu.

Yibukije Abanyarwanda ko kurwanira agaciro byabaranze mu buzima bw’ubuhunzi bitarangiranye nabwo, ahubwo ko bigomba gukomereza mu guhindura ubuzima kandi buri wese akabigiramo uruhare.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza