Kwamamaza

Umuganda umaze kwinjiriza igihugu asaga miliyari 106 mu myaka icyenda

Yanditswe kuya 22-09-2016 saa 19:38' na Philibert Hagengimana


Nubwo ubukorerabushake bwitabirwa ku rugero rudahagije, umuganda, nka kimwe muri bwo ukaba utaritabirwa nk’uko byifuzwa, ngo ntibyabujije ko kuva mu 2007 kugeza mu 2016 umaze winjiriza u Rwanda miliyari zirenga 106 z’amanyarwanda.

Ubukorerabushake si ubwa none mu muryango nyarwanda, ahubwo bwanahozeho mu muco, aho wasangaga uwagize ikibazo bagenzi be bamutabara bakamufasha, ahari amakimbirane bakayacoca, ibyo byose bigakorwa nta kiguzi cyangwa ikindi gihembo gitegerejwe.

No mu Rwanda rw’ubu ruvugwa imyato mu ruhando rw’amahanga kuko rukataje mu iterambere, ubukorerabushake bufite uruhare runini mu byo iki gihugu cyagezeho, ariko ngo ikigero cy’ubwitabire ntikiragera ku gikenewe nubwo nta bushakashatsi burakorwa nk’uko bitangazwa na Fred Mufuluke, Umuyobozi mukuru ushinzwe imiyoborere n’imikorere y’inzego z’ibanze muri Minisiteri y’Ubutegetsi bw’Igihugu, MINALOC.

Mufuluke ati “Ubwitabire navuga ko turi ku rwego rushimishije ariko sinavuga ko byose bikorwa. Nk’ibikorwa by’umuganda, usanga mu bice by’icyaro witabirwa hafi 100%, ariko wagera mu mujyi ugasanga bitakozwe nk’uko byifuzwa ariko na bo bakora ibyo turabishima. Ariko na none duhagurutse twese tugakora twarushaho kugera kuri byinshi.”

Ikibazo cy’ubwitabire budahagije mu bikorwa by’Ubukorerabushake, ni cyo cyatumye Umuryango Mpuzamahanga urwanya ruswa n’akarengane mu Rwanda (Transperency International Rwanda/TI-Rwanda) utumiza inama nyunguranabitekerezo yari igamije guhuriza hamwe inzego zose bireba ngo harebwe icyakorwa kugira ngo ubwitabire muri ibyo bikorwa bwiyongere.

Aganira n’Abanyamakuru, Umuyobozi w’uwo muryango, Ingabire Marie Immaculée, yagize ati “Twebwe rero nka TIR mu byo dushinzwe harimo no guharanira imiyoborere myiza, n’iby’ubukorerabushake rero birimo, twashatse rero ko abantu bose babikoramo duhure, tugaragaze uko tubibona, dufate n’ingamba, twibaza ngo twakora iki kugira ngo bizamuke? Kuko ikigaragara ntabwo turagera ku rwego twifuza.”

Nubwo umuganda utaritabirwa uko bikwiye, umaze kwinjiriza u Rwanda akayabo

Isuzuma ryakozwe na Minaloc ryasanze umuganda nka kimwe mu bikorwa by’ubukorerabushake bishobora kugenerwa agaciro mu mafaranga, aho ngo kuva watangizwa mu 2007 agaciro k’ibyakozwe mu muganda kagiye kiyongera.

Imibare igaragaza ko mu 2007 ibikorwa by’umuganda byari bifite agaciro ka 4.112.943.849 Frw, muri 2008 byageze kuri 4.852.758.196 Frw, mu 2009 amafaranga y’umuganda yageze kuri 9.451.364.195 Frw, muri 2010-2011 aba 7.347.720.172 Frw, muri 2011-2012 aba 12.524.063.160 Frw, muri 2012-2013 yabaye 12.768.320.156 Frw, muri 2013-2014 aba 17.085.052.086 Frw, muri 2014-2015 yageze kuri 19.033.371.462 Frw na ho muri 2015-2016 umuganda winjiza 19.263.415.427 Frw.

Icyakora ngo hari n’ibindi bikorwa byinshi bitoroshye kubonerwa agaciro mu mafaranga, ariko bigira uruhare runini mu iterambere ry’u Rwanda.

Mufuluke ati “Ubukorerabushake ni gahunda twimakaje imbere mu gihugu cyacu, iyo urebye byinshi mu bikorwa mu gihugu cyacu, hari ibyo wakwibaza ngo ingengo y’imari iva he? Mu by’ukuri ukurikije ingengo y’imari tuba dufite ukareba n’ibikorwa, usanga bitangana. Bitwereka ko hari ibikorwa byinshi cyane bikorwa kubera abakorerabushake benshi dufite mu gihugu cyacu.”

Bimwe muri ibyo bikorwa byinjiriza u Rwanda akayabo, twavuga urugerero rw’abanyeshuri basoza amashuri yisumbuye, abakorerabushake mu bikorwa by’amatora, Abayobozi muri Njyanama z’inzego z’ibanze, ibi kimwe n’ibindi bikorwa ngo bikaba bitajya bibonerwa agaciro mu mafaranga, ariko bikagira uruhare ntagereranywa mu iterambere ry’igihugu.

Minaloc yatangije uburyo bushya bwitezweho kuzamura umusaruro w’Ubukorerabushake

Bumwe muri ubwo buryo bushya Minaloc yatangije harimo ko buri rwego,rwaba urwa Leta cyangwa urwigenga, ibigo byigenga ndetse n’ibya leta, bizajya bikora ubukorerabushake nko guhugura abaturage, ndetse no kubasangiza ibikorwa.

Aha hatanzwe urugero rw’abanyamategeko bashobra kujya bahugura abaturage ndetse bakabagira inama mu by’amategeko, kandi bigakoranwa ubukorerabushake nta kindi kiguzi cya serivisi gitegerejwemo.

Raporo y’Umuryango w’Abibumbye igaragaza ko ubukorerabushake ahenshi ku Isi abantu batarasobanukirwa neza, bityo ibikorwa byabwo ntibihabwe agaciro bikwiye, ari na yo mpamvu bwagenewe umunsi mpuzamahanga wizihizwa tariki ya 5 Ukuboza buri mwaka.

Mu mashami y’umuryango w’abibumbye, harimo na ‘United Nation Volunteers Programme’, rishinzwe gukurikirana ibikorwa by’ubukorerabushake bikorwa hirya no hino ku Isi bigamije iterambere, buri mwaka ukanakora raporo y’ibikorwa byagezweho.

Ingabire (ibumoso) avuga ko bahuye n’izindi nzego kugira ngo barebe icyakorwa ngo ubukorerabushake bwitabirwe
Abakora imirimo y'ubukorerabushake ngo baracyari bake mu Rwanda
Abantu mu nzego zinyuranye bakoraniye hamwe ngo bashake uko ubukorerabushake bwakitabirwa
Biyemeje ko buri kigo kizajya gikora ibikorwa by'ubukorerabushake bitagamije inyungu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved