Kwamamaza

Leta iracyakomerewe n’ubwiyongere bw’imfungwa

Yanditswe kuya 18-11-2016 saa 06:55' na Philbert Hagengimana


Nubwo abakatiwe igifungo kubera ibyaha bya Jenoside barimo bafungurwa, aho kugabanuka kw’imfungwa n’abagororwa muri gereza zo mu Rwanda, bararushaho kwiyongera, ibyo bikaba ari ikibazo kizitiye urwego rw’ubutabera, ari na yo mpamvu yacyihayemo umukoro.

Mu byo Komisiyo y’Igihugu y’Uburenganzira bwa Muntu yakoze mu mwaka wa 2014/2015, harimo no kuba yarasuye gereza 13 muri 14 zo mu Rwanda, aho basanzemo imfungwa n’abagororwa 51 124 barimo abagabo 47001, abagore 3822, abasore 287 ndetse n’abakobwa 14.

Imibare yagaragaje ko abafungiye muri izo gereza kubera ibyaha bisanzwe ari 20849, ni ukuvuga abagororwa 18 574 n’imfungwa 2275, naho abafungiye ibyaha bya Jenoside yakorewe Abatutsi mu 1994 ni 30275.

Benshi muri aba bakatiwe igifungo kugeza ku myaka 19, bityo bamwe barangije igihano cyabo abandi barimo barakirangiza, ari na yo mpamvu hari abibwira ko ubucucike bumaze iminsi buvugwa mu magereza bwaba buri kugabanuka.

Nk’uko byagaragajwe muri raporo y’ibikorwa by’igihembwe cya mbere cy’umwaka wa 2016/2017 mu rwego rw’Ubutabera bw’u Rwanda, umubare w’imfungwa n’abagororwa ntabwo ugabanuka ahubwo uriyongera nk’uko Umunyamabanga Uhoraho muri Minisiteri y’Ubutabera akaba n’Intumwa Nkuru Yungirije ya Leta, Kalihangabo Isabelle yabivuze.

Ibi byanemejwe na Minisitiri w’Ubutabera akaba n’Intumwa Nkuru ya leta, Johnston Busingye, wanagaragaje ko ari kimwe mu bibazo bigikomeye, akagaragaza n’impamvu igitera.

Ati “Ubwiyongere buterwa n’ibintu bibiri, abasohoka kuko barangije ibihano byabo ni bake ku bakatirwa ibihano by’igifungo kubera ibyaha […] Ikindi muribuka mu minsi yashize, mu bunzi hari harimo ububasha bwo gukemura ibintu byinshi by’ibyaha, mu mezi nk’ane cyangwa atanu ashize Inteko Ishinga Amategeko ibuvanaho.”

Akomeza vuga ko ibyavuye muri ubwo bubasha bw’abunzi byose byahise byimukira mu nkiko z’ibanze nk’ibyaha byoroheje, ariko ababikora inkiko zibakatira gufungwa amezi atanu, amezi atandatu n’ibindi.

Icyakora ngo hari ibyiringiro ko mu minsi iri imbere byazakemuka, dore ko hari inzira nyinshi zitari igifungo ziri gutekerezwa, nk’igifungo cy’akuma k’ikoranabuhanga umuntu bamushyira ku kuboko, ubundi bakamushyiriraho amabwiriza.

Ubwiyongere bw’imfungwa n’abagororwa, ikimenyetso cy’umusaruro mwiza w’ubutabera

Gusa n’ubwo bimeze bityo, Umuyobozi w’Urwego rw’Igihugu rushinzwe Imfungwa n’abagororwa, CGP George Rwigamba, ashimangira ko kutagabanuka k’ubucucike mu magereza ari ikimenyetso cy’umusaruro mwiza w’Urwego rw’ubutabera kuva mu bugenzacyaha kugeza ku nkiko zica imanza.

Yagize ati “Ubundi byari bikwiye ko ubucucike bugabanuka mu magereza kuko abari bafungiye icyaha cya Jenoside bakatiwe igifungo guhera ku myaka 19 kumanura, bari bageze igihe cyo gutaha. Ariko ikigaragara ni uko muri iyi minsi aho kugira ngo bagabanuke ahubwo biyongera. Impamvu rero igaragara ni uko bishoboka ko inzego zishinzwe gukurikirana icyaha, kukigenza ndetse n’ubutabera, zishobora kuba zikora neza muri iki gihe ku buryo ibyaha bigaragara.”

Ibyaha bigaragara nk’ibituma imfungwa n’abagororwa batagabanuka, ni ibisanzwe nk’ubujura, gusambanya abana n’abagore ku ngufu no kunyereza umutungo wa leta.

CGP Rwigamba avuga ko kuba inzego z’ubutabera n’iz’ubugenzacyaha zikora neza kurusha uko byahoze, bituma abakora ibyaha batahurwa ari benshi.

Icyakora ngo ubwiyongere bw’imfungwa n’abagororwa ntibyoroshye guhita bugaragazwa mu mibare, kuko hari abarangiza igihano bahita bafungurwa ugasanga abandi bakoze cyangwa bahamijwe ibyaha bahise bafungwa. Gusa ngo CGP Rwigamba agenekereje, avuga ko mu mezi atandatu ashize, imfungwa n’abagororwa bamaze kwiyongeraho 4000.

Inzego zose z’Ubutabera mu Rwanda zatahanye umukoro

Ubwo kuri uyu wa 17 Ugushyingo inzego zose zifite aho zihuriye n’ubutabera zari zateranye ngo zirebere hamwe ibyakozwe mu gihembwe cya mbere cy’umwaka wa 2016/2017, zihaye intego yo gufatanya mu ngamba zigamije kugabanya ubucucike mu magereza.

Zimwe muri izo ngamba harimo kuvugurura Itegeko rihana ku buryo rishobora kujya ritanga n’imirimo nsimbura gifungo ndetse n’isubikagihano ku byaha bimwe na bimwe ndetse n’imbabazi, ariko ibyo byose bikazajya bigenwa n’inkiko.

Minisitiri Busingye avuga ko impamvu imfungwa zitagabanuka mu magereza ari uko abafungurwa ari bo bake ku bafungwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved