“Ntituzibagirwa ubugome bwa Noheli, Karera na Mwamini” Abarokokeye Jenoside ku Kivugiza

Yanditswe na Emma-Marie Umurerwa
Kuya 8 Kamena 2019 saa 08:15
Yasuwe :
0 0

Abarokotse Jenoside yakorewe Abatutsi bo ku Kivugiza mu Karere ka Nyarugenge bavuga ko hari amazina y’abantu adateze kubava mu mutwe kubera ubugome ndegangakamere bari bafite muri Jenoside yakorewe Abatutsi.

Ku isonga haza umunyamakuru wa Radio RTLM, Hitimana Noheli, Nyirandegeya Mwamini Espérance wakoreraga Air Rwanda hamwe na Karera François wari Su Perefe w’Umujyi wa Kigali.

Amazina y’aba bantu yagarutsweho cyane mu buhamya bwatanzwe n’abacitse ku icumu mu Kagali ka Kivugizi mu Murenge wa Nyamirambo, kuri uyu wa 8 Kamena 2019 ubwo bibukaga ku nshuro ya 25 Jenoside yakorewe Abatutsi muri Mata 1994.

Karera Alphonse yagize ati “Mwamini yakoraga muri Air Rwanda, akaba yari afite n’akabari gakomeye hano Kivugiza ni nako abagabo b’abatutsi benshi banyweragamo. Jenoside ibaye yahise yambara imyenda ya gisirikare atangira kwica ahereye ruhande kuko abenshi yabaga azi naho batuye.”

Yakomeje avuga ko nka Mwamini yakoze ibikorwa bya kinyamaswa ndetse bamwe mu bagabo yagiye yica yabishe urubozo.

Ati “ Hari n’umugabo yishe arangije amuca ubugabo abushyira umugore we. Umugabo we nawe wari umututsi yashatse kumwica Imana iramurokora ubu ariho. Undi muntu tutazibagirwa ni Karera François wari Su Perefe w’Umujyi wa Kigali yirirwaga atunda interahamwe azizana kwica abatutsi ba Kivugiza dore na we yari atuye muri aka gace.”

Furuma Jean Bosco wiciwe umugore na bamwe mu bana be. Yavuze ko yari aturanye n’umunyamakuru wa Radio RTLM, Hitimana Noheli.

Ubwo Jenoside yatangiraga, Noheli yajyaga kuri radiyo akarangira Interahamwe uduce abatutsi bo ku Kivugiza bihishemo.

Ati “ Yajyaga kuri radiyo RTLM ubundi akarangira interahamwe uduce abatutsi ba Kivugiza bihishemo bakaza bakabica n’abatuye ahandi mu gihugu yabaga azi aho bihishe wagira ngo yari afite abakomisiyoneri bamuha amakuru.”

Abafite ababo biciwe ku Kivugiza bifuza ko ahantu hazwi hagiye hicirwa umubare munini w’Abatutsi nko mu ishuri ryo kwa Gadhafi, Kiliziya ya Mutagatifu Karoli Rwanga, mu Busitani bw’Ababikira b’Abakarumerita n’ahandi, hashyirwa ikimenyetso kigaragaza amateka y’ibyabahabereye.

Ibi bikaba byanagarutsweho n’Umujyanama wa CNLG mu by’amategeko, Dr Bideri Diogene, wavuze ko amateka ya jenoside yakorewe Abatutsi ku Kivugiza akwiye kwandikwa.

Ati “Ikintu nabonye nuko hari byinshi bigomba gukorwa mu bijyanye no kwandika amateka ya Kivugiza, amateka arahari ariko ntabwo azwi ntiyanditse, ikindi ni ibimenyetso bya jenoside bidafashwe neza. Hari byinshi byo gukora mu kubungabunga ibyo bimenyetso kugirango iki gikorwa cyo kwibuka kibe kinafite aho gishingiye.”

Abarokotse Jenoside yakorewe Abatutsi bo ku Kivugiza bavuga ko hari tariki ya 13 na 23 Mata 1994 atazigera yibagirana mu mateka yabo, kuko aribwo bagabweho ibitero bikomeye n’Interahamwe ndetse n’inzirabwoba bakica Abatutsi benshi.

Abarokokeye ku Kivugiza bakoze urugendo rwo kwibuka
Furuma Jean Bosco avuga ko umunyamakuru Noheli yarangiraga interahamwe aho abatutsi bihishe
Amwe mu mafoto y'Abatutsi biciwe ku Kivugiza
Aha hahagaze abantu ni imbere y'aharo akabari ka Noheli aho bivugwa hari bariyeri yiciwe abatutsi benshi bo ku Kivugiza
Iyi nzu yahoze ari akabari k'Umunyamakuru Noheli ngo niho interahamwe n'inzirabwoba bakoreraga inama zo kwica Abatutsi
Karera Alphonse bakunda kwita Kitso yavuze ko hari amazina y'Interahamwe atazibagirana mu mitwe y'abarokotse Jenoside
Umujyanama wa CNLG mu by'amategeko, Dr Bideri Diogene (hagati) yasabye ko amateka ya jenoside yakorewe Abatutsi ku Kivugiza yandikwa
Furuma Jean Bosco yerekana ifoto y'umugore we wishwe urw'agashinyaguro muri jenoside

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza