Kwamamaza

Nta nyungu u Rwanda rwagira mu kwica cyangwa kubona Nyamitwe apfuye- Lt Col Ngendahimana

Yanditswe kuya 29-11-2016 saa 18:32' na Philbert Girinema


Nyuma y’igitero cyari kigambiriye kwivugana Umujyanama wa Perezida Pierre Nkurunziza, Willy Nyamitwe, u Burundi bwongeye gutunga agatoki u Rwanda kuba inyuma y’uwo mugambi; igikorwa kije gikurikira ibindi birego iki gihugu kidahwema gushinja umuturanyi wacyo.

Mu rukerera rwo kuri uyu wa Kabiri nibwo hamenyekanye amakuru y’uko Willy Nyamitwe usanzwe ari Umujyanama wa Perezida Nkurunziza mu bijyanye n’itangazamakuru n’itumanaho, yagabweho igitero n’abantu bitwaje imbunda bamukomeretsa ku kuboko, umupolisi bari kumwe we ahasiga ubuzima.

Umuvugizi w’Igipolisi cy’u Burundi, Pierre Nkurikiye, yabwiye itangazamakuru ko mu iperereza ryakozwe, hari abamaze gutabwa muri yombi harimo umusirikare ufite ipeti rya colonel.

Ati “Nyuma y’iperereza ryakozwe, hari umusirikare twataye muri yombi kandi uyu [Nyamitwe] yari amaze gusimbuka ibico bamuteze inshuro ebyiri. Mu gukurikirana abo banyabyaha, hari umu-caporal twafashe n’imbunda ebyiri za pistol wemera ko yari afite umugambi wo kwica umujyanama [wa Perezida] ku mabwiriza aturuka i Kigali.”

“Hari n’undi musirikare w’umunyarwanda ubirimo hamwe n’abandi Barundi babiri bakoreraga mu Rwanda. Amabwiriza n’uburyo bwo kwifashisha muri uwo mugambi, byagombaga gutangwa n’umusirikare mukuru mu ngabo z’u Burundi, Col Dushimagize Dieudone Alias Gangi nawe ubu uri muri gereza ari nawe wagombaga kuyobora ubwo bwicanyi.”

Ibyo birego bije bisanga ibindi byinshi u Burundi bushinja u Rwanda kuva bwakwinjira mu bibazo bya politiki muri Mata 2015, harimo kuvuga ko u Rwanda rushyigikira abateza umutekano muke muri iki gihugu.

Umuvugizi w’Ingabo z’u Rwanda, Lt Col René Ngendahimana, yabwiye IGIHE ko u Burundi bukwiye kuba bugaragaza ibimenyetso bushingiraho buvuga ko u Rwanda rwagize uruhare muri uwo mugambi, ashimangira ko nta nyungu n’imwe rwagira mu rupfu rwa Nyamitwe.

Ati “Ayo makuru natwe twayabonye mu binyamakuru nk’abandi kandi kuba bavuga ko haba hari umusirikare w’u Rwanda cyangwa u Rwanda rubiri inyuma, uretse kubivuga, bakabaye babitangira n’ibimenyetso bifatika kuko n’uwo musirikare bavuga bakabaye bavuga bati ni runaka, amazina ye ni aya, ibimuranga ni ibi kuko abasirikare b’u Rwanda bose bafite ibibaranga.Twebwe icyo tuzi ni uko ibyo ari ibinyoma bidafite ishingiro.”

Yakomeje agira ati “Ikindi kandi abantu bakwiye kumenya, iyo ntabwo ari imikorere cyangwa se gahunda y’u Rwanda kwivugana abayobozi b’ikindi gihugu. Nta nyungu n’imwe u Rwanda rwagira mu kwica cyangwa mu kubona Nyamitwe apfuye kuko ntacyo arutwaye, nta bwoba na buke ateye u Rwanda ku buryo rwakumva rutekanye ari uko apfuye.”

Umuvugizi w'Ingabo z'u Rwanda, René Ngendahimana

Lt Col Ngendahimana yavuze ko Ingabo z’u Rwanda zidashobora kujya ‘mu bikorwa nk’ibyo bidasobanutse’ ndetse ko ‘biriya ni amagambo adafite ukuri’. Yanashimangiye ko ibi birego bidashobora kwangiza isura y’ingabo z’u Rwanda ‘kubera ko nta kuri kurimo, isura y’igisirikare nta kibazo ifite’.

Minisitiri w’Ububanyi n’Amahanga w’u Rwanda, Louise Mushikiwabo, aherutse kuvuga ko u Rwanda rwahisemo gutuza ku bikorwa byaba ‘ubushotoranyi n’indi myitwarire idahwitse twabonye kuva icyo gihugu [u Burundi] cyakwinjira mu mvururu’.

Ibirego by’u Burundi bidasiba ku Rwanda harimo n’ibishingiye ku mpunzi rwakiriye, byatumye ruheruka gufata umwanzuro wo gushaka igihugu gishobora kuzakira ari nabyo biri gukorwaho muri iki gihe.

Inkuru bifitanye isano:

- Umujyanama wa Perezida w’u Burundi, Willy Nyamitwe yarusimbutse

- U Rwanda n’u Burundi bibanye bite? Ibisubizo bya Minisitiri Mushikiwabo

@PGirinema


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved