Kwamamaza

Nta mwanya w’imfabusa dufite mu gihugu cyacu – Perezida Kagame

Yanditswe kuya 12-09-2016 saa 12:09' na Philbert Hagengimana


Perezida Kagame yeruriye abanyarwanda ko abandika, abavuga n’abakora ubusa cyangwa ibisenya batajya basinzira, asaba abanyarwanda kutaryumaho na bo bagatekereza kandi bagakora, bakazirikana ko nta mwanya w’imfabusa uri mu Rwanda.

Ibyo ni bimwe mu bikubiye mu butumwa yagejeje ku banyarwanda mu muhango wo gusoza icyiciro cya gatatu cy’Intagamburuzwa, Itorero ry’abanyeshuri bahagarariye abandi mu Mashuri Makuru na Kaminuza mu Rwanda.

Mu mpanuro ze, Perezida Kagame yihanangirije abanyarwanda ku gupfukirana ibitekerezo byabo, anababwira ko bashobora kwitirirwa ibitekerezo bibi, bisenya biba byagaragajwe n’abanzi b’u Rwanda, aboneraho no kubibutsa ko hari itandukaniro ku watekereje agakora n’uwatekereje akaryumaho.

Ati “Hari ikinyuranyo kinini cyane rero, hagati yo kugira imbaraga, kugira ibitekerezo byiza, ukicecekera no kugira imbaraga, ukagira ibitekerezo byiza ukabishyira mu bikorwa. Ibyo washyize mu bikorwa ni byo bitanga umusaruro, ibindi byabaye imfabusa.”

Yakomeje avuga ko izo mfabusa nta mwanya zifite mu Rwanda, bityo abateye batyo bagomba guhindura imitekerereze n’imibereho, ati “Ntabwo twifuza kuba igihugu rero cy’abantu b’imfabusa cyangwa bakora ibintu by’imfabusa… si nifuza ko mwajya mu mfabusa, nta mwanya w’imfabusa dufite mu gihugu cyacu, mugire icyo mukora [Do one thing or another; do something].”

Abanyarwanda bafite icyita rusange

Mu gushishikariza buri munyarwanda kugira icyo akora agamije guteza imbere igihugu cye, yagize ati “Gira icyo ukora icyo ari cyo cyose wifuza. Ni cyo tubifuriza, gutekereza neza, kugira icyo ukora gitandukanye n’icy’undi, turatandukanye, rero hari n’aho bigera tugatekereza bitandukanye.”

Icyakora ngo ibyo ntibikuraho na kimwe mu byo u Rwanda rwahisemo (Ubumwe, gukorera mu mucyo no kureba kure) cyane ko gukorera hamwe bitavuze gutekereza kimwe, ariko kandi ngo Abanyarwanda bafite icyita rusange ari bwo bwa bumwe.

Perezida Kagame ati “Oya, bahujwe n’ibintu bitandukanye ariko kubera intego imwe, intego yacu y’u Rwanda ni amajyambere, kuba igihugu buri wese yishimira uhereye no kuri ba nyiracyo. Ibyo ntibivuze ko tuzatekereza kimwe, ntibivuze ko buri wese ameze nk’undi, ariko hari icyo duhuriraho, hari icyita rusange [Common Denominator].”

Urubyiruko rwasabwe guhangana n’abasebereza u Rwanda ku mbuga nkoranyambaga

Perezida Kagame yabwiye urwo rubyiruko ko iyo umuntu atavuze cyangwa ngo yandike, uwabitinyutse akabikora, ibye bihabwa agaciro ndetse bikanitirirwa abatavuze kabone n’ubwo byaba ari amanjwe.

Umukuru w’Igihugu yabanje gusobanurira urwo rubyiruko uburyo rushyize hamwe rugahuza amaboko nta wapfa kurumeneramo ngo adindize u Rwanda mu ntego yarwo y’iterambere.

Ati “Murebe uko mungana hano, ntabwo muri bake n’ubwo igihugu gifite abanyarwanda benshi cyane kurusha abicaye hano, ariko n’abari hano ntabwo ari bake. Ariko mpereye kuri mwe muri hano, ingufu ziri hano muri iki cyumba ni nyinshi cyane,[…] Ingufu mvuga ntabwo ari za zindi zo guterura, na zo ni nyinshi, ndavuga ingufu z’ibitekerezo. Ndavuga ingufu z’ibikorwa bihereye ku bitekerezo biri muri iki cyumba.”

Icyakora kandi ngo n’ubwo izo ngufu ari nyinshi cyane, “iyo utazubatse neza, ushobora kuzihindura ubusa, cyangwa bake bakazihindura ubusa.”

Perezida Kagame yakomeje agira ati “Ubahagarariye kare yigeze kuvuga ikintu cya social media (imbuga nkoranyambaga), umuntu ashobora kuba umwe gusa cyangwa babiri muri mwe, bagakoresha ikoranabuhanga risigaye ririho, bigasa nk’aho abavugira mwese, kandi atari byo, cyangwa se akarwanya ibyo mutekereza, mukora, mushaka mwese, ku buryo bigaragara nk’aho koko ari we watsinze. Uzi aho bituruka? Ni ukuvuga ngo yakoresheje uburyo bumwe buri wese muri mwe ashoboye gukoresha, ariko we yabikoresheje mwe ntimwabikoresheje.”

Yakomeje agira ati “Ni ukuvuga ngo abantu babiri batatu hano iyo bashiritse ubute cyangwa iyo bafite umugambi wo kwandika bakawuzuza cyangwa bakawunoza, kubera ko yashiritse ubute akandika, abandi bakagira ubute, bakiryamira bakisinzirira, uwanditse, igitekerezo cye ni cyo cyumvikana, ni cyo kigaragara, ni cyo abantu bazatega amatwi, ni cyo bazumva ko ari cyo, cyitirirwe na wa wundi utanditse kandi batekereza mu buryo butandukanye.”

Yakomeje avuga ko abafite ubute bwo kwandika “ibyabo ntaho bizajya, ntabwo bizumvikana. Abazabona bya bindi bya babiri bya batatu, bazabona ko ari cyo gitekerezo kizima, bazabona ko ari cyo gihagarariye na ba bandi basinziriye batanditse, icyo gitekerezo ni cyo kizimakazwa. Murabyumva? Murabizi kandi Social media (imbuga nkoranyambaga) ni ko ikora.”

Gukoresha imbuga nkoranyambaga ndetse n’ikoranabuhanga muri rusange, ni umwe mu mihigo Intagamburuzwa z’icyiciro cya gatatu zahigiye imbere ya Perezida wa Repubulika Paul Kagame.

Ndayisaba Eustache wari uzihagarariye yagize ati “Duhize kurinda umutekano n’ubusugire by’igihugu, turwanya iterabwoba, ubuhezanguni n’abagambanira igihugu aho bava bakagera, cyane cyane tunyomoza abasebya igihugu cyacu twifashishije ikoranabuhanga.”

Perezida Kagame yasabye buri munyarwanda wese kuticara ngo ategereze ko ibyiza bizizana
Perezida Kagame yasabye urubyiruko rw'u Rwanda kurwanira ahazaza h'igihugu n'ahabo ku giti cyabo
Perezida Kagame yumva ibibazo by'Inkomezamihigo
Minisitiri w'Uburinganire n'Iterambere ry'Umuryango, Dr Gashumba Diane
Charles Muligande usigaye ari Umuyobozi muri Kaminuza y'u Rwanda nawe yari ahari
Minisitiri w'Uburezi, Papias Musafili Malimba, yungurana ibitekerezo na Minisitiri Gashumba
Perezida Kagame ateze amatwi Minisitiri w'Uburezi
Umwe mu Nkomezamihigo ageza ikibazo ku Mukuru w'Igihugu
Umutahira Mukuru w'Intore akaba n'Umuyobozi wa Komisiyo y'Itorero ry'Igihugu, Rucagu Boniface

Amafoto: Village Urugwiro


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved