Umutingito wangije inzu eshatu mu turere dutandukanye tw’igihugu-MIDIMAR

Yanditswe na Ishimwe Israel
Kuya 11 Nzeri 2016 saa 11:08
Yasuwe : XX
0

Umutingito wumvikanye ku gicamunsi cyo kuri uyu wa Gatandatu mu karere ka Afurika y’Iburasirazuba ndetse no mu Rwanda by’umwihariko wangije inzu eshatu mu turere dutandukanye tw’igihugu, ariko nta muntu waburiyemo ubuzima nkuko bitangazwa na Minisiteri ifite ibiza mu nshingano, MIDIMAR.

Uyu mutingito wari uri ku gipimo cya 5.7 mu karere watambutse ahagana mu masaha ashyira saa munani n’igice umara hafi umunota.

Umuyobozi w’Ishami rishinzwe ubutabazi no gusana ibyangijwe n’ibiza muri MIDIMAR, Philippe Habinshuti yavuze batangije iperereza rigamije kureba ibyangirikiye muri uyu mutingito.

Yagize ati “ Umutingito wabaye ku munsi w’ejo nta gikuba waciye. Twatangiye gukora iperereza ngo tumenye amakuru mpamo ku bijyanye n’ibyaba byarangiritse. Twohereje itsinda ry’abakozi bacu gukusanya amakuru y’ibyaba byangiritse gusa twizeye ko atari byinshi kuko nta bantu batubwiye ko baba bahuye n’ikibazo runaka.”

Habinshuti yatangaje ko amakuru bafite hari inzu zigera kuri eshatu zo mu turere dutandukanye zangiritse ariko ko zari zishaje.

Ati “ Amakuru dufite n’uko mu turere twa Ngoma, Kayonza na Gisagara hari inzu eshatu zangiritse ariko nazo zari zishaje cyane ku buryo umuntu atavuga ko ari umutingito wabigizemo uruhare.”

Ku munsi w’ejo nibwo itsinda ry’abantu bari gukusanya amakuru kuri uyu mutingito rizatanga raporo ya nyuma igaragaza ibyangijwe n’umutingito mu gihugu hose.

Habinshuti yagize ati " Hari aho twumvise ko inzu zagiye ziyasa imitutu ariko byose bizamenyekana neza nyuma yo gukusanya amakuru."

Mu Mujyi wa Kigali, mu bice bya Kimisagara na Gikondo hari aho inzu zasadutse ariko nta yaguye.

Umutingito ukomeye wangije ibintu byinshi mu Rwanda wabaye ku itariki ya 3 Gashyantare 2008, aho wibasiye cyane uturere twa Nyamasheke na Rusizi mu Ntara y’Iburengerazuba, usenya ibigo by’amashuri 45, inyubako z’ibigo nderabuzima, ugahitana n’abantu 37, mu gihe abasaga 646 bakomeretse bikomeye.

Ku rwego rw’akarere umutingito waherukaga kumvikana muri 2004 wari ku gipimo cya 4.7.

Inkuru bifitanye isano:

Umutingito ukomeye wakuye benshi umutima i Kigali (Amafoto+Video)

Umutingito ukomeye wakuye umutima Abanyakigali wahitanye benshi muri Tanzania

Habinshuti Philippe, Umuyobozi ushinzwe ubutabazi no gusana ibyangijwe n'ibiza muri MIDIMAR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza