‘Nta mbogamizi Afurika yishyize hamwe itarenga’ –Kagame avuga ku ntsinzi ya Mushikiwabo

Yanditswe na Mukaneza M.Ange
Kuya 12 Ukwakira 2018 saa 08:23
Yasuwe :
0 0

Perezida Paul Kagame yashimiye Louise Mushikiwabo watorewe kuba Umunyamabanga Mukuru w’Umuryango w’Ibihugu bivuga Igifaransa (OIF), anashimangira ko intsinzi ye ari ikimenyetso ko nta cyananira Afurika yishyize hamwe kandi ikabyiyemeza.

Mu gitondo cyo kuri uyu wa Gatanu nibwo Mushikiwabo wari usanzwe ari Minisitiri w’Ububanyi n’Amahanga w’u Rwanda, yatorewe kuyobora OIF.

Yegukanye intsinzi ahigitse Michaëlle Jean wari usanzwe awuyobora, mu matora yabereye mu nama y’abakuru b’ibihugu na za Guverinoma i Erevan muri Arménie.

Abinyujije kuri Twitter, Perezida Kagame yifashishije ururimi rw’Igifaransa mu gushimira Abanyafurika bose ndetse n’ibindi bihugu bigize OIF byashyigikiye umukandida watanzwe n’u Rwanda.

Ati “Ni umwanya w’amateka kuri twebwe twese Abanyarwanda n’Abanyafurika, bigaragaza ko nta mbogamizi Afurika yishyize hamwe kandi yabyiyemeje itarenga. Ndagushimiye cyane Louise Mushikiwabo.”

Mu bandi bashimiye Mushikiwabo banamwifuriza imirimo myiza mu nshingano nshya harimo Madamu Jeannette Kagame wamuhaye umukoro wo kugeza urumuri rw’agaciro mu bihugu bigize OIF.

Ati “Genda Louise Mushikiwabo, Imbuto nziza y’igihugu cy’abakurambere, genda mukobwa wa Afurika! Komeza uzamure urumuri rw’agaciro mu bakoresha Igifaransa.”

Umuyobozi wa Komisiyo y’Umuryango wa Afurika Yunze Ubumwe, Moussa Faki Mahama, nawe yavuze ko kuba Mushikiwabo yatowe bishimangira ko abakoresha Igifaransa bamubonyemo ubunararibonye n’imiyoborere myiza.

Ati “Nshimishijwe no kuba umukandida w’Umunyafurika Louise Mushikiwabo yatowe mu bwiganze busesuye. Ibi bigaragaza ko imyitwarire, ubunararibonye n’imiyoborere ye byahawe agaciro n’umuryango w’abakoresha Igifaransa. Ndagushimiye.”

Mushikiwabo yashimiye abakuru b’ibihugu bya Afurika, n’indi migabane ndetse n’abantu bose bamushyigikiye kugera ageze ku mwanya w’Umunyabanga Mukuru wa OIF.

By’umwihariko ariko yagaragaje ko ubutumwa Madamu Jeannette Kagame bwamukoze ku mutima, aho yagize ati “ Ubutumwa bwa madamu (Jeannette Kagame) buje bunyura umutima, kuri uyu musozo w’umunsi warimo akazi kenshi n’amarangamutima. Urakoze cyane!”

Mu bandi bagaragaje ko bishimiye intsinzi ya Mushikiwabo babinyujije ku mbuga nkoranyambaga cyane cyane Twitter harimo; Louis Michel, umudepite mu Muryango w’Ubumwe bw’u Burayi.

Umuyobozi w’Inteko Ishinga Amategeko y’Umuryango w’Ibihugu bya Afurika y’Uburasirazuba, Martin Ngoga nawe ni umwe mu bamushimiye avuga ko yagize amahirwe yo kuyobora mu gihugu gifite umuyobozi ugutegurira kuzitwara neza mu bihe biri imbere, kandi u Rwanda rutewe ishema n’ibyo yagezeho.

Perezida Paul Kagame yashimiye Louise Mushikiwabo watorewe kuba Umunyamabanga Mukuru w’Umuryango w’Ibihugu bivuga Igifaransa
Mushikiwabo yashimiye abakuru b’ibihugu bya Afurika, n’indi migabane ndetse n’abantu bose bamushyigikiye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza