Nta gihugu twari dufite, twari dufite amabandi y’abicanyi - Minisitiri Busingye

Yanditswe na Habimana James
Kuya 1 Nyakanga 2019 saa 09:31
Yasuwe :
0 0

Minisitiri w’Ubutabera akaba n’Intumwa nkuru ya Leta, Johnston Busingye, yanenze mu buryo bukomeye ubuyobozi bwateguye bukanashyira mu bikorwa Jenoside yakorewe Abatutsi mu 1994, uburyo nta terambere rindi bwagejeje ku guhugu uretse guhorana umugambi wo kurimbura Abatutsi.

Ibi byagarutsweho kuri uyu wa Mbere mu muhango wo gushyingura mu rwibutso rushya Abatutsi 15,000 biciwe muri Stade Gatwaro, muri perefegitura ya Kibuye.

Perefegitura ya Kibuye yari ituwe n’Abatutsi benshi cyane cyane mu makomine ya Gitesi, Rwamatamu, Gishyita, Mabanza, Bwakira n’ahandi, ari nayo mpamvu yari yarasigajwe inyuma mu majyamberena na Leta ya Perezida Juvenal Habyarimana.

Mu gihe cya Jenoside, kugirango abicanyi babashe kwica Abatutsi muri Kibuye babanje kubarundanya, hagati ya 7-14 Mata 1994. Bagejejwe muri Stade Gatwaro, habanje ibikorwa byo kubicisha inyota n’inzara kuko babanje guca amatiyo ku itegeko ryatanzwe na Perefe Clement Kayishema.

Mu buhamya butangwa n’abarokoye muri aka gace, bavuga ko Bagirishema Ignace wari burugumesitiri wa Komine Mabanza, yagize uruhare rukomeye mu kwegeranya Abatutsi abajyana kuri Stade Gatwaro; Urukiko rwa Arusha rwamugize umwere tariki ya 7 Kamena 2001, ubu aba mu Bufaransa.

Tariki ya 18 mata 1994 nibwo ubwicanyi ku bari bahungiye muri Stade Gatwaro bwatangijwe na Perefe Kayishema, arasa uwitwaga Munyakaragwe Ezechiel.

Minisitiri Busingye yavuze ko ubuzima abantu babayemo muri biriya bihe, badakwiye kuvuga ko bari bafite igihugu.

Ati “Nta gihugu twari dufite twari dufite amabandi y’abicanyi kuko nta kindi akora, imihigo yabo n’iterambere byari ukwica abantu, warangiza ukabishyira muri raporo. Twabonye mu rwibutso raporo zose zakorwaga, zari iza bariyeri, abagomba kwicwa.”

“Abatutsi batotejwe mu bihe bitandukanye kugeza ubwo barimbuwe mu 1994, iki kintu iyo kigarutsweho tujye tugiha umwanya kandi tugitekerezeho buri gihe, ubuzima bw’iriya myaka bwari ubuzima bubi. Iriya myaka 35 abanyarwanda tujye tuyitekerezaho cyane. Byashobokaga gute ko abantu bagira uburenganzira bwo kwica abandi? Dukomere twese kuko ntabwo bizongera kuba muri iki gihugu."

Perezida wa Ibuka, Prof Jean Pierre Dusingizemungu, yashimye ko muri uru rwibutso harimo igice cyashyizwemo aba bantu bose bagize uruhare rwo kurimbura Abatutsi, ku buryo umuntu wese uzajya ahaza azababona.

Ambasaderi Mukangira Jacqueline warokokeye muri aka gace, yashimiye ingabo zari iza FPR-Inkotanyi zabarokoye, ko iyo batahaba na we yagombye kuba yarapfuye.

Ati “Tuzirikana ibigunda mwatuvanyemo, urukundo n’ibindi, iyo sura yanyu ntabwo twayibagirwa, ubuyobozi bukuru kandi bwadufashije kubana n’abatwiciye kandi harimo n’abataradusabye imbabazi.”

Yavuze ko mbere ya Jenoside abari batuye muri Kibuye babayeho mu buzima bubi burimo gutotezwa bigera aho bicwa mu 1994.

Mu Batutsi bashyinguwe mu rwibutso rushya, harimo Abatutsi baturutse Rubengera aho bakoreshejwe urugendo rwa kilometero 20 mbere yo kugera muri Stade Gatwaro.

Abashinjwa uruhare mu iyicwa ry’Abatutsi muri Stade Gatwaro bamwe ntibaragezwa imbere y’ubutabera, barimo nka Dr Charles Twagira na Claude Muhayimana bari mu Bufaransa.

Minisitiri Busingye yavuze ko ubuyobozi bwateguye Jenoside yakorewe Abatutsi nta kindi bwakoraga uretse gutegura abo bwagombaga kwica gusa
Uru rwibutso rwa Gatwaro rwashyinguwemo imibiri y'abiciwe muri Stade Gatwaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza