Nta gihindutse, 2019 izasiga umuhanda wa kaburimbo Huye-Kibeho-Munini ukoreshwa

Yanditswe na Philbert Girinema
Kuya 16 Nzeri 2016 saa 03:39
Yasuwe : XX
138 71

Ikigo cy’Igihugu gishinzwe iterambere ry’ubwikorezi (RTDA), cyatangaje ko nta gihindutse ibikorwa byo kubaka umuhanda Huye-Kibeho-Munini bizatangira muri Kamena 2017, bityo ukazaba watangiye gukoreshwa mu mpera za 2019.

Uyu mushinga wo kubaka umuhanda ureshya na kilometero 63, ni rimwe mu masezerano Perezida wa Repubulika yari yemereye abaturage b’Akarere ka Nyaruguru mu mwaka wa 2013.

Umuyobozi w’Ishami rishinzwe gukurikirana ishyirwa mu bikorwa ry’imishinga muri RTDA, Kabera Olivier, yabwiye IGIHE ko wagombaga gutangira kubakwa muri 2015 ariko ugakererezwa n’uko inkunga yo kuwubaka yari itaraboneka.

Akomeza avuga ko Minisiteri y’Imari n’Igenamigambi yamaze kuganira na Guverinoma y’u Bushinwa kugira ngo itere inkunga ibikorwa byo kubaka uwo muhanda nibura biteganyijwe ko bizatwara miliyoni 80 z’amadolari.

Yagize ati “Twakoze inyigo muri 2013, Minisiteri y’Imari n’Igenamigambi, yasabye Guverinoma y’u Bushinwa binyuze muri Banki yabwo y’igihugu ko yatanga inkunga, biracyari mu nzira. Nibigenda neza muri Kamena umwaka utaha turateganya gutangira.”

Kabera avuga ko bidatinze hari Abashinwa bazaza gusuzuma inyigo y’uriya muhanda bakareba niba amafaranga u Rwanda rwabasabye bazemera kuyatanga.

Ikindi cyakerereje iyubakwa ry’umuhanda Huye-Kibeho-Munini ngo ni imishinga ikomeye igihugu cyabanje gushyiramo imbaraga nyinshi, harimo uwa Kivu Belt, umuhanda Nyagatare- Rukomo-Base n’uwa Huye –Rusizi.

Kabera yemeza ko ubu nta kindi gishyizwe imbere uretse kubaka imihanda Ngoma -Nyanza na Huye- Kibeho- Munini ku buryo mu 2019 uzaba wabonetse.

Yagize ati“Bitewe n’uko burya ibirometero bibiri by’umuhanda wa kaburimbo byubakwa mu kwezi kumwe, bigenze neza mu mpera za 2019 twaba tuwurangije”.

Ubuyobozi bw’Akarere ka Nyaruguru ntibwahwemye gutangaza ko uriya muhanda ukozwe byazana amahirwe menshi ku baturage, na Kibeho nk’ahantu hafite amateka hagatera imbere ndetse hagasurwa kurushaho.

Kibeho ifatwa nk’ubutaka butagatifu bwabereyeho amabonekerwa ya Bikira Mariya.

Uyu muhanda uzaturuka mu Karere ka Huye ugere ku Biro by’Akarere ka Nyaruguru unyuze i Kibeho, ukomeze uhure n’umuhanda Huye –Kanyaru. Hari kandi n’ishami rizava ku Biro by’Akarere ka Nyaruguru rigezwe ku Bitaro bya Munini biherereye muri aka Karere ka Nyaruguru.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE