Nshoye miliyoni 15$ nkabona 100$, ni ubucuruzi budasanzwe –Kagame avuga ku musaruro w’ubufatanye na Arsenal FC

Yanditswe na Rabbi Malo Umucunguzi
Kuya 29 Kamena 2019 saa 12:48
Yasuwe :
0 0

Perezida Paul Kagame yavuze ko ubufatanye bw’Ikigo cy’Igihugu cy’Iterambere n’ikipe ya Arsenal FC yo mu Bwongereza, bukomeje kubyara inyungu mu bukerarugendo n’ishoramari, nubwo hari abakomeza kunenga ubu bufatanye.

Perezida Kagame yabigarutseho mu kiganiro n’abanyamakuru muri Botswana, ku munsi wa nyuma w’uruzinduko rwe rw’iminsi ibiri muri icyo gihugu.

Muri Gicurasi 2018 nibwo byatangajwe ko Ikigo cy’Igihugu cy’Iterambere (RDB) cyinjiye mu bufatanye bw’imyaka itatu n’ikipe ya Arsenal FC yo muri Premier League, u Rwanda ruyibera umuterankunga wa mbere ku maboko y’imipira, aho yambara ‘Visit Rwanda’ ku kuboko kw’ibumoso ku ikipe nkuru, iy’abatarengeje imyaka 23 no mu ikipe y’abagore.

Perezida Kagame yavuze ko ubu ari ubufatanye ariko bujyanye n’ubucuruzi, kuko aho ikipe ya Arsenal FC igeze isakaza ubutumwa ko u Rwanda ari ahantu heza habereye gushorwa imari.

Ati “Ibyo abantu banenga byaje bivuga ko twatanze amafaranga menshi, ntabwo ariho twakabaye dushyira amafaranga yacu, ariko twe tukabivuga ukundi. Hashize igihe gito dusinye amasezerano y’ubu bufatanye, ariko nababwira ko ari nk’aho tumaze kugaruza amafaranga twatanze kandi dutegereje n’andi menshi agomba kuza.”

“Twabonye abantu benshi badusura, amagana, ibihumbi, abandi bamaze guteganya kuza gusura. Kuri twe ni ubucuruzi, ushobora kuvuga ngo wenda mwatanze miliyoni $15, kuki mwagiye muri ibi, ariko nshoye miliyoni 15$ nkabona miliyoni zigera ku 100$ zivuye muri ibyo, ndakeka ari ubucuruzi butanasanzwe. Ibyo kandi dushobora kubirebera mu nyungu tumaze kubona mu bijyanye n’ubukerarugendo bwacu.”

Yavuze ko mu myaka isaga 10 ishize u Rwanda rutashoboraga kubona miliyoni 100$ ku mwaka zivuye mu bukerarugendo, ariko ubu umusaruro wabwo ugeze muri miliyoni 450$, ndetse imibare igaragaza ko mu yindi myaka itanu ruzaba rugera muri miliyari y’amadolari ya Amerika.

Yakomeje ati “Ubu bufatanye nabwo bwasinywe muri urwo rwego. Ibyo abantu bavuga ni uburenganzira bwabo, ariko nanjye mfite inshingano zo gukora ikintu cyose numva ko kirazanira inyungu igihugu cyanjye.”

Umusaruro u Rwanda rukura mu bukerarugendo wageze kuri miliyoni $438 mu 2017, wiyongeraho miliyoni $34 ugereranyije n’uwa 2016. Rwiteze miliyoni $800 mu 2024.

Perezida Kagame yagiranye ikiganiro n'abanyamakuru mbere yo kuva muri Botswana
Perezida Kagame yavuze ko ubufatanye na Arsenal FC bwamaze gutanga umusaruro
Perezida Kagame yaganiriye n'itangazamakuru ari kumwe na Perezida Mokgweetsi Masisi wa Botswana
Abanyamakuru bahawe umwanya wo kubaza ibibazo binyuranye
Perezida Mokgweetsi Masisi yaherekeje Perezida Kagame ku kibuga cy'indege
Perezida Mokgweetsi Masisi ahobera Perezida Kagame mu kumusezera
Perezida Mokgweetsi Masisi asezera kuri Perezida Kagame wari ugiye guhaguruka ku butaka bw'icyo gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza