Kwamamaza

Nkombo: Abaturage batakambiye Minisitiri bamusaba internet n’umuyoboro wa telefone bitomoye

Yanditswe kuya 12-08-2016 saa 17:55' na Sitio Ndoli


Abatuye mu kirwa cya Nkombo kuri bo gukoresha itumanaho rya telefone ndetse no kuganira hifashishijwe imbuga nkoranyambaga nka facebook, whatsapp na twitter biragoranye kuko bakibangamiwe n’ikibazo cy’ingutu giterwa n’iminara yo muri Congo ikunze kwiganza muri telefone zabo ngendanwa.

Bamwe mu rubyiruko baganiriye na IGIHE bahatuye bagaragaza imbogamizi baterwa no kudakoresha ikoranabuhanga rigezweho mu kungurana ubumenyi no guhanahana amakuru kandi ku buryo bwihuse.

Uwineza Carine ati “ Telefone ziba zifite umuyoboro rimwe na rimwe, ubundi zigafata imirongo y’iminara yo muri Congo nka Vodacom. Ntabwo uba ugihamagaye ndetse na internet ntushobora kongera kuyikoresha. Byaba byiza bongereye iminara yo mu Rwanda ubushobozi kuko usanga iyo muri Congo ari yo yiganje muri aka gace.”

Tuyishime Fiston yavuze ko gucikagurika kw’imiyoboro y’itumanaho bibadindiza mu mikorere yabo.

Ati “Hari igihe ufungura telefone ugasanga harimo iminara yo muri Congo, urumva iyo uri gukoresha interineti biba biri kugutinza, wenda twasaba abashinzwe ikoranabuhanga ko badufasha bakongerera iminara ubushobozi ikagera inaha mu buryo butomoye.”

Bamwe mu banyeshuri biga ku ishuri ry’uburezi bw’ibanze bw’imyaka 12, Groupe Scolaire ya Nkombo bavuga ko bafite inzu irimo mudasobwa ariko ko badakoresha internet uko bikwiye.

Akaliza Claire ati “Izi mudasobwa zacu zibona internet inshuro nke zishoboka, bigatuma tudakora ubushakashatsi uko bikwiye ndetse ngo tunamenye gukoresha iri koranabuhanga.”

Kuri uyu wa kane tariki ya 11 Kanama 2016, Minisitiri w’Urubyiruko n’Ikoranabuhanga (MYICT), Jean Philbert Nsengimana mu biganiro bitegura umunsi mpuzamahanga w’urubyiruko(wizihizwa ku wa 12 Kanama buri mwaka) yijeje abatuye Nkombo ko uyu mwaka ugomba kurangira iki ikibazo cy’iminara cyakemutse burundu.

Ati “ Ikibazo cy’ikoranabuhanga, guhamagara no kwitaba nanjye ubwanjye nabyiboneye ko birimo ikibazo. Dusuye ishuri dusanga bafite mudasobwa ariko birabagora kubona internet, iki kibazo kigomba gucyemuka. Reka mbizeze yuko uyu mwaka turimo uzarangira cyarahindutse amateka. Uyu murenge ugomba kuba uwa Mbere uzaba ufite itumanaho rimeze neza.”

Minisitiri Nsengimana yasabye urubyiruko gufatanya mu gusigasira iri koranabuhanga kugira ngo rizabe umusingi w’ireme ry’uburezi.

Ikoranabuhanga ni kimwe mu biteza imbere ishoramari kuko aho rigeze guhanahana amakuru no gucuruza serivisi z’itumanaho birushaho kwihuta ndetse n’urubyiruko rukabasha kubona akazi ari na ko rurushaho kuribyaza umusaruro.

Umunsi mpuzamahanga w’urubyiruko washyizweho n’Umuryango w’Abibumbye mu mwaka wa 1999, wizihizwa bwa mbere kuwa 12 Kanama 2000.

Minisitiri w’Urubyiruko n’Ikoranabuhanga , Jean Philbert Nsengimana aganira n'abanyeshuri bo mu rwunge rw'amashuri rwa Nkombo
Abanyeshuri ngo ntiboroherwa no gukora ubushakashatsi kubera ikibazo cya internet
Meya wa Rusizi, Harerimana Frederic yavuze ko hari uduce tumwe na tumwe tugifite ikibazo cyo gutumanaho hakoreshejwe telefone
Minisitiri Nsengimana(ufite inkoni) acinya akadiho n'Abasamyi bo ku Nkombo

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved