Kwamamaza

Ibibazo by’ingutu bituma inganda mu Rwanda zidahangana ku isoko

Yanditswe kuya 28-09-2016 saa 10:08' na Tombola Felicie


Ibura ry’abakozi b’inzobere, ibikoresho by’ibanze, kutagira za Laboratwari zabugenewe, abatekinisiye kabuhariwe, ibura ry’amazi n’umuriro mu nganda, kubura ibyo gupfunyikamo; ni bimwe mu byagaragajwe n’Ikigo gishinzwe ubushakashatsi n’Iterambere ry’Inganda mu Rwanda (NIRDA) nk’ibikizitiye inganda zo mu gihugu bituma zitabasha gutanga umusaruro mwiza.

Umusaruro w’inganda muri 2005 wari kuri 13%, muri 2010 nabwo wari kuri 13% naho muri 2015 wari uri ku kigero cya 15% mu gihe hifuzwa ko waba wageze kuri 17% mu mwaka utaha wa 2017.

Ubwo NIRDA (National Industrial Research and Development Agency) yamurikaga ubushakashatsi bwakorewe mu nganda 62 zitandukanye zitunganya ibiribwa n’ibinyobwa ndetse n’inganda z’Ubutabire (chemical industries) muri uyu mwaka, yagaragaje ibibazo by’ingutu bituma umusaruro w’inganda uba uri hasi mu Rwanda ndetse ntube wahangana n’uwo mu bindi bihugu.

Avugana n’itangazamakuru, Karuranga Canisius wayoboye ubu bushakashatsi, yatangaje ko icyari kigamijwe ari ukureba ibibangamiye inganda zo mu Rwanda kugira ngo bishakirwe umuti n’inzego bireba maze umusaruro w’inganda zo mu Rwanda uhangane n’uwahandi.

Ati”Ubu bushakashatsi bwari bugamije kureba ngo ni ibiki bikenewe kugira ngo natwe inganda zacu umusaruro wazo uhangane n’izahandi .Twasanze hakiri ibibazo byinshi, cyane cyane muri izi nganda nto .Usanga nta bikoresho by’ibanze bihagije bihari , uburyo bwo gupakira umusaruro wabo ni ikibazo (packaging) , kubura umuriro n’amazi bya hato na nato bituma umusaruro uba muke cyangwa ukaba mubi.”

Karuranga yavuze ko mu bijyanye no gutunganya ibiribwa (agro-processing), barebye gusa ku bihingwa bitanu ari byo : ingano,ibigori, ibitoki,imyumbati n’umuceri.

Ati” Ku bijyanye no gutunganya ibiribwa by’ibanze kuri ibyo ng’ibyo bitanu kuko usanga ari byo bifata umubare munini mu nganda nto, ariko na bwo ubona ko imitunganyirize ikiri hasi . Hari aho usanga gutunganya bikoreshwa intoki igihe abandi bageze ku gukoresha ikoranabuhanga, urumva ko ibyo bicuruzwa nta kuntu byahangana ku isoko.”

Ikindi yavuze ni uko usanga ibituruka mu musaruro w’inganda biba bihenze bitewe n’umuriro uhenze,amazi, ijanisha ku nyungu riri hejuru mu mabanki n’ibindi.

Karuranga avuga ko niba abo hanze bazana ibicuruzwa byabo bikabona isoko mu Rwanda bityo n’abanyarwanda bakwiye kureba ikibura bakagikora kugira ngo umusaruro wo mu Rwanda ubone isoko.

Ati ”Niba ibyo hanze biza bikagurwa kuko ari byiza kandi bihendutse natwe turebe ikibura tugikore noneho ibitumizwa hanze bihagarare.”

Avuga ku kibazo cy’amazi mu nganda, Karuranga yatangaje ko 18% babura amazi mu gihe cy’ukwezi, 55% bakayabura hagati y’isaha imwe n’umusi , 9% bakayabura mu gihe cy’ukwezi no kurenzaho.

Ku mashanyarazi, 50% babura umuriro hagati y’isaha imwe kugeza ku munsi umwe, 30% bakawubura iminsi irenze umwe ,ibyo byose bikaba bikururira ibihombo abanyenganda kuko hari ubwo ibikoresho byabo byangirika, umusaruro ukaba mubi cyangwa bagakoresha moteri bagahendwa cyane.

Dr Joseph Mungarulire, Umuyobozi w’Ikigo gishinzwe ubushakashatsi n’Iterambere ry’Inganda mu Rwanda, yatangaje ko Leta y’u Rwanda hari ibyo yatangiye gukemura.

Ati” Ibibazo by’amashanyarazi murabizi ko Leta yatangiye kubishakira igisubizo, hari ibikorwa remezo nk’imihanda igenda yubakwa, hari umushoramari wenda gutangira gukora ibijyanye no gukora ibyo gupfunyikamo n’ibindi.”

Ubu bushakashatsi bwamurikiwe abafite inganda nto n’inini, inzego za Leta, Kaminuza y’u Rwanda kugira ngo ijye isohora abanyeshuri babasha gukora ibintu byiza bihangana ku isoko ry’umurimo n’abandi bafatanyabikorwa ba NIRDA batandukanye.

NIRDA ni ikigo cyashyizweho muri 2013 gishamikiye kuri Minisiteri y’Ubucuruzi n’Inganda kikaba cyarasimbuye icyari kizwi nka IRST.

Karuranga Canisius avuga ko umusaruro utangwa n'inganda zo mu Rwanda utabasha guhangana n'uwo mu bindi bihugu kubera ibibazo bitandukanye
Abanyenganda bagaragaza ko ibibazo birimo iby'amazi n'umuriro bidindiza imikorere yabo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved