Nimujyana umwana mu kigo ngororamuco mujye muzana se na nyina babanemo- Busingye

Yanditswe na Uwishyaka Jean Louis
Kuya 23 Nzeri 2016 saa 08:32
Yasuwe :
0 0

Nyuma y’uko akarere ka Gicumbi kari kihaye intego ko igihembwe cya kabiri cy’amashuri cyari kurangira abana bose bataye ishuri barisubijwemo nyamara iyi ntego ikananirana, Minisitiri w’Ubutabera Johnston Busingye yasabye ubuyobozi bw’aka karere n’abashinzwe umutekano gukurikirana aba bana batibagiwe n’ababyeyi babo babareka bakava mu ishuri ndetse bakicecekera.

Muri Gicurasi uyu mwaka, akarere ka Gicumbi n’inzego z’uburezi batangazaga ko bafite abana bataye ishuri mu abanza bagera ku 7728 na 23 mu mashuri yisumbuye, ariko biha umuhigo ko igihembwe cya kabiri kizarangira bose barigaruwemo, gusa ariko ibi ntibiragerwaho.

Mu byumweru bibiri bishize ubwo abagize Inteko Ishinga Amategeko umutwe w’Abadepite basuraga imirenge igize Akarere ka Gicumbi, bageze mu Murenge wa Miyove bagaragarijwe ko bagifite abana bagera kuri 200 batarasubizwa mu ishuri.

Minisitiri w’Ubutabera akaba ari nawe ushinzwe akarere ka Gicumbi muri Guverinoma, Johnston Busingye, ubwo yari yifatanyije nako mu kwishimira igikombe begukanye mu kwesa imihigo aho kabaye aka kabiri, ku cyumweru tariki 18 Nzeri 2016, yavuze ko hatagize igikorwa mu maguru mashya ikibazo cy’abana bata ishuri cyakomeza kwiyongera, agaragaza ko n’ababyeyi b’abo bana bakwiye kujya bahurizwa hamwe mu bigo bihurizwamo abana baba bavanywe mu muhanda (transit center) kugira ngo bahugurirwe hamwe.

Yagize ati "Nitumujyana muri transit center iri aha, mujye mugenda muzane se na nyina na bo tubashyiremo babane na we, bamugaburire, tuganire na bo, ndabisaba abashinzwe umutekano bari aha, umwana uri mu muhanda mujye mugenda muzane umubyeyi we babane hamwe hano. Nitumushyira muri transit center na bwo ababyeyi babe bari kumwe nawe."

Yakomeje agira ati "Jyewe ntabwo mbereyeho kurera umwana wawe tutabivuganye, ntabwo akarere kabereyeho kurera umwana wawe mutabigiranye gahunda[...]ufite ubushobozi buke bwo kurera umwana, uwabuze amafaranga y’ishuri (minerval) hari gahunda zimufasha, izo zose iyo azirenzeho akajya mu muhanda akanywa ibiyobyabwenge, akiba, tukamufata tukamushyira mu kigo ngororamuco ukaguma mu rugo wa mubyeyi we ubwo ugumayo ukora iki? ubwo urarera nde? waje nawe tukakurera."

Minisitiri Busingye kandi avuga ko aho bizagaragara ko ibyo bigo bidahagije, ngo nibiba ngombwa bizongerwa bibashe gucumbikira abana n’ababyeyi babo.

Gusa uyu mwanzuro bamwe mu babyeyi baganiriye na IGIHE ntibawuvugaho rumwe ku kuba watanga umuti urambye ku kibazo cy’abana bata ishuri.

Kayihura Canisius atuye mu Murenge wa Byumba, yemera ko bamwe mu babyeyi bakwiye guhwiturwa.

Ati“ Icyo gitekerezo ndagishyigikiye, iyo ubyaye umwana warangiza ngo yarakunaniye ajya mu muhanda ibyo birashoboka? Abenshi usanga hari ibyo batuzuza mu ngo zabo umwana akamera nkaho yigenga cyangwa akajya mu muhanda ameze nk’uwiyahura kubera kubaho nabi. Turabazi aho ababyeyi barara barwana, kubera agahinda umwana akigendera, aho umwana atabona ibyo kurya, ubwose urumva uwo yakwiga ate? Rwose nibafatwe nabo ndetse njye mbona bajya banahanwa.”

N’ubwo uyu avuga gutya ariko hari abandi basanga binakozwe ubuyobozi bwajya bushishoza kuko ngo hari aho abana bajya mu mihanda kubera ubukene n’ibindi bibazo bitavuye ku babyeyi, gusa bagashimangira ko kwita ku bana bigomba guhabwa umurongo kuko na bo bemera ko hari imiryango yamaze kuba ntibindeba.

Ikibazo cy’abana bata amashuri bakishora mu muhanda, nticyihariwe n’akarere ka Gicumbi gusa kuko uturere dutandukanye tw’igihugu natwo tugifite.

Ubwo yari mu Karere ka Rubavu muri Werurwe uyu mwaka, Perezida Kagame yagarutse kuri iki kibazo avuga ko gikwiye gushakirwa umuti mu maguru mashya, yemeza ko mu gihe ababyeyi, abarezi n’inzego z’ubuyobozi bafatanyije babasha kugikemura. Gusa iyo ugiye hirya no hino usanga iki kibazo kigaragara ndetse hamwe ugasanga imibare y’abana bata ishuri iri hejuru cyane.

Minisitiri busingye asaba ko abana bata ishuri bakwiye kujyanwa mu bigo ngororamuco kimwe n'ababyeyi babo

pacifique@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza